Mateu 13
13
A muxwanyi.
1Hi lego siku Jesu i lo huma ndlwini, a ya tshama hi le bimbini.
2Ku lo tsombana kakwe a zidlemo za hombe, kala a enghena ngalaveni, a tshama ka yona; ni zontlhe zidlemo zi lo yima fungwini. Lu. 5:3; 8:4
3I lo kanela kabye a timhaka to tala hi mifananiso, aku: Ku lo huma muxwanyi a ku ya xwanya. Lu. 8:5
4Na a kari a xwanya a tinwani timbewu ti lo wela ndleleni; ku lo chikela tinyanyani ti ta jowotela.
5Timbewu tinwani ti wela wutshanwini ga maribye, laha ku nga hi hava misava yo tala; ti lo mila hi xihatla, hilezi ti wa nga hi na misava yi etileko.
6Laha na gi tsuwukile gambo, ti lo tlahuka, ti wuna, hakuva ti wa nga hi na mitsu.
7Tinwani ti lo wela xikari ka mizwa: a mizwa yi kula, yi ti tlimba.
8Kanilezi tinwani ti lo wela misaveni yo saseka, ti pswala mihanzu; a tinwani ti lo pswala hi 100, tinwani hi 60, tinwani hi 30.
9Loyi a nga ni tindleve, ngha a ingisa.
10A vapizani va lo tshinela, vaku kakwe: Hi yini u wulawulako kabye hi mifananiso ke?
11I lo hlamula aku ngalo kabye: Hakuva nwina mu nyikilwe ku tiva mifihlakalo ya mufumo wa tilo, kanilezi vena a va nyikiwangi. Xip. 11:25; Mar. 4:11; 1 Kor. 2:10
12Hakuva loyi a nga nazo, i ta nyikiwa, ava ni za kutala; kanilezi loyi a nga hiko nazo, i ta tekelwa ni lezi a nga nazo. Xip. 25:29; Mar. 4:25; Lu. 8:18
13Hikwalaho nza kanela ka vona hi mifananiso, hakuva hambu va wona, a va wonisisi, hambu vazwa a va zwisisi, ge ni ku pima.
14Ku tatiseka ka vona a xiprofeto xa Isaya, xi nge ngalo:
Hi kuzwa mu tazwa, kanilezi mu nga ta pima;
Hi kuwona mu ta wona, kanilezi mu nga ta zi tiva. Isa. 6:9; Rom. 11:8
15Hakuva a timbilu ta lava vanhu ti nonohile,
A tindleve tabye a ti hatlisi ku ingisa,
Ni mahlo yabye ma tsimbile;
Ku nga taku va wona hi mahlo yabye,
Vazwa hi tindleve tabye,
Va pima hi timbilu tabye,
Va hunzuluka, nzi va hanyisa. Maheb. 5:11
16Kanilezi ma katekile a mahlo ya nwina, hakuva ma wona; ni tindleve ta nwina, hakuva tazwa.
17Hizinene nziku ka nwina: A vaprofeti vanyingi ni vanhu va lulamileko va wa xuva ku wona a zilo mu zi wonako, a va zi wonangi; ni kuzwa lezi mu zi zwako, a va zi zwangi.
18Hikwalaho ingisani a timhaka ta mufananiso wa muxwanyi. Mar. 4:14; Lu. 8:11
19Laha munhu a zwako a mhaka ya mufumo a nga yi pimi, kuta kakwe loyi wa kubiha, a ta wutla lexi xi xwanyilweko lomo mbilwini yakwe. Loyi hi yena a xwanyilweko ndleleni.
20Loyi a nga xwanyiwa maribyeni, hi yena loyi a zwako mhaka, a hatla a yi amukela hi kutsaka;
21kasi yena wutsumbu a nga na mitsu, e tiya xikhatanyana ntsena; kanilezi loku ku chikela a kukarateka kutani kuxaniseka hi kota ya mhaka, a khunguvanyeka zalezo.
22Loyi a nga xwanyiwa xikari ka mizwa, hi yena loyi a zwako mhaka, kanilezi a kukaratekela a zilo za tiko, ni kukhohlisa ka xuma, ku tlimba a mhaka, lezaku yi nga pswali mihanzu. Jer. 4:3; Mar. 10:23
23Kanilezi loyi a nga xwanyiwa misaveni yo saseka, hi yena loyi a zwako mhaka, a yi pima; yena wa pswala mihanzu, a munwani i pswala hi 100, a munwani hi 60, ni munwani hi 30.
Mufananiso wa nyasavari.
24I lo kanela munwani mufananiso kabye, aku: A mufumo wa tilo wu fanana ni munhu loyi a nga xwanya a timbewu ti nene sinwini gakwe.
25Kanilezi na va etlele vanhu, ku lota nala wakwe a ta xwanyawu a nyasavari xikari ka mavele, a ti fambela.
26Kanilezi laha a timbewu na ti milile, ti pswala, zonake ku lo woneka ni nyasavari kambe.
27A malanza ya nwinyi ma lota ma taku: Hosi, a ku xwanyangi timbewu ti nene sinwini ga wena ke? Makunu ita hi kwihi a nyasavari loyi?
28Aku ngalo kabye: I nala a nga maha lezi. A malanza maku kakwe: A ku zi ranzi hi ya tsuwulela hi mu hlengeletela ke?
29Kanilezi aku kabye: Kokwihi; ku ngaku laha mu hlengeletelako a nyasavari, mu mu tsuwula ni mavele.
30Ngha na mu zi tsika zi kula zinwe ku kala ku chikela kutshovela. Hi xikhati xa kutshovela nzi taku ka vatshoveli: A kuranga wungeletelani a nyasavari, mu mu boha hi tinyanza, mu mu hisa; kanilezi a mavele mu ma hlengeletela magombeni ya mina. Xip. 3:12
A mbewu ya xinapi.
