Levi 25
25
1Jehova i lo wulawula ka Mosi le xitsungeni xa Sinai, aku:
2Byela vanana va ka Israeli, uku ka vona: Loku mu chikela tikweni legi nzi mu nyikileko gona, a misava yi ta humula, yi maha sabado ga Jehova.
3Lomu ka ntlhanu wa malembe ni ginwe u ta byala a masimu ya wena, zinghaho lomu ka ntlhanu wa malembe ni ginwe, u ta thena a zivina za wena, u kolela mihanzu ya zona.
4Kanilezi hi lembe ga wuntlhanu ni mambiri, gi tava sabado ga kuhumula ka misava, a sabado ga Jehova; u nga byali nchumu masinwini ya wena, hambu ku thena zivina za wena.
5A timbewu leti ti nga mila ha toce u nga ti tshoveli, hambu ni mihanzu ya zivina za wena lezi zi nga theniwangiko u nga khayi; i lembe ga kuhumula ka misava.
6Kanilezi a mihanzu ya misava lomu ka lembe ga kuhumula ka yona, yi tava kuga ka nwina, zinwe ni ka nanza ga wena ga xinuna ni ga xisati, ni ka xitiri xa wena, ni ka muluveli wa wena, loye a akileko na wena;
7a zifuyo za wena, ni zihari lezi zi nga lomu tikweni ga wena, zi taga mihanzu ya kona.
8U ta hlaya ntlhanu wa maviki ni mambiri ya malembe, hi lezaku ntlhanu ni mambiri malembe ma hlayilweko hi ku wuyeta hi ntlhanu ni kumbiri, zonake maviki ya ntlhanu ni mambiri laya ya malembe ma ta maha 49 wa malembe.
9Zonake hi hweti ya wuntlhanu ni timbiri, ka siku ga 10 ga hweti, u taba mpunzu lomu tikweni ga nwina gontlhe, wu biwa hi siku ga nzhiho.
10Mu ta basisa a lembe ga 50, muba hungu ga kutlhatlheka ka vontlhe vanhu va lomu tikweni. Gi tava lembe ga kutsaka ka nwina, a lembe ga jubileu; loyi ni loyi i ta tlheliselwa a xipetso xakwe, ni lezaku loyi ni loyi i ta tlhelela ngangweni wabye.
11A lembe ga 50 a ka nwina gi tava lembe ga kutsaka; mu nga byali nchumu ha gona, hambu ku tshovela mavele ya lembe legi, hambu ku khaya mihanzu leyi yi nga mila ha yoce.
12Hakuva i jubileu; gi tava ga kubasa ka nwina; mu taga mihanzu ya masimu.
13Ka lembe legi ga jubileu loyi ni loyi i ta tlheliselwa tiko ga ka kabye.
14Loku mu xavisa zilo ka muakelani wa wena, ni loku mu xava zilo ka waakelene na wena, mu nga kalavelani.
15U ta xavelana ni muakelani wa wena hi ku hlaya malembe kusukela ka jubileu na yenawu i ta xaviseiana na wena hi ku hlaya malembe ya kutshovela.
16U ta engeta a tsengo wa xipetso loku malembe ma hi manyingi, u hungula a tsengo hi kuhunguleka ka malembe, hakuva u ta ringanyisa a tsengo wa kona hi wunyingi ga malembe ya kutshovela.
17Ngha a nga hi kona loyi a kalavelako a muakelani wakwe; kanilezi chava Nungungulu wa wena; hakuva hi mina Jehova, Nungungulu wa nwina.
18Mu ta hlayisa milayo ya mina, mu ingisa zileletelo za mina, mu zi maha; zonake mu ta aka lomu tikweni hi kurula.
19A misava yi ta humesa a mihanzu ya yona, mu taga mu xura, mu aka ka yona hi kurula.
20Loku muku: Hi taga yini hi lembe ga wuntlhanu ni mambiri loku hi nga byali, hi nga tshoveli nchumu?
