Luka 6
6
Vapizani va tshova mavele hi sabado.
1Ku te hi sabado, a kari a tsemakanya masinwini ya mavele, a vapizani vakwe va lo tshova a mipupu ya mavele, va yi hloswa mandleni yabye vaga. Mat. 12:1; Mat. 2:23
2A vanwani va vaFarisi va te ngalo: Hi yini mu mahako lezi zi nga faneliko ku mahiwa hi siku ga sabado ke? Ekso. 20:10
3Jesu i lo va hlamula, aku ngalo: Xana a mu gonzangi lezi a nga zi maha Davida, laha na a zwile ndlala, yena ni lava a nga hi navo; 1 Sam. 21:6
4lezaku i lo enghena ndlwini ya Nungungulu, a teka zibaba zi vekilweko mahlweni ka Nungungulu, aga, a nyika kambe ka lava a nga hi navo, lezi zi nga faneliko ku giwa hi yena, ahandle ka vapristi voce? Levi 24:9
5A engeta aku ka vona: Nʼwana wa munhu i Hosi ya sabado.
Kuhanyiswa ka loye a lameleko canja.
6Ku te hi ginwani sabado, Jesu a enghena sinagogeni a gonzisa. Ku wa hi kona munhu loyi a nga lamele canja ga xinene. Mat. 12:10; Mar. 3:1
7A vatsali ni vaFarisi va lo mu xiyelela, lezaku kutani i ta mu hanyisa hi sabado; kasi va fela ku mu kumisa nanzu.
8Kanilezi yena i lo tiva a maalakanyo yabye; i te ngalo ka loye a nga hi ni canja gi lameleko: Suka, u yima laha xikari; i lo suka a yima.
9Jesu i te ngalo kabye: Nza mu wutisa, Ku fanele hi sabado ku maha kusaseka, kutani ku maha kubiha ke, a ku hanyisa wutomi, kutani ku gi lovisa ke?
10I lo va cuwukisa vontlhe, aku ngalo ka munhu wa kona: Nawuluta a canja ga wena. Yena i lo maha lezo, ni canja gakwe gi hanyiswa.
11Kanilezi va lo tatiswa hi zanga, va hakaseka; va wulawulisana lezaku va ta maha yini ka Jesu.
12Ku te hi ka lawo masiku, aya xitsungeni a ku ya khongela; i lo simamisa wusiku gontlhe a khongela ka Nungungulu. Mat. 14:23
Jesu a hlawula a vapostoli.
13Laha gi nga cile, i lo vitana a vapizani vakwe, a hlawula khume ni vambiri xikari ka vona, lava a nga va chula aku vapostoli: Mat. 10:1
14Simoni, loyi a nga mu chula lezaku hi Pedro, ni nakulobye Andreu, Jakobe na Johani, na Filipu, na Bartolomeu, Joh. 1:42
15Mateu na Tomasi, na Jakobe nʼwana Alfeu, na Simoni loyi a tibyako lezaku Mupinyami,
16Juda nʼwana Jakobe, na. Judasi Iskarioti loyi a nga maha mutokometi. Juda 1
Jesu a kanela laha livaleni.
17Yena i lo relela navo xitsungeni, a yima wutshanwini ga livala; ku wa tsombene kona a vapizani vanyingi va yena, ni vanhu vanyingi va ngata hi le Judia gontlhe ni le Jerusalema, ni va le tikweni ga Tire ni Sidoni, lava va nga tela ku ta muzwa, ni ku ta hanyiswa tinghumbeni tabye, Mat. 4:25; Mar. 3:7
18ni lava va nga karatiwa hi mimoya ya kubiha va lo hanyiswa.
19A xidlemo xontlhe xi wa lava ku mu khumba; hakuva a ntamu wu lo huma ka yena, wu va hanyisa vontlhe. Mat. 14:36; Mar. 5:30; Xip. 8:46
20Jesu i lo tlakusa mahlo, a cuwukisa vapizani vakwe, aku: Mu katekile nwina zisiwana, hakuva a mufumo wa Nungungulu ngwa nwina. Mat. 5:3; 11:5
21Mu katekile nwina lava mu zwako ndlala lezi, hakuva mu ta xurisiwa. Mu katekile nwina lava mu rilako lezi, hakuva mu ta tsaka. Isa. 55:1; 65:13; Mat. 5:4, 6
22Mu katekile nwina loku vanhu va mu venga, va mu hlongola, va mu rukatela, va nyenya a vito ga nwina aku khwatsi gi bihile, hi kota ya Nʼwana wa munhu. Mat. 5:11; Joh. 16:2; 1 Ped. 2:19
23Tsakani hi lego siku, mu maha migiyo; hakuva ngwa hombe a nchachazelo wa nwina le tilweni; hakuva hi mahela legi a vararu vabye va lo xanisa a vaprofeti. Mat. 5:12; Miti. 5:41; Kol. 1:24
24Kanilezi mu tava ni khombo nwina lava mu fumileko; hakuva mu sina mu tangalisilwe. Am. 6:1; Mat. 6:2, 5, 16
25Mu na ni khombo nwina lava mu xurileko lezi; hakuva mu tazwa ndlala. Mu na ni khombo nwina lava mu hlekako lezi; hakuva mu taba mikosi mu rila. Isa. 65:13
26Mu na ni khombo laha vanhu vontlhe va ta nga wulawula khwatsi ha nwina; hakuva va lo mahisa lezo a vararu vabye ka vaprofeti va mawunwa. Joh. 15:19; 1 Joh. 4:5
27Kanilezi nziku ka nwina lava mu nzi zwako; Ranzani a valala va nwina, mu maha kusaseka ka vona lava va mu vengako. Ekso. 23:4; Mav. 25:21; Mat. 5:44
28Katekisani lava va mu rukatelako, ni ku khongelela lava va mu xanisako. Xip. 23:34; Miti. 7:60
29Loyi a ku phakatako a hlaya munwe, mu nyike ni munwani kambe; ni loyi a ku tekelako a bhaji ga wena, u nga mu aleli ni hembe ga wena. Mat. 5:39; 1 Kor. 6:7
30Mu nyike munwe ni munwani a ku kombelako; ni loyi a ku tekelako za wena, u nga tlheli u zi lava ka yena. Deut. 15:7, 8, 10; Mar. 21:26
31Lezi mu ranzako a kuva a vanhu va maha ka nwina, mahaniwo lezo ka vona. Mat. 7:12
32Loku mu ranza ntsena lava va mu ranzako, kubongwa muni mu nga nako ke? Hakuva na vona vaonhi va ranza lava va va ranzako. Mat. 5:46
33Loku mu maha kusaseka ka lava va mahako kusaseka ka nwina, kubongwa muni mu nga nako ke? Hakuva ni vaonhi va maha zalezo.
