Jeremia 49
49
A xiprofeto ha Amoni.
1Xungetano ni vana va Amoni, Jehova i ngalo: Israeli a nga na vana ke? a nga na xigatshomba ke? Hikuyini Malkamu a fumelako Gadi, a vanhu vakwe va tshama lomu mitini ya kona ke? 1 Tih. 11:5; Ezek. 21:28; Am. 1:13
2Hikwalaho masiku mata, ku wula Jehova, lawa nzi ta ngaba ha wona a nyiwo yo vukela Rabba wa vana va ka Amoni. I ta maha a nhulu ya marumbi, ni miti yakwe yi ta hiswa hi nzilo. Zonake Israeli i taga a tshomba ya lava va ngaga tshomba yakwe, ku wula Jehova.
3Bana huwa wena Hexboni, hakuva Ai i hahlulwe. Rilani nwina vanhanyana va Rabba, ambalani tinguwo ta tisakwa. Tlhavani nkosi, mu renzelekela lomu tigingisini, hakuva Malkamu i taya wukhumbini, zinwe ni vapristi vakwe ni tihosana takwe.
4Hikuyini u ti kukumukisako hi kota ya minkova, a nkova wa wena wu khulungako mati, wena nhwana u ti alisako? Wena loyi u tsumbako a titshomba ta wena, uku: Himani a ta ngata a ta nzi vukela ke?
5Nzi ta ku nehela hlenekera hi ka matlhelo wontihe, ku wula Hosi, Jehova wa tiyimpi; mu ta hangalaswa munwe, ni munwani ka tlhelo legi a nga ka gona, a nga kona loyi a ta nga tsombanyisa lava va tsutsumako.
6Kanilezi anzhako ka xikhati nzi ta tlhelisela a vana va ka Amoni lava va nga le wukhumbini, ku wula Jehova. A xiprofeto ha Edome.
7Xungetano ni ha Edome: Jehova wa tiyimpi i ngalo: Le Temani a ga ha hi kona wutlhari ke? A titlhari a ta ha hi na wusungukati ke? A wutlhari gabye gi mbhelile ke? Isa. 21:11; Ezek. 25:12; Am. 1:11
8Tlhelani, mu tsutsuma, mu ya tshama xihundleni, nwina vaaki va le Dedani; hakuva nzi ta nehela hlokiselelo Esau a xikhati nzi ta nga mu tsayisa.
9Loku a vakoleli ya mauva vata ka wena, va nga ta siya yo kutsula; loku makhamba mata ni wusiku ma ta onha kala ma eneliswa.
10Hakuva mina nzi runzuwulele Esau, nzi funungule a wuchavelo gakwe, a nga ta ha zi kota ku fihlala. A vana vakwe va lobyisilwe, ni vanakulobye, ni vaakelane vakwe, a nga ha hi kona.
11Siya a zisiwana za wena, nzi ta va hlayisa va hanya; ni tinoni ta wena a ti tsumba mina.
12Hakuva Jehova i ngalo: Lava va nga yimelwe hi ku kala va nganwi a gombe, va tanwa futsi. Hi wena loyi u to kala u nga tsayisiwi ke? U nga ta tsikiwa, u tanwa futsi. Mik. 4:21; 1 Ped. 4:17
13Hakuva nzi hlambanyile hi wutsumbu ganga, ku wula Jehova, lezaku Bozra gi ta hunzuka giva tiko ga xikhwakhwa, giva xiruko, gi hahluka, giva nzhukano; a miti yontlhe ya kona yi tava marumbi ya simasima.
14Nzi zwile mahungu hi ka Jehova, ni ntsumi wu runwilweko xikari ka matiko, wuku: Tsombanani mu mu vukela, yimani muiwa yimpi.
15Hakuva nzi ku mahile tsongwani xikari ka matiko, ni wo kanyiseka xikari ka vanhu.
16A kutshisa ka wena ni matshanza ya wena zi ku khohlisile, wena loyi u akileko lomu tihlohlolweni ta maribye, u tshamileko hehla ka xitsunga. Hambu loku u aka xisaka xa wena le hehla kukotisa a gama, nzi ta ku susa nzi ku releta lahasi, ku wula Jehova.
17Edome i ta hunzuluka a maha xirewukiso. Ni wihi a ta nga hunza ha kona i ta hlamala, aba noti hi ku wona a makhombo wontihe ya kona.
18Khwatsi hi kuhahlulwa ka Sodoma ni Gomora, ni miti ya kona ya lomu kusuhani, ku wula Jehova, ku nga ha aki munhu kona, ge hambu a nʼwana wa munhu a luvela kona. Gen. 19:24; Jer. 50:40
19Languta, i tata kota nghala yi humako hi lomu xihlahleni xa Jordani, yiya wugehveni go nyuka. Nzi ta mu hlongola xikanwe; ni wihi loye nzi mu hlawulako, nzi ta mu yimisa hehla ka gona. Hakuva himani a kotako mina? Himani a ta nga nzi yimisela xikhati ke? Himani murisi a ta nga tiya mahlweni ka mina ke?
