Mateu 21
21
Jesu a enghena Jerusalema.
1Laha va nga tshinela Jerusalema, na va chikele Betfage le xitsungeni xa maOliva, Jesu i lo ruma vapizani vambiri, Zak. 14:4; Mar. 11:1; Lu. 19:29
2aku kabye: Fambani zimutaneni xi nga mahlweni ka nwina, mu ta ya kuma a mbongola na yi khungilwe na yi hi ni ximbongolana; ti tlhatlheni muta nato ka mina.
3Loku munhu a wula nchumu ka nwina, mu taku: A Hosi ya ti lava; i ta ti rumela zalezi.
4Makunu lezi zi mahekile, kasi ku fela ku tatiseka lezi zi nga kanetwa hi muprofeti, aku:
5Byelani a nhanyana wa Zioni, muku:
Languta, a Hosi ya wena yata ka wena,
Yi rulile, yi khilele mbongoleni,
A role ga pswele ga mbongola.
6A vapizani va lo famba, va ya maha kota lezi Jesu a nga va layile.
7Va lo neha a mbongola ni ximbongolana, va tlhateka a tinguwo tabye hehla ka tona, Jesu a tshama hehla ka tinguwo leto. 2 Tih. 9:13
8A vanyingi Va xidlemo va lo andlala a tinguwo tabye ndleleni; vanwani va gawula maravi ya tisinya, va ma andlala ndleleni. Levi 23:40; Joh. 12:13
9Ni zidlemo lezi zi nga rangile ni lezi zi nga lanzela, zi lo kanyuluka, ziku: Hozana ka Nʼwana Davida; a ku khesiwe yena loyi a tako vitweni ga Hosi; Hozana ka le hehla-hehla. Tis. 118:26; Xip. 23:39
10Laha na a chikele Jerusalema, a muti wontihe wu lo maha nyenganyenga, vaku: Himani loyi ke? Mar. 11:15; Lu. 19:45; Joh. 2:13, 15
11Ni zidlemo ziku ngalo: Loyi hi Jesu, a muprofeti wa le Nazareta wa Galilea. Lu. 7:16; Joh. 6:14
Jesu a basisa tempeli.
12Jesu i lo enghena tempeleni ya Nungungulu, a hlongola vontlhe lava va nga kari va xavisa ni ku xava tempeleni; i lo khubhunyeta a timeza ta vaxavisi va mali, ni zitshamu za lava va nga Xavisa zipomba; Mar. 11:11; Lu. 9:45; Deut. 14:25
13aku ngalo ka vona: Ku tsalilwe ku ngalo: A yindlu ya mina yi ta tibyiwa ku ngalo i yindlu ya kukhongela; kanilezi nwina mu yi mahile a bako ga vaphangi. Jer. 7:11; Mar. 11:17; Lu. 19:46
14A zikhumu ni zilema zi lota kakwe lomu tempeleni, a zi hanyisa.
15Kanilezi laha a vapristi va hombe ni vatsali va nga wona a zirewukiso lezi a nga zi maha, ni vanana lava va nga kanyuluka lomu tempeleni, vaku: Hozana ka Nʼwana Davida, va lo zangara,
16vaku ka yena: Wa zizwa lezi va zi wulako ke? Jesu aku kabye: Ina, cima a mu gonzangi a gezu legi gi nge ngalo: Hi milomu ya zihlangana ni tisana u ti longisele kudzunziwa? Tis. 8:2
17Yena i lo va siya, a huma mutini aya Betania, a ya etlela kona.
A nkuwu wo kala mihanzu.
18Ni mixo na a ha wuya le mutini i lozwa ndlala. Mar. 11:12
19Laha ha a wona a sinya ya nkuwu hi le tlhelweni ga ndlela, i loya ka wona, kanilezi a nga kumangi nchumu ka wona, sine matluka ntsena. Aku ka wona: Kusukela lezi ngha u nga ha pswali mihanzu kala kupinzuka. Zalezo a sinya ya nkuwu yi lo woma.
20Laha vapizani na va zi wonile, va lo hlamala, vaku: A nkuwu wu omisile kuyini hi kuhatlisa ke?
21Jesu i lo hlamula, aku ngalo kabye: Hizinene nziku ka nwina: Loku mu hi ni kukholwa, mu nga kanakani, mu nga ta maha ntsena lezi zi mahilweko ka nkuwu, kanilezi hambu muku ka lexi xitsunga: Kunuka, u ya ti hoxa bimbini, zi ta maheka. Lu. 17:6; 1 Kor. 13:2; Jak. 1:6
22Ni zilo zontlhe mu ta nga zi kombela hi kukhongela, na mu kholwa, mu ta amukeliswa. Mar. 11:24; Lu. 11:9; Jak. 5:16
Jesu a wutisiwa hi ntamu wakwe.
23Laha na a enghenile tempeleni, a vapristi va hombe ni masingalakati ya vanhu va lota ka yena laha a nga kari a gonzisa, va taku ngalo: I ntamu muni u mahako ha wona lezi zilo ke? Himani a nga ku nyika lowu ntamu ke? Ekso. 2:14; Mar. 11:27; Miti. 4:7
24Jesu i lo hlamula, aku ngalo kabye: Minawu nzi ta mu wutisa mhaka yinwe, loku mu nzi hlamula, minawu nzi ta mu byela a ntamu lowu nzi mahako ha wona lezi zilo.
