Jeremia 48
48
A xiprofeto ha Moabi.
1Xungetano na Moabi, Jehova wa tiyimpi, a Nungungulu wa Israeli, i ngalo:
Khombo ka Nebo, hakuva i hahlulwe;
Kiriataime i wile tingana, i hlulilwe;
Misgaba i wile tingana, i khungumulwe.
2A wudumo ga Moabi a ga ha hi kona;
Le Hexboni va mu bohele xikungo, vaku:
Tanani, hi ta mu lovisa kasi a ngavi tiko.
Na wena Madmeni u ta dawa,
A supado yi ta ku lanzela.
3A tihuwa ti zwakala le Horona-ime,
Kuhahlulwa ni kulobyiswa ka hombe.
4Moabi i lobyisilwe,
Ka zwala a tihuwa ta vanana vakwe.
5Va kanziha Luhite na va kari va rila,
Ni laha nzhelelweni wa Horona-ime ka zwala kurila hi kota ya kuhahlulwa.
6Tsutsumani, mu ti ponisa,
Mu ku khwatsi mu xihlahla xo woma lomu xiwuleni.
7Hakuva kota lezi u tsumbako a mitiro ya wena,
Ni titshomba ta wena, wenawu u ta hluliwa.
Kemoxe i taya wukhumbini
Zinwe ni vapristi vakwe ni tihosana takwe. Mitse. 21:29; 1 Tih. 11:7
8A muhlaseli i ta enghena mitini yontlhe,
Ni munwe wu nga ta pona.
A nkova wu ta lova, ni livala li onhiwa,
Khwatsi hilezi Jehova a wulileko.
9Mu heni tipapa Moabi,
Lezaku a puruma a suka.
A miti yakwe yi tava marumbi,
Yi nga hi na muaki.
10I rukatelwe loyi a nga ni mihoni ntirweni wa Jehova,
I rukatelwe loyi a alisako a supado yakwe a nkhata.
11Moabi i tshamile kuruleni kusukela wusweni gakwe,
I tshamile hehla ka zisese zakwe,
A nga chululiwangi ka xibya ni xibya,
Ge hambu ku yiswa wukhumbini.
Hikwalaho a kunanziha kakwe wa ha hi nako,
Ni masema yakwe a ma hunzukangi.
12Hikwalaho, a masiku mata, Ku wula Jehova,
Lawa nzi ta nga mu rumela ha wona a vahalati,
Lava va ta nga mu byeketa;
Va ta halata a tifuko takwe,
Va faya a miphata yakwe.
13Moabi i tazwa tingana ha Kemoxe,
Khwatsi hi yindlu ya ka Israeli yi ngazwa tingana ha Beteli,
Loyi a nga hi kutsumba kabye.
14Mu wutisa kuyini muku: Hina hi tinhenha,
Hi tinghwazi ta yimpi?
15Moabi i hahlulwe, a miti yakwe yi tuvika a musi,
A majaha yakwe ma hlawulekako ma chikile maya kudaweni,
Ku wula Hosi leyi a vito ga yona a nga Jehova wa tiyimpi.
16A khombo ga Moabi gi laha kusuhani,
A hlokiselelo wakwe wuta hi xihatla.
17Mu rileni nwina lava mu mu ranzeleko,
Nwina lava mu tivako a vito gakwe;
Muku: Yi tshovekisile kuyini a nhonga leʼya ntamu,
A nhonga yo saseka?
18Wena nhwana u tshamako Diboni,
Chika wukosini ga wena, u tshama toreni;
Hakuva a muhlaseli wa Moabi i ku chikelele,
I khungumule a makhokhola ya wena.
19Wena muaki wa Aroera, yima laha ndleleni u languta;
U wutisa loyi a tsutsumako ni loyi a ponako,
Uku: Xini xi mahekileko?
20Moabi i chelilwe tingana, haku va i tshobyilwe.
Rilani, muba huwa.
Tiyisani Amoni lezaku Moabi i mahile marumbi.
21A kulamula ku tile le tikweni ga livala; ku tile le Holoni, ni le Jaza, ni le Mefaate;
22ni le Diboni, ni le Nebo, ni le Bet-Diblataime;
23ni le Kiriataime, ni le Bet-gamula, ni le Bet-meoni;
24ni le Keriote, ni le Bozra, ni lomu mitini yontlhe ya tiko ga Moabi, ya le kule ni ya kusuhani.
25A limhonzo la Moabi li tsenwilwe, a woko gakwe gi tshobyilwe, ku wula Jehova.
26Mu popiseni, hakuva i ti kulisile mahlweni ka Jehova.
