Luka 7
7
Kuhanyiswa ka nanza ga nduna.
1Laha na a mbhetile kuwulawula kakwe kontlhe ka vanhu, i loya Kapernaume. Mat. 8:5
2A nduna ya yimpi yi wa hi ni nanza legi gi nga ranzeka ka yona, kanilezi gi wa babya, gi hi kusuhi ni kufa.
3Laha na yi zwile hi Jesu, yi lo rumela ka yena a masingalakati ya vaJuda, a ku ya mu kombela lezaku ngha a ta hanyisa a nanza ga yona.
4Laha na va chikele ka Jesu, va lo mu khongotela nguvu, vaku: Yena i fanele hi ku ngha u mu mahela lezo,
5hakuva wa ranza a tiko ga hina; hi yena a nga hi akela a sinagoga ga hina.
6Jesu i lo famba navo, kanilezi laha a nga wa hi kusuhani ni yindlu, a nduna yi lo rumela maxaka, ma yaku kakwe: Hosi, u nga ti karati; hakuva a nzi faneli lezaku u enghena ndlwini ya mina.
7Hilezo a nzi alakanyangi lezaku nzi fanele a kuta ka wena; kanilezi wula a gezu, ni nanza ga mina gi ta hanyiswa.
8Hakuva na mina nzi munhu a fumiwako hi vahombe, na nzi hi ni masochwa ma fumelwako hi mina. Nziku ka ginwe ga wona: Famba, gi famba; ni ka ginwani: Ngone, ata; ni ka xitiri xa mina: Maha lexi, xi xi maha.
9Laha Jesu na zi zwile lezi, i lo hlamala ha yena, a hunzuluka, aku ngalo ka xidlemo lexi xi nga mu lanzela: Mina nza wula ka nwina, A nzi kumangi a kukholwa ka hombe ko kota loku, ge hambu ni ka Israeli.
10Lava va nga rumilwe, na va tlhelile kaya, va lo ya kuma a nanza na gi hanyile.
Jesu a vuxa a nʼwana wa noni.
11Ku te lokuloku anzhako ka lezo, aya mutini wu tibyako Naine; a vapizani vakwe va lo famba naye, zinwe ni xidlemo xa hombe.
12Laha a nga kari a tshinela nyangweni ya muti, ku wa rwelwe a mufi, loyi a nga wa hi nisanyana munwe ka nyine wakwe, loyi a nga hi xifurukati; a vanhu vanyingi va muti va wa mu lanzela.
13Laha Hosi yi nga mu wona, yi lo mu zwela wusiwana, yiku ngalo ka yena: U nga rili!
14Jesu i lo tshinela, a khumba lihlaka, ni lava va nga mu rwala va lo yima. Aku ngalo: Jaha, nziku ka wena, Vuka! Joh. 11:43; Miti. 9:40; Rom. 4:17
15Ni loyi a nga wa file i lo vuka, a sangula ku wulawula. Jesu i lo mu nyikela ka nyine wakwe.
16Vanhu vontlhe va lo chava, va dumisa Nungungulu, vaku: Ku humele muprofeti wa hombe xikari ka hina; niku: Nungungulu i enzele a vanhu vakwe. Joh. 4:19
17Ni mhaka leyi yi lo zwakala le Judia gontlhe ni matikweni wontihe ya leyo. Johani Mubapatizi a ruma vapizani ka Jesu.
18A vapizani va Johani va lo mu byela tontlhe leti timhaka. Mat. 11:2
19Zonake Johani i lo vitana vambiri va vapizani vakwe, a va ruma ka Hosi, aku: Hi wena loyi a tako ke, kutani ha ha langutela munwani?
20Laha a vavanuna va nga tile kakwe, va te ngalo: Johani Mubapatizi i hi rumile ka wena, aku; Hi wena loyi a tako ke, kutani ha ha langutela munwani?
21Hi lexo xikhati Jesu i wa hanyisa vanyingi a tinghumbeni tabye, ni mitungu, ni ku hlongola mimoya ya kubiha, a tlhelisela kuwona ka vanyingi va nga hi zikhumu.
22I lo hlamula, aku ngalo kabye: Fambani, mu ya byela Johani lezi mu zi wonileko ni lezi mu zi zwileko: a zikhumu zi tlheliselwa kuwona, a zilema za famba, a vahlokonho va hlaziwa, ni ziwiri zazwa, a vafileko va vuxiwa, ni zisiwana zi kanelelwa a mahungu yo saseka. Isa. 35:5; Mat. 11:4; Xip. 4:18
23I katekile loyi a nga khunguvanyekiko hi kota ya mina.
24Laha a mitsumi ya Johani yi nga wa sukile, Jesu i lo sangula ku wulawula ha yena ka zidlemo, aku: Mu lo huma muya xiwuleni a ku ya wona yini? A lihlanga li tsekatsekiswako hi moya ke?
25Kutani mu waya a ku ya wona yini? A munhu a nga ambele a tinguwo to saseka ke? Langutani, lava va ambeleko a tinguwo ta makanye-kanye, ni ku hanya hi ku mbyambyela, va lomu ziluvelweni za tihosi.