34Loku mu pembisa ka lava mu tsumbako aku mu ta amukela ka vona, kubongwa muni mu nga nako ke? Hakuva ni vaonhi va pembisa vaonhi, aku kasi va ta tlhela va kuma lezi zi ringanako.
35Kanilezi ranzani valala va nwina, mu va mahela kusaseka, ni ku va pemba na mu nga tsumbi ku tlheliselwa; zonake a nchachazelo wa nwina wu ta maha wa hombe, mu ta maha vana va Loyi a nga Hehla-hehla; hakuva yena i na ni tipswalo ka lava va nga bongiko ni ka lava va bihileko. Tis. 37:26; Mat. 5:45
36Ngha mu hi ni wuxinji, khwatsi hilezi a Raru wa nwina a nga ni wuxinji.
37Mu nga lamuli, na nwina mu nga ta lamuliwa; mu nga koni, na nwina mu nga ta koniwa; tsetselelani, na nwina mu ta tsetselelwa. Mat. 7:1
38Nyikani, ku ta nyikiwa ka nwina; va ta mu nyika xifuveni xa nwina a xiringaniso xi nene, xi kanyetelweko, lexi xi kuhlungelweko xi halakela. Hakuva hi lipimo lolu mu pimelako vanwani ha lona, mu ta pimelwawu ha lona. Tis. 79:12; Mav. 19:17; Mar. 4:24
39I lo engeta a va byela mufananiso lowu, aku: A xikhumu xi nga zi kota ku rangela xikhumu-kulobye ke? Zi nga ta wela rinzini hi wumbiri ga zona ke? Mat. 15:14
40A mupizani a nga hunzi mugonzisi wakwe, kanilezi loyi ni loyi loku a mbhelele zigonzweni i ta kota mugonzisi wakwe ntsena. Mat. 10:24; Joh. 13:16; 15:20
41Hi yini u cuwukisako a xitoti lexi xi nga lomu tihlweni ga makabye wa wena, kanilezi a ku alakanyi a tsanza lowu wu nga tihlweni ga wena nwinyi ke?
42U nga wulisa kuyini ka makabye wa wena, uku ngalo: Makabye, khwatsi, nzi susa a xitoti lexi xi nga lomo tihlweni ga wena, loku u nga woni a tsanza lowu wu nga lomo tihlweni ga wena nwinyi ke? Muxengeteli! susa kuranga a tsanza lomu tihlweni ga wena nwinyi, zonake u ta su wona ku te dlunya a ku susa xitoti xi nga lomu tihlweni ga makabye wa wena.
43Hakuva a ku na sinya yo saseka leyi yi pswalako mihanzu yo biha; kambe a ku na sinya yo biha yi pswalako mihanzu yo nanziha. Mat. 7:16, 17
44Kunene, a sinya yinwe ni yinwani yi tibyiwa hi mihanzu ya yona. Hakuva a vanhu a va koti makuwu lomu ka mizwa, ni lomu gululeni a va koti mauva. Mat. 12:33
45A munhu nene wa humesa a zilo zi nene tshombeni yinene ya mbilu yakwe; ni munhu wa kubiha wa humesa zilo za kubiha, tshombeni yakwe ya kubiha; hakuva a nomu wakwe wu wulawula hi lezi mbilu yi teleko ha zona. Mat. 12:34, 35
46Hi yini mu nzi vitanako, muku: Hosi, Hosi, na mu nga mahi lezi nzi zi wulako ke? Mal. 1:6; Mat. 7:21; 25:11
47Loyi ni loyi a tako ka mina, a tazwa timhaka ta mina a ti maha, nzi ta mu wonisa lezaku i fanana na mani.
48I fanana ni munhu loyi a akako yindlu, loyi a nga kela a etisa, a veka xiseketelo le ribyeni. Laha ku nga chikela a ntalo, ni swinga wu lo khulungela leyo yindlu, kanilezi a yi tsekatsekangi; hakuva yi wa akilwe khwatsi.
49Kanilezi loyi a zwako, a nga zi mahi, i fanana ni munhu loyi a nga aka yindlu laha misaveni na yi nga hi na xiseketelo; ni swinga wu lo yi khulungela, yi su khuyuka; ni kuhahluka ka yindlu leyo ku wa hi ka hombe.
Currently Selected:
Luka 6: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.