Johani 14
14
Jesu a salisa vapizani.
1A timbilu ta nwina ngha ti nga karateki; kholwani ka Nungungulu, mu kholwa ka mina kambe. Xip. 16:22
2Le ndlwini ya Dadani gi kona wutshamu ginyingi; loku zi wa nga hi lezo, ngha nzi mu byelile; hakuva nza famba a ku ya mu longisela wutshamu. Xip. 13:33, 36
3Hambu loku nzi famba nzi ya mu longisela wutshamu, nzi ta wuya kambe, nzi ta mu teka muta ka mina; kasi laha nzi nga kona, mu fela kuva kona na nwinawu. Miti. 1:11; 1 Tes. 4:17
4Ni lomo nzi yako kona, ma yi tiva a ndlela.
5Tomasi aku kakwe: Hosi, a hi ku tivi lomo u yako kona; hi ta tivisa kuyini a ndlela ke?
6Jesu aku kakwe: Mina nzi ndlela, ni zinene, ni wutomi; a nga kona a tako ka Dadani, loku a ngati ha mina. Xip. 1:4; 8:32; 10:9; Maheb. 9:8
7Loku mu wa nzi tivile, ngha mu tivile ni Dadani kambe; a kusukela lezi ma mu tiva, mu mu wonile. Xip. 8:19
8Filipu aku ngalo kakwe: Hosi, hi wonise Dadani, zi ta hi enela.
9Jesu aku kakwe: Kale na nzi tshamile na nwina, kasi a ku nzi tivi ke, Filipu? Loyi a wonileko mina, i wonile ni Dadani: u wulawula hikuyini uku, hi wonise Dadani? Xip. 12:45; Kol. 1:15; Maheb. 1:3
10A ku kholwi lezaku mina nzi kona ka Dadani, ni Dadani i kona ka mina ke? A timhaka leti nzi ti wulawulako ka nwina, a nzi ti kaneti hi wutsumbu ganga; kanilezi hi Dadani a tshamileko ka mina a mahako mitiro yakwe. Xip. 5:19; 8:28; 10:38; 17:21, 23
11Kholwani hi mina lezaku nzi kona ka Dadani, ni Dadani ka mina; loku zi nge nghaho, kholwani ka mina hi kota ya yona mitiro.
12Hizinene nziku ka nwina: Loyi a kholwako ka mina, yenawu i ta maha mitiro leyi nzi yi mahako; ni mitiro ya hombe yo hunza leyi i ta yi maha, hakuva nziya ka Dadani. Mat. 21:21
13Ni xihi lexi mu ta nga xi kombela hi vito ga mina, nzi ta xi maha, lezaku Dadani i fela ku dumiswa ka Nʼwana. Mat. 7:7; Jak. 1:5; 1 Joh. 3:22
14Loku mu kombela xa nchumu hi vito ga mina, nzi ta xi maha.
Jesu a tsumbisa ku ruma Moya wa ku Basa.
15Loku mu nzi ranza, mu ta hlayisa milayo ya mina. 1 Joh. 5:3
16Nzi ta kombela ka Dadani, i ta mu nyika munwani Muyimeli, kasi a tshama na nwina kala kupinzuka, Xip. 16:7; Rom. 8:15
17wu nga Moya wa zinene, lowu tiko gi nga zi kotiko ku wu amukela; hakuva a gi wu woni, hambu ni ku wu tiva; kanilezi nwina ma wu tiva, hakuva wu tshama na nwina, wu ta tshama nzeni ka nwina. Xip. 16:13; 1 Kor. 2:14; 1 Joh. 2:27
18Nzi nga ta mu siya na mu hi zisiwana, nzi tata ka nwina. Mat. 28:20
19Ka ha hi xikhatanyana, zonake a tiko gi nga ta ha nzi wona; kanilezi nwina mu ta nzi wona, hakuva nza hanya, na nwina mu ta hanya. Xip. 16:16; 1 Kor. 15:20
20Hi lego siku mu ta zi tiva lezaku nzi kona ka Dadani, na nwina ka mina, na mina ka nwina.
21Loyi a nga ni milayo ya mina, a yi hlayisa, hi yena loyi a nzi ranzako; ni loyi a nzi ranzako, i ta ranziwa hi Dadani; na mina nzi ta mu ranza, nzi ta ti wonekisa ka yena. Mavesi 15, 23; 1 Joh. 5:3
22Judasi (na ku nga hi yena Iskarioti), aku kakwe: Hosi, u ta ti wonekisa kuyini ka hina, u nga ti wonekisi ka tiko ke? Lu. 6:16
23Jesu i lo mu hlamula, aku: Loku munhu a nzi ranza, i ta hlayisa timhaka ta mina; Dadani i ta mu ranza, zonake hi tata ka yena, hi tshama zinwe naye. 1 Joh. 2:24; Kuv. 3:20
24Loyi a nga nzi ranziko, a nga hlayisi timhaka ta mina; kasi a mhaka leyi mu yi zwako a hi ya mina, kanilezi nja Dadani loyi a nzi rumileko. Xip. 12:49
25A timhaka leti nzi ti kanele ka nwina, na nza ha hi na nwina.
26Kanilezi a Muyimeli, a nga Moya wa ku Basa, loyi Dadani a ta nga mu rumela hi vito ga mina, yena i ta mu gonzisa zontlhe, a mu alakanyisa zontlhe lezi nzi wulawulileko ka nwina. Lu. 24:49; Xip. 2:22; 16:13
27A kurula nza ku siya ka nwina; nza mu nyika a kurula ka mina; a nzi mu nyiki kota lezi gi nyikisako zona tiko. A timbilu ta nwina ngha ti nga karateki, hambu ni ku chava. Fil. 4:7; Kol. 3:15
28Mu zwile lezi nzi ngaku ngalo ka nwina: Nza famba, nzi tlhela nzi wuya ka nwina. Loku mu wa nzi ranza, mu wa ta tsaka hilezi nzi yako ka Dadani; hakuva Dadani ngwa hombe a ku hunza mina. Xip. 10:30; 16:16; Fil. 2:6
29Makunu nzi mu byelile na zi nga se ku maheka, kasi loku zi mahekile mu fela ku kholwa.
30Nzi nga ta ha wulawula nguvu na nwina, hakuva a hosana ya tiko yata; kanilezi a yi na nchumu ka mina, Xip. 12:31
31kanilezi zi maheka kasi tiko gi fela ku zi tiva lezaku nza mu ranza Dadani, ni lezaku nzi maha lezi Dadani a nzi layileko. Vukani, a hi sukeni laha. Xip. 10:18; Fil. 2:8
Currently Selected:
Johani 14: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.