Jeremia 19
19
A mbita yi fayekileka.
1Jehova i te ngalo: Famba ka muwumbi u ya ti xavela a mbita ya wumba; zonake teka a masingalakati yo kari ya tiko ni ya vapristi,
2huma uya nkoveni wa nʼwana wa Hinnome, kusuhani ni nyangwa ya Zirengele, u kanela seyo a timhaka nzi to ku byela.
3Uku: Zwanani a mhaka ya Jehova, nwina tihosi ta Juda, na nwina vaaki va Jerusalema; Jehova wa tiyimpi, a Nungungulu wa ka Israeli i ngalo: Langutani, nzi ta neha khombo wutshanwini legi, lego kani hi mani a to gizwa a tindleve takwe ti ta tinga. 1 Sam. 3:11; 2 Tih. 21:12
4Hakuva va nzi tsikile, va hanahanisa a wutshamu legi, hakuva lomu va hisile tibani ka vanwani vanungungulu, lavo va nga va tivangiko, vona ni vakoko vabye ni tihosi ta ka Juda; va tatisile legi wutshamu hi nkhata wa va nga hiko na nanzu;
5na va akele Baali a matshamu ma tlakukileko, kasi va hisa kona a vana vabye hi nzilo a kuva miphahlo yo hiswa ya Baali; lezi nzi nga va layangiko, hambu a ku va byela, ne ni ku zi alakanya.
6Hikwalaho a masiku ma tshinele, ku wula Jehova, lezaku legi wutshamu gi nga ta ha vitanwa ku Tofete, hambu kuva Nkova wa nʼwana wa Hinnome, kanilezi i Nkova wa Silaho.
7A ka legi wutshamu nzi ta hangalasa a makungo ya Juda ni ya Jerusalema; nzi ta va maha vawa hi supado ya valala vabye, hi mandla ya lava va hlotako wutomi gabye. A zirumbi zabye zi ta giwa hi tinyanyani ta tilo ni zihari za khwati.
8Nzi ta maha muti lowu wuva xirewukiso ni xiruko; wihi ni wihi a to hunza ha kona i ta rewuka le go kala aba noti hi ku hlamala hi kota ya wontihe a makhombo lawo.
9Nzi ta va maha vaga a nyama ya vana vabye va xinuna ni va xisati, munwe ni munwani i taga a nyama ya xaka gakwe a xikhatini xa kuvimbezelwa kabye ni kumanyiwa kabye, loku va ta nga ku wa tshidi hi valala lava va hlotako a wutomi gabye. Levi 26:29; Deut. 28:53; Lu. 19:43
10Zonake u ta faya a mbita mahlweni ka vanhu lava va nga ku pangalata,
11uku kabye; Jehova wa tiyimpi i ngalo: Nzi ta pswhandlasa legi tiko ni lowu muti, a ku fanana ni loku ku fayiwa a mbita ya muwumbi, yi nga ha zi kotiko ku tlhanganyisiwa kambe. Ku ta lahlelwa laho Tofete, hi ku vumala wutshamu ginwani.
12Hi lezo nzi to maha hi legi wutshamu, ku wula Jehova, ni ka vaaki va kona; nzi ta maha ku fanana ni Tofete.
13A tiyindlu ta Jerusalema, ni tiyindlu ta tihosi ta ka Juda, ti tava ni chaka kota a wutshamu ga Tofete, ti nga tiyindlu tontlhe leti ku hisilweko langweni ya tona a libani ka butho gontlhe ga tilo, laho va nyikeleko a minyikelo ya zakunwa ka vanwani vanungungulu.
14Zonake Jeremia i lo wuya hi le Tofete, laho Jehova a nga mu rumile ku ya profeta, i lo ta yima hubyeni ya yindlu ya ka Jehova, a byela vanhu vontlhe, aku:
15Jehova wa tiyimpi, a Nungungulu wa ka Israeli i ngalo: Nzi ta neha hehla ka muti lowu ni hehla ka zimitana za wona a makhombo wontihe lawa nzi phofuleko ha wona; hakuva va nonohisile a tinhamu tabye, kasi va ngazwi a timhaka ta mina.
Currently Selected:
Jeremia 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
