Mikosi 1
1
A makhombo ya Jerusalema.
1Hikuyini wu nga ni xiwunza a muti lowu wu nga tele hi vanhu!
Loyi a nga hi wahombe xikari ka mifumo i mahile noni;
Loyi a nga hi muzinza xikari ka matiko i mahile hlonga hikuyini?
2Wa rila ni wusiku, a mihloti yakwe yi xilila marameni yakwe;
Xikari ka ziranzwa zakwe zontlhe a ku na munwe a nga mu tangalisako.
A vanghana vakwe vontlhe va mu tsikile, va hunzukile va maha valala vakwe.
3Juda i yile matikweni hi kota ya kuxaniseka ni wunanza ga hombe;
I tshama xikari ka vamatiko, a nga kumi kurula;
A vaxanisi vakwe vontlhe va mu khamanyetile kubayisekeni kakwe.
4A magonzo ma yako Zioni ma rila, hakuva a nga kona a tako hlengeletanweni wa ximuse;
A ku na vanhu tinyangweni takwe, a vapristi vakwe va hefemuteka.
A vanhwana vakwe va xaniseka, yena wutsumbu i na ni xiviti.
5A vavengi vakwe va buma, ni valala vakwe va vuvuma;
Hakuva Jehova i mu rumile makhombo hi kota ya kutala ka zigoho zakwe.
A zivanana zakwe zi yile wukhumbini, na zi guliwa hi nala.
6A nhanyana wa Zioni i lahlekelwe hi wumbhuri gakwe gontlhe;
A tihosana takwe ti khwatsi timhuti ti nga hiko na wugelo,
Leti ti tsutsumako mahlweni ka muhlongoli na ti nga hi na ntamu.
7Masikwini ya hlomulo ni kuxaniseka Jerusalema wa alakanya
A makatekwa yakwe wontihe ya kale ka matiko;
Laha a vanhu vakwe va weleko canjeni ga nala, na ku nga hi na muvuni,
A valala va mu hleka, va mu tseketsela kuhahlukeni kakwe.
8Jerusalema i onhile nguvu, hi kwalaho i mahile manyalataniso;
Wa kanyiswa hi vontlhe lava va nga mu dzunza loku va wona wumbyiri gakwe.
Ina, wa hefemuteka, a tlhelela nzhako.
9A minzhungo ya tinguwo takwe yi wa hi ni chaka, a nga alakanyangi a magumo yakwe;
A kuwa kakwe ka rewukisa, a nga na mutangalisi.
Jehova, cuwuka a hlokiselelo wa mina, hakuva a nala wa ti kulisa.
10A nala i wutlile a makatekwa yakwe wontlhe,
I wonile vamatiko na va, enghena wutshanwini gakwe ga kubasa.
Lava u va aleleko a ku enghena hlengeletanweni wa wena. Deut. 23:3; Neh. 13:1; Ezek. 44:9
11A vanhu vakwe vontlhe va keta, va lava zakuga;
Va humesile titshomba tabye kasi va xava zakuga, kasi ku vuxa wutomi gabye.
Jehova, hi nga nzi wona, nzi mahile munhu wo nyenyeza.
12Xana a mu cheli kota ha zona, nwina vahunzi ke?
A ha nga cuwukani, mu wona loku ku hi kona kuxaniseka kunwani ko ringana ni loku ku nzi weleko,
Loku Jehova a nga nzi hlokisa ha kona hi siku ga khulo gakwe.
13I rumele a nzilo hi le hehla wuta marambyini ya mina, ma lobyiswa hi wona;
I dembele mikonzo ya mina a ziyo, a nzi tlhelisela nzhako;
I nzi nyikele kuonhekeni, nzi rereka siku gontlhe.
14A muyoka wa zihambunyeto za mina wu bohilwe hi canja gakwe,
Zi bohene khatiginwe nhanwini ya mina, a mbheta ntamu wa mina.
A Hosi yi nzi nyikele mandleni ya lava nzi nga zi kotiko kulwa navo.
15A Hosi a yi khatalelangi a tinhenha ta mina tontlhe,
I rambile a yimpi a ku ta hlasela a majaha ya mina.
A Hosi yi kanzihelele a nhanyana wa ka Juda khwatsi hi loku yi vuva vinya.
16Hi lezi zi nzi rilisako, mahlo ya mina ma halaka mihloti;
Hakuva a muchaveleli loyi a nga te ngha a vuxa moya wa mina i le kule.
A vana va mina va le kuxanisekeni hakuva a nala i hlulile.
17Zioni i nawulutile a mawoko yakwe, a nga kona a mu chavelelako;
Jehova i leletela a valala va Jakobe lezaku va mu renzelekela xikari;
Jerusalema i hunzukile manyalataniso ka vona.
18Jehova i lulamile, kanilezi nzi alile a zileletelo zakwe.
Zwanani nwina nwentlhe matiko, mu wona a kuxaniseka ka mina!
A vanhwana va mina ni majaha ya mina va yisilwe wukhumbini.
19Nzi vitanile a vanghana va mina, kanilezi va nzi kanganyisile;
A vapristi va mina ni masingalakati ya mina va lovile le mutini,
Na va kari va lava vakuga lezi zi nga hanyisako wutomi gabye.
20Jehova, languta a hlomulo wa mina, a moya wa mina wa karateka,
A mbilu ya mina yi hunzukile nzeni ka mina, hakuva nzi ti alisile;
Le handle a supado yi nzi dayela a vana va mina, te kaya kufa ntsena. Deut. 32:25; Isa. 16:11
21Va zwile lezaku nzi hefumuteka, kanilezi a nga kona ni munwe a nzi chavelelako;
A valala va mina vontlhe va zwile hi khombo ga mina, va tsakela lezi u zi mahileko;
Va ta fanana na mina loku ku chikele a siku legi u nga kanela ha gona.
22A kubiha kabye kontlhe a kute mahlweni ka wena,
U maha kabye kota lezi u mahileko ka mina hi kota ya zihambunyeto za mina zontlhe;
Hakuva nzi hefemuteka nguvu, ni mbilu ya mina yi na ni gome.
Currently Selected:
Mikosi 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
