Jeremia 52
52
A kuwa ka Jerusalema.
1Zedekia i wa hi ntangeni ya 21 wa malembe laha a nga sangula ku fuma; i lo fuma 11 wa malembe le Jerusalema. A vito ga mamani wakwe i wa hi. Hamutali a nʼwana wa Jeremia wa le Libna. 2 Tih. 24:18; 2 Kro. 36:11
2I lo maha kubiha mahlweni ka Jehova, a lanzela zontlhe a zimaho za Jehoiakimu.
3Hi kota ya zanga yakwe Jehova i lo hlongola Jerusalema na Juda mahlweni kakwe; zonake Zedekia i lo hluwuka a hosi ya le Babuloni.
4Hi lembe ga wuntlhanu ni mune ga kufuma kakwe, hi hweti ya wukhume a siku ga 10, Nebukadrezzare a hosi ya le Babuloni i lota zinwe ni yimpi yakwe yontlhe a ku ta vukela Jerusalema; Va aka makhokhola ma renzelekela muti matlhelo wontihe.
5Zinghaho a muti lowo wu lo vimbezelwa kala lembe ga wu 11 ga kufuma ka Zedekia.
6Hi hweti ya wumune a siku ga 9, ku wa hi ni ndlala ya hombe lomu mutini, laha kaku a vanhu va tiko va vumala zakuga.
7Zonake ku lo bhoxiwa a khurisi ga muti, vontlhe a vavanuna va yimpi va lo tsutsuma, va huma mutini ni wusiku hi ndlela ya nyangwa leyi yi nga xikari ka makhurisi mambiri, leyi yi nga kusuhani ni simu ga hosi; (a maKaldea ma wa renzelekela a muti matlhelweni wontihe.) A vapfowoli va lo famba hi ndlela yi komamako Araba.
8Kanilezi a yimpi ya maKaldea yi lo hlongorisa hosi Zedekia, va ya mu kamanyeta le livaleni la Jeriko; a yimpi yakwe yontlhe na yi panzanyekile yi mu siya.
9Zonake va lo khoma a hosi va yi yisa ka hosi ya le Babuloni le Ribla, a tikweni ga Hamate, a ya mu lamulela kona.
10A hosi ya le Babuloni yi lo daya a vana va Zedekia kuwoneni kakwe, a daya kambe ni tihosana ta ka Juda le Ribla.
11I lo xokola a mahlo ya Zedekia, a leletela lezaku va mu boha hi mangenje, a yisiwa le Babuloni, a ya hoxiwa lomu paxweni kala a siku ga kufa kakwe,
12Makunu hi hweti ya wuntlhanu a siku ga 10, gi nga hi lembe ga wu 19 ga kufuma ka Nebukadrezzare a hosi ya le Babuloni, Nebuzaradani a nduna ya vanyakasani lava va nga yimeletela a hosi ya le Babuloni, i lo enghena Jerusalema.
13I lo hisa a yindlu ya Jehova, ni yindlu ya hosi, ni tontlhe a tiyindlu ta lomu Jerusalema, nguvunguvu a tiyindlu leʼta hombe i lo ti hisa hi nzilo.
14A yimpi yontlhe ya maKaldea leyi a nduna ya vanyakasani yi nga hi nayo, yi lo khungumula makhurisi wontihe lawa ma nga bhiyele Jerusalema.
15Zonake Nebuzaradani a nduna ya vanyakasani i lo khomela zisiwana za tiko ni lava va nga sele lomu mutini, ni lava va nga ti nyikela ka hosi ya le Babuloni, ni vameseri lava va nga wa sele, a va yisa wukhumbini.
16Kanilezi Nebuzaradani a nduna ya vanyakasani i lo siya vanwani va vanhu lava va vumalako va tiko, a kuva vahlayisi va zivina ni varimi.
17A maKaldea ma lo fayetela a timhanze ta suku leti ti nga hi lomu ndlwini ya Jehova, ni zikhatelo, ni bimbi ga suku,, va teka a suku wa kona va famba nawo le Babuloni.