31I lo kanela munwani mufananiso kabye, aku: A mufumo wa tilo wu fanana ni mbewu ya xinapi, leyi a nga yi teka munhu, a yi byala sinwini gakwe. Isa. 2:2, 3; Mar. 4:30
32Kunene yi tsongwani ku hunza timbewu tontlhe; kanilezi laha na yi kulile yi hunza khubyanyi wontihe, yi maha sinya yaku a zinyanyani za tilo zita zi zumba maravini ya yona.
A comelo.
33I lo kanela munwani mufananiso kabye, aku: A mufumo wa tilo wu fanana ni comelo, lexi a nga xi teka wasati, a xi chela lomo ka zipimo zinharu za mapa, ma kala ma vita wontihe. Lu. 13:20
34Tontlhe leti timhaka Jesu i lo ti kanela ka zidlemo hi mifananiso; a nga wulangi nchumu ka vona ahandle ka mufananiso;
35Kasi ku fela ku tatiseka lezi zi nga kanelwe hi muprofeti, aku:
Nzi ta vulula nomu wa mina hi mifananiso;
Nzi ta humesela a timhaka ti fihlilweko hi kusanguleni ka tiko. Tis. 78:2; 1 Kor. 2:7; Efe. 3:9
A ntlhamuselo wa nyasavari.
36Zonake i lo siya xidlemo, a enghena ndlwini; a vapizani vakwe va lota kakwe, va taku: Hi tlhamusele a mufananiso wa nyasavari lomu sinwini.
37I lo hlamula aku ngalo: Loyi a xwanyako a mbewu yi nene hi Nʼwana wa munhu;
38a simu hi tiko; a mbewu yi nene hi vana va mufumo; ni nyasavari hi Vana va loyi wa kubiha; Gen. 3:15; Lu. 24:47; Miti. 13:10
39a nala loyi a nga va xwanya hi Satani; a kutshovela hi kugumesa ka tiko; ni vatshoveli hi tingelosi. Joeli 3:13; Kuv. 14:15
40Kota lezi a nyasavari a hlengeletelwako a hiswa hi nzilo, ku tava nghaho kugumeseni ka tiko.
41A Nʼwana wa munhu i ta ruma a tingelosi takwe, ti ta wungeletela ti humesa mufunweni wakwe zontlhe lezi zi khunguvanyisako, ni lava va mahako kubiha, Xip. 18:7; 2 Ped. 2:1, 2
42ti ta va hoxa phingweni ga nzilo; laho ku tava kona a mikosi ni kugetsela ka meno. Xip. 3:12; Kuv. 19:20; 20:10
43Zonake a valulamileko va ta ngangamela kotisa gambo mufunweni wa Raru wabye. Loyi a nga ni tindleve, ngha a ingisa. Dan. 12:3; 1 Kor. 15:42, 43, 58
A tshomba.
44A mufumo wa tilo wu fanana ni tshomba yi fihlilweko sinwini, leyi a nga yi kuma munhu, a yi tumbeta; zonake kutsakeni kakwe a famba a ya xavisa zontlhe a nga nazo, a xava simu lego. Fil. 3:7, 8; Kuv. 3:18
45Kambe a mufumo wa tilo wu fanana ni mahungani a lavako maperola yo saseka;
46na a kumile a perola gi nga ni tsengo wa hombe, a ya xavisa zontlhe a nga nazo, a gi xava.
A likoka.
47Kambe a mufumo wa tilo wu fanana ni likoka, lolu li nga petiwa bimbini, li kukuta tixaka tontlhe; Xip. 22:10
48loku li tele, va li kokela fungwini, va tshama hasi va hlengeletela lezi zi nene zibyeni, kanilezi va cukunyeta lezi zo biha.
49Ku tava nghaho kugumeseni ka tiko; a tingelosi ti ta huma, ti avanyisa a vakubiha xikari ka valulamileko,
50ti va hoxa phingweni ga nzilo; laho ku tava kona a mikosi ni kugetsela ka meno.
51Mu ti pimile a timhaka tontlhe leti ke? Vaku ka yena: Ina!
52Aku ngalo kabye: Makunu kani hi wihi mutsali loyi a gonzisilweko hi za mufumo wa tilo i fanana ni munhu loyi a nga nwinyi wa yindlu, loyi a humesako mabakweni yakwe a zilo ziswa ni zilo za kale.
Jesu a aliwa le Nazareta.
53Laha Jesu na mbhetile mifananiso leyi, i lo suka laho.
54Na a tile tikweni gabye i lo va gonzisa sinagogeni gabye, laha kakuva va hlamala, vaku: Inaloyi i gi kumile kwihi a wutlhari legi, ni zirewukiso lezi zita hi kwihi? Xip. 2:23; Mar. 6:1; Lu. 4:16, 23
55Xana loyi a hi yena a nʼwana wa muvatli ke? A nyine wakwe a hi yena a tibyiwako Maria; ni vanakulobye a hi Jakobe, na Josefa, na Simoni, na Juda ke?
56Ni vamakabye vakwe a va kona vontlhe laha na hina ke? Makunu zita hi kwihi zontlhe lezi a nga nazo ke?
57Va lo khunguvanyeka ha yena. Kanilezi Jesu aku ngalo kabye: A muprofeti a nga vumali wudzunzo ahandle ka lomu tikweni gabye, ni ie ndlwini yabye. Mar. 6:3, 4; Lu. 4:24; Joh. 4:44
58A nga mahangi zirewukiso zinyingi laho, hi kota ya kungakholwi kabye.
Currently Selected:
Mateu 13: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