Moabi i ta puluwunza mahlateni yakwe,
A maha xihlekiso na yenawu.
27Israeli a ku mu mahangi xihlekiso ke?
I lo kumiwa wukambeni lezi u ninginizako hloko
Loku u wulawula ha yena?
28Nwina vaaki lomu Moabi,
Humani mitini mu ya aka maribyeni;
Mu kotisa matuva ma akako zisaka laha nonwini wa khovo-khovo.
29Hi zwile hi matshanza ya Moabi laʼya hombe,
A kutikulisa kakwe ni matshanza yakwe,
Ni manyanga ya mbilu yakwe.
30Nza tiva a khulo gakwe, ku wula Jehova,
Lezaku a hi ga nchumu.
A kutikulisa kakwe a ku tirangi nchumu.
31Hikwalaho nzi ta mu rilela Moabi,
Nzi rilela tiko gontlhe ga Moabi.
Ku ta rilelwa a vanhu vontlhe va le Kir-heresi.
32Nzi ta ku rilela ku hunza a xirilo xa Jazeri,
Wena vina ga Sibma.
A maravi ya wena ma tlhatukile bimbi,
Kala ma ya chikela bimbini ga Jazeri.
A muhlaseli i wele mihanzweni ya wena ya ximumu
Ni le zivineni za wena.
33A kutsaka ni kunengela zi susilwe lomu masinwini,
Ni le tikweni ga Moabi.
Nzi mbhetisile a vinya lomu maphisweni;
A nga hi kona a to gi kamela hi tisimu,
A kuyimbelela ku tava tihuwa.
34A huwa ya le Hexboni yi zwala kala le Eleale,
Yi zwakala yi chikela ni le Jahazi,
Kusukela Zoari kala le Horona-ime ni le Eglat-xelixiya;
Na wona mati ya le Nimrimu ma tapshwa.
35Tlhatakumbiri, ku wula Jehova, Lomu Moabi nzi ta lovisa ni wihi a phahlelako matshanwini ma tlakukileko,
Ni loyi a hiseleko vanungungulu vakwe a tibani.
36Hikwalaho a mbilu ya mina ya vuma kota nanga hi kota ya Moabi, ni vanhu va le Kir-heresi. Hakuva lezi va nga zi hlengeletele zi lahlekile.
37Hakuva a tihloko tontlhe ti halulwe, ni malevu wontihe ma cingilwe; a mawoko wontihe ma cekelelwe, na va ambele tisakwa ziwunwini.
38Ku na ni xirilo hehla ka tontlhe tiyindlu ta Moabi ni lomu maruweni wontihe; hakuva nzi panzile Moabi kukotisa a xibya xi nga vuniko, ku wula Jehova. Jer. 22:28; Hos. 8:8
39Lezi a nga tshobyiswazona! A mahela yakwe tihuwa! Lezi Moabi a nga fularelisa zona hi tingana! Zinghaho Moabi i tava xihlekiso a tlhela a dzukisa lava va mu ranzeleko.
40Hakuva Jehova i ngalo: Munwe i ta puruma ku fana ni gama, a gwimbela Moabi a tipapa takwe.
41Keriote i hlulilwe, a makhokhola ma enghenilwe, ni timbilu ta tinhenha ta Moabi hi siku lego ti ta fanana ni mbilu ya wasati loyi a lunwako.
42Moabi i ta lobyiswa, a nga havi tiko, hakuva i ti kulisile mahlweni ka Jehova.
43A hlenekera, ni rinzi, ni ziyo zi rinzele wena muaki wa Moabi, ku wula Jehova.
44Loyi a tsutsumako hi kota ya hlenekera i ta wela rinzini; loyi a humako rinzini i ta phasiwa ziyweni. Hakuva Moabi nzi ta mu nehela a lembe ga kutsayiswa, ku wula Jehova.
45Lava va tsutsumileko va karele, va zumba nzhutini wa Hexboni;
Hakuva a nzilo wu humile le Hexboni,
Ni langavi gi humile xikari ka Sihoni,
Wu hisile a gwitsi ga Moabi,
Ni tihloko ta vana va madzolonga. Mitse. 21:28; 24:17
46Khombo ka wena Moabi!
A tiko ga Kemoxe gi lovile;
Hakuva a vafana ni vanhanyana va wena va yisilwe kukhonweni.
47Hambu lezo, nzi ta tlhelisela Moabi a vakhonwilweko vakwe masikwini ya kugumesa, ku wula Jehova. Loko hi kona a kulamulwa ka Moabi.
Currently Selected:
Jeremia 48: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
