Joxua 11
11
A yimpi ya le Dzongeni.
1Laha Jabina, a hosi ya le Hazora, a nga wa zwile timhaka leto, i lo rumela mitsumi ka Jobabe, a hosi ya le Madoni, ni ka hosi ya le Ximroni, ni ka hosi ya le Akxafa,
2ni ka tihosi ta le Nwalungu zitsungeni, ni le mikoveni hi Dzongeni ga Kinerota, ni le tikweni ga le tivaleni, ni le mitsurini ya Dore, hi le Mupela-gambo;
3ni ka maKanani ya le Mutsuwuka-gambo ni le Muhlwa-gambo, ni ka vaAmori, ni ka vaHiti, ni ka vaPerezi, ni ka vajebusi le zitsungeni, ni ka vaHivi hi lahasi ka Hermoni le tikweni ga Mizpa.
4Zonake ku lo tsombana leto tihosi zinwe ni tontlhe tiyimpi tabye, va wa tele nguvu khwatsi hi seke ga fungu wa bimbi, na va hi ni mahaxi ni tikareta to tala nguvu.
5Ni tontlhe leti tihosi ti wa tsombene wutshamu ginwe, zonake vontlhe va loya gova kusuhani ni mati ya le Merome, a kuva valwa ni va ka Israeli.
6Jehova a ku ngalo ka Joxua: U nga va chavi, hakuva manziko hi xona lexi xikhati, nzi ta va nyikela vontlhe va dawa mahlweni ka vaIsraeli. U ta tsema misiha ya milenge ya mahaxi yabye, u hisa tikareta tabye hi nzilo.
7Zinghaho Joxua ni vontlhe vanhu vakwe va hlomileko va lota va putsuketa kusuhani ni mati ya Merome, va va vukela.
8Na Jehova i lo va nyikela mandleni ya va ka Israeli, va lo va hlasela, va va hlongolisa kala le Sidoni ga hombe, ni le Misrefot-Maime, kala le minzhelelweni ya le Mizpa, hi le Mutsuwuka-gambo; va lo va hlasela va nga siyi ni munwe.
9Na Joxua i lo va maha khwatsi hi lezi Jehova a mu byelileko; i lo tsema misiha ya milenge ya mahaxi, a hisa tikareta tabye nzilweni.
10Ka xwalexo xikhati Joxua i lo engeta a khozisa Hazori, i lo daya a hosi ya kona hi tlhari, hakuva Hazori a kale ku wa hi zinza ga yontlhe mifumo leyi.
11Va lo daya hi tlhari vontlhe lava va nga wa hanya lomo ka wona, va va lovisa; cima a ku salangi ni nchumu xa lezi zi hefemulako; va lo hisa Hazori hi nzilo.
12Joxua i lo khozisa yontlhe miti ya tihosi leti, ni tihosi ta kona tontlhe i lo ti lovisa, a hihirita vanhu khwatsi hi lezi Mosi, a nanza ga Jehova, a nga wa leletele. Ekso. 23:32; Mitse. 33:52, 55
13Kanilezi a miti leyi yi nga wa akilwe lomu zitsungeni Israeli a nga hisangi ni munwe wa yona, ahandle ka lowu wa Hazori ntsena, lowu Joxua a nga wu hisa.
14Zonake a vanana va ka Israeli va lo avelana a muphango wontihe ni zifuyo, kanilezi va lo hihirita vontlhe vanhu va kala va va lovisa futsi, va nga siyi ni munhu munwe.
15Kota lezi Jehova a leleteleko Mosi, a nanza gakwe, Mosi i lo leletela zalezo ka Joxua, zonake Joxua i lo maha zalezo; a nga siyangi ni nchumu xa lezi Jehova a leleteleko Mosi.
16Joxua i lo teka gontlhe tiko legi ga mitsurana, ni gontlhe tlhelo ga le Dzongeni, ni tiko ga le Goxeni, ni gontlhe tiko legi gi nga lomu minzhelelweni, ni lomu ka tibala, ni lomu ka zitsunga za ka Israeli, ni tiko legi gi nga le minzhelelweni ya kona,
17kusukela xitsungeni xa Halake, lexi xi yimileko hi tlhelo ga le Seire, kala le Baal-Gadi, hi nkoveni wa le Lebanoni, hi lahasi ka xitsunga xa Hermoni; i lo khoma tontlhe tihosi ta kona a ti daya.
18Na Joxua i lolwa ni tihosi leti masiku yo tala. Ekso. 23:29; Deut. 7:22
19Ku wa nga bi kona muti wu nga wa kombela kurula ka vanana va ka Israeli, ahandle ka vaHivi lava va akileko le Gibeoni; va lo teka yontlhe miti hi kulwa.
20Hakuva zi wa mahiwa hi Jehova lezaku va nonohisa timbilu tabye a ku vukela Israeli, kasi Israeli a fela ku va lovisa, va nga va tsetsi, kanilezi va va lovisa khwatsi hi lezi Jehova a leleteleko Mosi.
21Ka xona lexo xikhati, Joxua i lota a ta lovisa va ka Anake va le xitsungeni xa Hebroni, ni le Debira, ni le Anabe, ni le matikweni wontihe ya mitsurana ya ka Juda, ni le matikweni wontihe ya mitsurana ya ka Israeli; Joxua i lo va lovisa zinwe ni miti yabye.
22Cima a ku salangi a munhu wa ka Anake lomu tikweni ga vanana va ka Israeli; ntsena lezaku a vanwani va sele le Gaza, ni Gati, ni le Axdodi.
23Zinghaho Joxua i lo khozisa tiko gontlhe, khwatsi hi lezi Jehova a wulileko ka Mosi; zonake Joxua i lo gi nyika ka va ka Israeli, gi maha tshomba yabye, i lo nyika ka nyangwa ni nyangwa kotisa kuavelwa kabye. Ni tiko gi lo humula kulwa.
Currently Selected:
Joxua 11: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
