Johani 13
13
Jesu a hlambisa mikonzo ya vapizani.
1A mubuzo wa Pasika na wu nga se va kona, Jesu na a zi tiva lezaku a xikhati xakwe xi chikele xa kuva a suka tikweni, aya ka Dadani, lezi a nga ranza a vanhu vakwe lava va nga laha misaveni, i lo va ranza kala kugumesa, Mat. 26:2; Xip. 11:1
2Kwalaho xilalelweni, Satani i wa sina a vekile mbilwini ya Judasi Iskarioti nʼwana Simoni, aku a mu tokometa. Lu. 22:3
3Jesu na a zi tiva ku ngalo, Dadani i wa vekile zilo zontlhe mandleni yakwe, niku i humele hi ka Nungungulu, iya ka Nungungulu, Mat. 11:27; Xip. 8:42; 16:28; Miti. 2:36; 1 Kor. 15:27; Maheb. 2:8
4I lo suka laha kugeni, a tlhatlha a nguwo yakwe; i lo teka tawula, a ti boha. Lu. 22:27; Fil. 2:7, 8
5Zonake i lo chela mati xibyeni, a sangula ku hlambisa vapizani mikonzo, a yi hlanguta hi tawula legi a nga ti bohile ha gona.
6Ata ni ka Simoni Pedro, loyi a ngaku ka yena: Hosi, wena u ta hlambisa mikonzo ya mina ke?
7Jesu i lo hlamula aku kakwe: Lezi mina nzi zi mahako a ku zi tivi makunu; kanilezi hi lenzhako u ta zi tiva. Vesi 12
8Pedro aku ka yena: Cima u nga ta hlambisa mina mikonzo. Jesu aku kakwe: Loku nzi nga ku hlambisi, a ku na xiavelo zinwe na mina.
9Simoni Pedro aku ngalo kakwe: Hosi, yi ngavi mikonzo ya mina ntsena, kanilezi ni mandla ni hloko.
10Jesu aku kakwe: Loyi a hlambileko, a za ha laveki sine ku hlamba mikonzo yakwe, hakuva i hlazekile wontihe miri; na nwina mu hlazekile, kanilezi a hi nwina nwentlhe. Xip. 15:3
11Hakuva i wa mu tiva loyi a wa ta nga mu tokometa, hikwalaho aku: A mu hlazekangi nwentlhe.
12Zonake loku a hlambisile mikonzo yabye, i lo boha nguwo yakwe, a tshama kugeni kambe, aku ngalo kabye: Ma zi tiva lezi nzi mu maheleko zona ke?
13Mu nzi vitana muku: Mugonzisi, ni Hosi; mu wula zona, hakuva hi mina yena. Mat. 23:8; Lu. 6:46; Fil. 2:11
14Makunu loku mina nzi nga Hosi ni Mugonzisi, nzi mu hlambisile mikonzo, na nwinawu mu fanele ku hlambisana mikonzo. Lu. 22:27; Rom. 12:10; Gal. 6:1, 2
15Hakuva nzi mu nyikile xikombiso, kasi na nwinawu ma fela ku maha kota lezi nzi mahileko ka nwina. Fil. 2:5; 1 Ped. 2:21; 1 Joh. 2:6
16Hizinene nziku ka nwina: A nanza a hi ga hombe ku hunza a hosi ya gona; ni ntsumi a hi wa hombe ku hunza loyi a wu rumileko. Mat. 10:24; Lu. 6:40
17Loku mu tiva a timhaka leti, mu katekile loku mu ti maha. Jak. 1:25
18A nzi wulawuli ha nwina nwentlhe; nza tiva lava nzi va hlawulileko; aku kasi wu fela ku tatiseka a mutsalo lowu wu nge ngalo: Loyi a gako zibaba za mina, i nzi tlakusele xirenze. Tis. 41:9; Mat. 26:23
19Nza mu byela lezi makunu, na zi nga se ku maheka, kasi loku zi mahekile, mu fela ku kholwa lezaku hi mina yena.