21Mina nzi ta mu katekisa nguvu; a lembe ga wuntlhanu ni ginwe gi ta pfuna a kuga ku ringanako malembe manharu;
22hi lembe ga wuntlhanu ni manharu mu ta byala, na mu kari muga lezi mu nga tshovela kale, kala ku chikela a lembe ga wuntlhanu ni mune, na mu kari muga mavele ya kale, mu kala mu tshovela manwani.
23A masimu ma nga xaviselwi magumo, hakuva a misava nja mina; hakuva nwina mu valuveli ni vaenzi ka mina.
24Lomu ka tiko gontlhe legi mu ta nga gi fumela, mu ta vumela a nwinyi wa simu ku gi tlhatlhisa.
25Loku a makabye wa wena a vumala, a xavisa a xipanzana xa simu gakwe, a muhlanguti wakwe loyi a nga xaka gakwe ga laha kusuhani, i tata tlhatlhisa a xipanze lexi xi xavisileko hi makabye wakwe.
26Kanilezi loku a nga hi na munhu wa ku xi tlhatlhisa, loku a zi kota ku ti lavela a xilo xi ringanako ku tlhatlhisa xipanzana lexo,
27yena i ta hlaya malembe laya ma hunzileko kusukela kuxaviseni kakwe, zonake i ta tlhelisa ka muxavi a mali leyi yi ringanako, na yena i ta tlhelela xipetsweni xakwe.
28Kanilezi loku a nga kumi a xilo xi ringanako ku tlhatlhisa xipanze xakwe, a xipanze lexo xi ta tshama mandleni ya muxavi kala ku chikela a lembe ga jubileu; xi ta tlhatlhiswa hi jubileu, zonake a muxavisi i ta tlhelela xipetsweni xakwe,
29Loku munhu a xavisa a yindlu leyi yi nga lomu mutini wu bhiyelweko, wa zi kota ku yi tlhatlhisa hi gona lembe lego a nga xavisa ha gona. A ntamu wakwe wa ku yi tlhatlhisa, ngwa lembe ginwe basi.
30Kanilezi loku gi mbhela a lembe gontlhe na yi nga se ku tlhatlhiswa a yindlu leyi yi nga lomu mutini wu bhiyelweko, yi tava ya loyi a yi xavileko ni zizukulwana zakwe kala kupinzuka; cima yi nga ta tlhatlhiswa hi jubileu.
31Kanilezi a tiyindlu ta miti leyi yi nga bhiyelwangiko, i kota yinwe ni masimu, ti nga tlhatlhiswa, ti tlhatlheka hi masiku ya jubileu.
32Kanilezi a miti ya vaLevi, ni tiyindlu leti ti nga lomu mitini yabye a malungelo ya ku tlhatlhisa tona ma ta tshama mandleni ya vaLevi wontihe masiku.
33Kasike loku a munwe wa vaLevi a xavile a yindlu leyi yi xavisilweko laha mutini wakwe, a yindlu leyo yi ta tlhatlhiswa hi jubileu; hakuva a tiyindlu ta miti ya vaLevi, hi yona tshomba yabye xikari ka vanana va ka Israeli.
34A masimu laya ma renzetekelako miti yabye ngha ma nga xaviswi, hakuva hi yona tshomba yabye kala kupinzuka.
35Loku a makabye wa wena a dzuka ave muvumali, ni loku a mbhelelwa hi ntamu wa ku tira, u ta mu hlayisa; hambu loku a hi muluveli, hambu loku a hi mufambi, u ta mu amukela a tshama ka wena.
36U nga lavi a bhinzu ka yena, hambu ni ku mu kalavela; kanilezi u ta chava Nungungulu wa wena, u tshama ni makabye wa wena. Mav. 28:8; Ezek. 18:8
37U nga mu lombi a mali ya wena hiku u ta bhinzula, hambu ku mu nyika zakuga hi ku fela ku engetelwa.