20Hikwalaho zwanani a makungo ya Jehova, lawa a bohileko ha Edome, ni mixuvo yakwe leyi a xuvileko hi vaaki va le Temani. Futsi va ta rorovisela lava va tsongwani va tlhambi; ni wugelo gabye gi ta onhiwa zinwe navo.
21A misava ya rurumela hi guwa ga kuwa kabye; a kurila kabye ka zwakala ni le Bimbini go Pswhuka.
22Langutani, wata hi ku puruma kukotisa a gama, a tshambuluta a tipapa takwe a vukela Bozra. A siku lego a timbilu ta tinhenha ta le Edome ti ta fanana ni mbilu ya wasati loyi a lunwako.
A xiprofeto ha Damasku.
23Xungetano ni ha Damasku:
Hamate na Arpade va chelilwe tingana, hakuva va zwile a mahungu yo biha, va na ni gome; ku kona kukarateka le bimbini, a ku na kurula.
24Damasku i rerekile, i ti longisela ku tsutsuma, wa rurumela; i khomilwe hi kubayiseka ni kuxaniseka kukotisa a wasati loyi a lunwako.
25Hikuyini va nga kala ku wu tsika a muti lowu wu dumileko, a muti wa litsako la mina?
26Hikwalaho a majaha yakwe ma tawa maruweni yakwe, ni vanhu vakwe vontlhe va yimpi va ta mbhetwa hi siku lego, ku wula Jehova wa tiyimpi.
27Nzi ta dzivela a nzilo lomu khurisini ga Damasku, wu ta hisa a ziluvelo za Ben-hadade.
A xiprofeto ha Kedare na Hazora.
28Xungetano na Kedare ni matiko ya le Hazora, lawa Nebukadrezzare a hosi ya Babuloni a ma hlaseleko, Jehova i ngalo: Sukani mu kanziha muya Kedare, mu onha a vana va Muhuma-gambo.
29Va ta phanga matenda yabye ni mitlhambi yabye, va ta ti tekela a tinguwo tabye ni zibya zabye, ni makameli yabye; zonake va taba huwa kabye: Ka tshisa matlhelo wontihe.
30Tsutsumani muya kule, mu ya tshama xihundleni, nwina vaaki va le Hazora, ku wula Jehova, hakuva Nebukadrezzare a hosi ya le Babuloni i mu tsemele xikungo, i mu akele mano yo mu vukela.
31Sukani, muya tikweni legi gi nga kuruleni, gi tshamekileko, ku wula Jehova; a tiko gi nga hiko na tinyangwa hambu zikwinyaro, gi tshamileko gi hi gocb.
32Mu ta phanga a makameli yabye ni mitlhambi yabye ya hombe. Nzi ta va hangalasa matlhelo wontihe lava va cingileko a xifoko xa misisi yabye; nzi ta va nehela makhombo matlhelo wontihe, ku wula Jehova.
33Hazora gi tava wutshamu ga mahlolwa, giva xiwula kala kupinzuka. A ku na munhu a ta nga aka lomo, ge hambu a nʼwana wa munhu a ku luvela kona.
A xiprofeto ha Elami.
34A gezu ga Jehova legi gi ngata ka muprofeti Jeremia, xungetano na Elami, a kusanguleni ka kufuma ka Zedekia a hosi ya ka Juda, giku:
35Jehova wa tiyimpi i ngalo: Languta, nzi ta tshova a wura ga Elami, a ntamu wabye wa hombe.
36Nzi ta nehela Elami a mune wa timheho hi ka mune wa matlhelo ya tilo, nzi va hangalasa matlhelweni lawo wontihe; gi nga tava kona tiko legi a vatsutsumi va le Elami va to kala va nga chikeli.
37Nzi ta maha Elami a mbhela ntamu mahlweni ka valala vabye, a mahlweni ka lavo va hlotako wutomi gabye. Nzi ta va nehela khombo, yi nga zanga ya mina, ku wula Jehova. Nzi ta ruma a supado yi va lanzela kala vontlhe vaku bhi.
38Nzi ta yimisa a xitshamu xa mina xa wuhosi le Elami, nzi lovisa a tihosi ni tihosana ta kona, ku wula Jehova.
39Kanilezi a masikwini yo gumesa nzi ta tlhelisela Elami a vakhonwilweko vakwe, ku wula Jehova.
Currently Selected:
Jeremia 49: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