20Hizinene nziku ka nwina: Loye a amukelako loyi nzi mu rumako i amukela mina: ni loyi a nzi amukelako mina, i amukela loyi a nzi rumileko. Mat. 10:40; Lu. 10:16
Jesu a tivisa hi kunyikelwa kakwe.
21Laha Jesu na a wulile lezo, i wa karateka moyeni, a tiyisa aku: Hizinene nziku ka nwina, a munwe wa nwina i ta nzi tokometa. Mat. 26:21; Xip. 12:27; Miti. 1:17
22A vapizani va lo cuwukana, va kohlwa hi loyi a mu wulako.
23Kwalaho mezeni a munwe wa vapizani vakwe i wa khegele xifuveni xa Jesu, hi loyi Jesu a nga mu ranza. Xip. 19:26; 20:2
24Simoni Pedro i lo kweneta ka yena, aku kakwe: Hi byele loyi a wulako ha yena.
25Yena i lo khegela laha xifuveni xa Jesu, aku ka yena: Hosi, himani?
26Jesu i lo hlamula, aku: Hi loyi nzi ta nga peta a xikhemu, nzi mu nyika. Lezo na a petile xikhemu, i lo xi nyika ka Judasi, nʼwana Simoni Iskarioti.
27Laha na a amukele xikhemu, Satani i lo enghena kakwe. Jesu aku kakwe: Lezi u zi mahako, hatlisa u zi maha. Lu. 22:3; Xip. 6:70
28Ku wa nga hi na munhu laha mezeni loyi a nga zi tiva ku ngalo, a wula yini ka yena.
29Hakuva a vanwani va lo alakanya lezaku, lezi Judasi a nga khoma xikhwama, Jesu a mu byela ku, Xava lezi hi zi lavako mubuzweni, kutani ku ya nyika nchumu ka zisiwana. Xip. 12:6
30Zonake loku a tekile xikhemu i lo hatlisa a huma; gi wa hi wusiku.
A nayo muswa.
31Laha na a humele, Jesu aku ngalo: Makunu Nʼwana wa munhu i dumisilwe, na Nungungulu i dumisilwe ka yena; Xip. 12:23; 1 Ped. 4:11
32ni Nungungulu i ta mu dumisa a ka wutsumbu gakwe, i ta mu dumisa zalezi. Xip. 12:23; 17:1, 5
33Vana vanga, xikhati xi tsongwani na nza ha hi na nwina. Mu ta nzi lava; kanilezi lezi nzi nga wula ka vaJuda, nziku: Lomo nzi yako kona, a mu zi koti kuta; makunu nza wula lezo ka nwina. Xip. 7:34; 8:21
34Nza mu nyika a nayo muswa, wa kuva mu ranzana; khwatsi hilezi mina nzi mu ranzileko, na nwina ranzanani. Levi 19:18; Efe. 5:2; 1 Ped. 1:22
35Loku mu ranzana, a vanhu vontlhe va ta zi tiva lezaku mu vapizani va mina. 1 Joh. 2:5; 4:20
36Simoni Pedro aku ngalo kakwe: Hosi, uya kwihi? Jesu i lo hlamula, aku: Lomo nzi yako kona a ku zi koti ku nzi lanzela makunu; kanilezi anzhako u ta nzi lanzela. Xip. 21:18; 2 Ped. 1:14
37Pedro aku kakwe: Hosi, a nzi zi koti ku ku lanzela makunu hikuyini ke? Nzi ta tsika ni wutomi ga mina hi kota ya wena. Mat. 26:33; Mar. 14:29; Lu. 22:33
38Jesu i lo hlamula, aku: U ta tsika a wutomi ga wena hi kota ya mina ke? Hizinene nziku ka wena: A nkuku wu nga taba, u kala u nzi kaneta kunharu.
Currently Selected:
Johani 13: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.