26Kanilezi mu lo huma a ku ya wona yini ke? A muprofeti ke? Ina, nziku ka nwina, ni ku hunza nguvu a muprofeti.
27Hi yena loyi ku tsalilweko ha yena ku ngalo:
Languta, nza ruma a ntsumi wa mina mahlweni ka wena,
Wu ta longisela a ndlela ya wena mahlweni ka wena. Mal. 3:1
28Mina nziku ka nwina: Xikari ka vona lava va belekilweko hi vavasati a nga kona wa hombe a ku hunza Johani; kanilezi loyi a nga tsongwanyani mufunweni wa Nungungulu ngwa hombe ku hunza yena.
29A vanhu vontlhe ni vahlengisi na va zi zwile, va lo vumela lezaku Nungungulu i longamile, hakuva va wa bapatizilwe hi kubapatiza ka Johani. Mat. 3:5; Xip. 3:12
30Kanilezi a vaFarisi ni vagonzisi va nayo na va nga bapatizwangi hi yena, va lo nyenya a kungo ga Nungungulu. Miti. 20:27
31Jesu i lo engeta aku: Xana nzi ta va fananisa ni yini a vanhu va lexi xizukulwana, va fanana ni yini ke? Mat. 11:16
32Va fanana ni vanana va tshamileko wutshanwini go xavisa, va vitananako, vaku:
Hi mu bele tinanga, kanilezi a mu kinangi;
Hi hlalukile, kanilezi a mu rilangi.
33Hakuva Johani Mubapatizi i tile na a ngagi zibaba, a nganwi vinya; nwina muku: I na ni dimoni. Mat. 3:4; Mar. 1:6
34A Nʼwana wa munhu i tile, na aga, anwa; nwina muku: Langutani a munhu wa kulonzola, xidakwa, munghana wa vahlengisi ni vaonhi! Mat. 11:19
35A zinene za wutlhari zi kombisilweko hi vanana vontlhe va gona.
Jesu a totiwa hi wasati wa muonhi.
36A munwe wa vaFarisi i lo mu ramba lezaku a yaga naye; Jesu i lo enghena ndlwini ya muFarisi, a tshama kugeni. Mat. 26:6; Mar. 14:3; Joh. 11:2
37Laha mutini ku wa hi kona a wasati loyi a nga hi muonhi; loku a zi tivile lezaku Jesu i tshamile kugeni lomu ndlwini ya muFarisi, i lo neha a xikhudzana xa alabasteri xi nga hi ni mafura yo nuhela,
38a yima hi lenzhako mikonzweni yakwe, na a rila; i lo sangula ku tsakamisa a mikonzo ya Jesu hi mihloti yakwe, a yi hlanguta hi misisi ya hloko yakwe; i lo pswopswa mikonzo yakwe, a yi tota hi mafura.
39Laha a nga zi wonile a muFarisi loyi a mu rambileko, i lo wulawula mbilwini yakwe, aku: Loku munhu loyi a wa hi muprofeti, ngha a mu tivile loyi wasati a mu khumbako lezaku hi mani, niku, ngwasati wa ku yini, lezaku muonhi. Xip. 15:2
40Jesu i lo mu hlamula, aku: Simoni, Nzi na ni mhaka a ku wula ka wena. Yena aku: Wula Mugonzisi.
41Jesu aku: Ku wa hi kona a vanhu vambiri va nga hi ni nanzu ka mupembisi wo kari. Munwe i wa hi ni nanzu wa 500 wa macheleni, ni munwani wa 50.
42Laha va nga vumala a za ku riha ha zona, yena i lo va tsetselela hi wumbiri gabye. Makunu hi wihi wa vona a ta nga mu ranza nguvu.
43Simoni i lo hlamula, aku ngalo: Nza alakanya nziku hi loyi a nga tsetselelwa nguvu. Jesu aku kakwe: U wula zona.
44Na a hunzulukela ka wasati, i te ngalo ka Simoni: Wa mu wona loyi wasati ke? Nzi enghenile ndlwini ya wena, a ku nzi nyikangi a mati nzi hlamba mikonzo; kanilezi yena i tsakamisile mikonzo ya mina hi mihloti, a yi kulula hi misisi yakwe.
45Wena a ku nzi pswopswangi, kanilezi yena, cima nzi enghena a nga tsikangi ku pswopswa mikonzo ya mina.
46Wena a ku totangi a hloko ya mina hi mafura; kanilezi yena i totile mikonzo ya mina hi mafura yo nuhela. Tis. 23:5
47Hikwalaho nziku ka wena: A zionho zakwe leʼzinyingi, zi tsetselelwe, hakuva i ranzile nguvu; kanilezi loyi a tsetselelako a zitsongwani, i ranza kutsongwani. 1 Tim. 1:14
48Aku ngalo ka wasati: A zionho za wena zi tsetselelwe. Mat. 9:2; Mar. 2:5
49Lava va nga wa tshamile kugeni zinwe naye, va lo sangula ku wulawula timbilwini tabye, vaku: Himani loyi a tsetselelako ni zionho ke?
50Yena aku ka wasati: A kukholwa ka wena ku ku hanyisile; famba hi kurula. Mat. 9:22; Mar. 5:34; Xip. 8:48
Currently Selected:
Luka 7: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.