25A kubapatiza ka Johani, ku wata hi kwihi ke? Ku wata hi le tilweni, kutani hi ka vanhu ke? Va lo wulawulisana xikari kabye, vaku: Loku hi ku ngalo: Hi le tilweni, i taku ngalo ka hina: Hi yini mu nga kala ku kholwa ka yena ke?
26Kanilezi loku hiku: Hi ka vanhu, ha chava vanhu; hakuva vontlhe a vaku, Johani muprofeti. Xip. 14:5; Lu. 20:6
27Va lo hlamula vaku: A hi zi tivi. Yenawu aku kabye: Minawu nzi nga ta mu byela hi ntamu lowu nzi mahako ha wona lezi zilo.
Mufananiso wa vana vambiri.
28Kanilezi mu yini nwina ke hi mhaka leyi? A munhu i wa hi ni vana vambiri; i loya ka nhonzwa, a yaku ngalo: Nwananga, famba u ya tira xivineni nyamutlha.
29I lo hlamula, aku: Nyawowe; kanilezi hi lenzhako i lo hunzuluka, aya kona.
30Zonake i loya ka nzisana, a ya wulisa za lezo. I lo hlamula, aku: Nzi taya, hosi; kanilezi a nga yangi.
31Hi wihi wa lava vambiri a nga maha kuranza ka raru wakwe ke? Vaku: Hi loyi wa kuranga. Jesu aku kabye: Hizinene nziku ka nwina: A vahlengisi ni zibhayi va mu rangela ku enghena mufunweni wa Nungungulu.
32Hakuva Johani i lota, a ta mu tivisa a ndlela ya kululama, a mu mu kholwangi; kanilezi a vahlengisi ni zibhayi va lo mu kholwa; hambu lezi mu nga zi wona, a mu hunzulukangi, kasi mu fela ku kholwa hi yena. Xip. 3:1; Lu. 3:12, 13
A mufananiso wa varimi.
33Ingisani munwani mufananiso: Ku wa hi kona a nwinyi wa yindlu, a nga byala a xivina, a xi bhiyela lihlavu, a kehla xigowolo xo kamela mihanzu ya kona, ni ku aka tshala; i lo xi nyikela mandleni ya varimi, a enzela ginwani tiko. Mar. 12:1; Lu. 20:9
34Laha a nguva ya mihanzu yi nga tshinela, i lo ruma malanza yakwe ka varimi, kasi ku ya amukela mihanzu yakwe.
35Kanilezi a varimi va lo khoma a malanza yakwe, vaba ginwe, ginwani va gi daya, ni ginwani va gi gandla hi maribye. 2 Kro. 24:21; 1 Tes. 2:15
36I lo engeta a rumela a malanza manwani, yo tala ku hunza laʼyo ranga; va lo maha ka wona kota lawa yo ranga.
37A kala a rumela nʼwana wakwe, na aku: Vona va tava ni xichawo ka nʼwana wa mina.
38Kanilezi a varimi, laha na va wonile a nʼwana wakwe, vaku xikari kabye: Hi yena mugi wa tshomba, ngonani, hi mu daya, higa tshomba yakwe. Tis. 2:2, 8; Joh. 11:53
39Va lo mu khoma, va mu humesa sinwini ga xivina, va mu daya. Mar. 14:46; Lu. 22:54
40Loku ata a nwinyi wa xivina, i ta maha yini ka varimi lavo ke?
41Va lo mu hlamula, vaku: I ta va lovisa vaku bhi a vanhu lava va kubiha; zonake i ta nyikela xivina ka vanwani varimi, lava va ta nga mu nyika a mihanzu hi tinguva ta yona. Lu. 21:24; Miti. 13:46
42Jesu aku kabye: Xana a mu gonzangi Mitsalweni ku ngalo:
A ribye legi gi nga aliwa hi vaaki,
Gi mahile a hloko ya magumo;
Lexi xi mahilwe hi Hosi,
Xa hlamalisa mahlweni ya hina. Tis. 118:22; Miti. 4:11; Efe. 2:20
43Hikwalaho nziku ka nwina: A mufumo wa Nungungulu wu ta tekiwa ka nwina, wu nyikiwa a tiko ginwani legi gi ta nga humesa a mihanzu ya wona.
44Loyi a ta ngawa hehla ka ribye legi i ta pswhandleka zipanzana; kanilezi loyi gi ta ngawa hehla kakwe gi ta mu silisisa. Isa. 8:15; Lu. 20:18; Rom. 9:33
45Laha a vapristi va hombe ni vaFarisi na va yi zwile a mifananiso yakwe, va lo zi tiva lezaku i wulawula ha vona;
46va lo lava ku mu khoma, kanilezi va chava a zidlemo, hakuva a vanhu a vaku muprofeti.
Currently Selected:
Mateu 21: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