38Hi mina Jehova, Nungungulu wa nwina, loyi a mu humesileko tikweni ga le Gipite, kasi ku ta mu nyika a tiko ga Kanani, nziva Nungungulu wa nwina.
39Ni loku a makabye wa wena a dzuka ave muvumali, zonake a ti xavisa ka wena, u nga mu tirisi kota khumbi;
40i ta tshama ka wena a fanana ni xitiri ni nanza; a ku tirela kala ku chikela a lembe ga jubileu. Jer. 34:14
41Zonake i ta huma ka wena, zinwe ni vanana vakwe, i tlhatlhekile; i ta tlhelela ka va ka kabye, ni le tshombeni ya vararu vakwe.
42Hakuva va hi malanza ya mina, laya nzi ma humesileko tikweni ga le Gipite; a va na ku xaviswa kota lezi va xavisisako zona tikhumbi.
43U nga mu fumeli hi timbiti; u ta chava Nungungulu wa wena.
44A tikhumbi ta xinuna ni ta xisati, leti mu ta nga kuva nato, ti ta kumeka ka vamatiko lava mu gamekeneko navo; hi lomo mu ta nga xava kona a tikhumbi ta xinuna ni ta xisati.
45Hambu ka valuveli lava mu tshamileko navo, mu ta zi kota ku xava tikhumbi xikari ka vanana vabye, ni xikari ka mingango yabye leyi mu tshamileko nayo, na va hi vanana lava va belekilweko lomu tikweni ga nwina; va ta maha va nwina.
46Va tava tshomba leyi mu ta nga yi siya ka vana va nwina anzhako ka nwina, yiva tshomba yabye va va fumela; na nwina mu ta va tirisa wontihe masiku. Kanilezi loku va hi vamakabye va nwina a vanana va ka Israeli, mu nga va fumeli hi timbiti.
47Ni loku muluveli loyi a akileko ka wena na a fumile, kanilezi a makabye wa wena loyi a nga kusuhani na yena a hi xisiwana, zonake a ti xavisa ka muluveli loyi a akileko ka nwina, kutani ka munwe wa ngango wa muluveli;
48anzhako kakuva a ti xavisile, wa zi kota ku tlhatlhiswa; a munwe wa vamakabye vakwe wa zi kota ku mu tlhatlhisa.
49Hambu a nakulobye wa raru wakwe wa zi kota ku mu tlhatlhisa, hambu nʼwana wa nakulobye wa raru wakwe, hambu munwani wa xaka gakwe loye a nga nkhata munwe zinwe na yena, wa zi kota ku mu tlhatlhisa; kutani hi yena nwinyi loku a zi kota ku ti tlhatlhisa ha yece.
50Yena ni muxavi wakwe va ta ringanyisa kusukela a lembe legi a nga ti xavisa ha gona, kala ka lembe ga jubileu; a tsengo wa mali wu ta ringanyiswa hi ku hlaya malembe hi hakhelo ya xitiri.
51Loku ku sele malembe yo tala i ta humesa a mali leyi yi ringanako a malembe lawo, na kukari ku ringanyiswa a mali leyi a xabyilweko ha yona.
52Loku ku sele malembe matsongwani ku chikela ka lembe ga jubileu i ta hlayelana naye, zonake i ta humesa a mali ya ku ti tlhatlhisa ha yona hi ku ringanyisa a tsengo wa malembe.
53Yena i ta tshama naye kota xitiri lexi xi ti bohako ku tira hi lembe; ni nwinyi wakwe a nga dzuki a mu tirisa hi timbiti kuwoneni ka wena.
54Loku a nga tlhatlhiswi hi tindlela leti, i ta tlhatlheka hi lembe ga jubileu, yena ni vanana vakwe.
55Hakuva vanana va ka Israeli malanza ya mina; a malanza ya mina lawa nzi nga ma humesa tikweni ga le Gipite. Hi mina Jehova, Nungungulu wa wena.
Currently Selected:
Levi 25: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