18Va teka ni timbita ni mafoxola, ni mikwana ni mikombe, ni tibasia, ni zontlhe a zibya zi mahilweko hi suku lezi va nga tira ha zona kukhozeleni.
19A nduna ya vanyakasani yi lo teka ni mingelo ya tibani, a timbita, ni timeza ta tikandiya, a mikombe, ni magombe: zontlhe lezi zi nga wa mahilwe hi nzalama ni siliva.
20A timhanze leʼta timbiri, ni bimbi, ni 12 wa tikuzi ta suku leti ti nga hi lahasi ka zikhatelo, lezi hosi Solomoni a nga zi mahela a yindlu ya Jehova, a suku wa kona wa zontlhe lezo a wu na nga pimiwa xikalwini. 1 Tih. 7:15
21A kuleha ka timhanze ku wa hi 18 wa mikono kada yinwe, a ngoti ya 12 wa mikono yi wa zi kota ku ti renzelekela. A kudziva ka tona ku wa hi mune wa titiho kada yinwe, a nzeni ka tona ku wa nga hi na nchumu.
22Ti wa hi ni tihloko ta suku hehla ka tona, a kutlakuka ka hloko yinwe ku wa hi ntlhanu wa mikono, na yi hi ni wukomelwa ni mapomegranada, zontlhe zi wa mahilwe hi suku. Hi wumbiri ga tona a timhanze ti wa mahile lezo.
23Ku wa hi ni 96 wa mapomegranada lomu mareveni, a ku patsa a mapomegranada wontihe lomu ka wukomelwa ma wa hi 100.
24A nduna ya vanyakasani yi lo khoma Seraia a mupristi wa hombe, na Zefania a mupristi wa wumbiri, ni vahlayisi vanharu va nyangwa.
25Ni lomu mutini i lo khoma a mutheniwa loye a nga hi nduna ya vanhu va yimpi, ni ntlhanu wa vavanuna ni vambiri ma nga manghanakana ya hosi, lava va nga kumiwa lomu mutini; ni matsalani wa nduna ya yimpi, loyi a ntiro wakwe ku nga hi ku hlomisa a vanhu va tiko, ni 60 wa vavanuna va tiko lava va nga kumilwe xikari ka muti.
26Nebuzaradani a nduna ya vanyakasani i lo va khoma a va yisa ka hosi ya le Babuloni le Ribla.
27A hosi ya le Babuloni yi lo va daya le Ribla lomu tikweni ga Hamate. Zinghaho Juda i lo khonwa tikweni gakwe a yiswa wukhumbini.
28A tsengo wa vanhu lava Nebukadrezzare a nga va khoma a va yisa wukhumbini hi lowu: Hi lembe ga wuntlhanu ni mambiri, 3,023 wa vaJuda;
29hi lembe ga wu 18 ga kufuma ka Nebukadrezzare, i lo khoma 832 wa vanhu va le Jerusalema;
30hi lembe ga 23 ga kufuma ka Nebukadrezzare, Nebuzaradani a nduna ya vanyakasani i lo khoma 745 wa vaJuda, a va yisa wukhumbini: a vanhu vontlhe va wa hi 4,600.
A kutlhutlhiwa ka Jehoiakinu.
31Hi lembe ga 37 ga wukhumbi ga Jehoiakinu a hosi ya ka Juda, hi hweti ya 12, hi siku ga 25 ga hweti. Evil-merodake a hosi ya le Babuloni, i lo mu tsetselela, a mu humesa lomu paxweni.
32I lo wulawula naye hi tipswalo, a mu nyika xitshamu xo tlakuka ku hunza a tihosi leti a nga hi zinwe nato le Babuloni.
33I lo mu tlhatlhisa a tinguwo takwe ta wuperesu, aga zakuga mahlweni ka hosi wontihe masiku ya kuhanya kakwe.
34Lezi a nga wa zi vumala i wa zi nyikiwa hi hosi ya le Babuloni, siku ni siku a nyikiwa xipanze kala siku ga kufa kakwe, a masiku wontihe ya kuhanya kakwe.
Currently Selected:
Jeremia 52: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
