Jeremia 18
18
A muwumbi.
1Hi yona a mhaka leyi yi ngata ka Jeremia hi ka Jehova, yiku:
2Suka, u relela uya ndlwini ya muwumbi, nzi ta ku byela kona a timhaka ta mina.
3Nzi lo relela ndlwini ya muwumbi, i wa kari a tira ntiro wakwe hehla ka nghonghola.
4Laha a xibya lexi a muwumbi a nga xi maha hi wumba xi fayeka mandleni yakwe, yena i lo maha xinwani hi gwalego wumba, kota lezi a nga xuvisa zona muwumbi.
5Zonake a gezu ga Jehova gi lota ka mina, giku:
6Nwina yindlu ya ka Israeli, xana nzi nga ta zi kota ku maha ha nwina kukotisa muwumbi loyi ke? Languta, lezi a kota wumba gi nga lomu mandleni ya muwumbi, hizalezo nwina mu nga zona mandleni ya mina, yindlu ya ka Israeli. Isa. 45:9; Rom. 9:21
7A xikhati xo kari nzi nga wulawula nzi vukela a tiko ni mufumo, lezaku nzi ta wu tsuwula, ni ku khungumula ni ku wu lovisa;
8kanilezi loku a tiko legi nzi wulawulileko ha gona, gi hunzuluka kubiheni ka gona, minawu nzi ta hunzuluka nzi tsika a khombo legi nzi nga xuvile a ku gi mahela. Ezek. 18:21; Jona 3:10
9A ka xikhati xinwani nzi nga wulawula hi tiko go kari ni mufumo, lezaku nzi ta wu aka ni ku wu byala;
10kanilezi loku tiko legi gi maha kubiha mahlweni ka mina, gi nga ingisi a gezu ga mina, zonake nzi ta tsika a kusasa loku nzi nga xuvile a ku va mahela kona.
11Hikwalaho byela vavanuna va ka Juda ni vaaki va Jerusalema, uku: Jehova i ngalo: Mina nza mu longisela a khombo, nzi maha xikungo xo mu vukela. Hikwalaho hunzulukani munwe ni munwani a ndleleni yakwe yo biha, mu chukhwatisa a mahanyela ya nwina ni zimaho za nwina. 2 Tih. 17:13
12Kanilezi va ta hlamula, vaku: Wa ti karatela mahala, hi ta maha kuranza ka hina venyi, a munwe ni munwani i ta maha kota kunonoha ka mbilu yakwe yo biha.
13Hikwalaho Jehova i ngalo:
Wutisani xikari ka matiko loku a hi kona a nga ngazwa a zakunghahi.
A nhwana wa Israeli i mahile xilo xo tshisa nguvu.
14Xana a gapongo ya Lebanoni yi nga tsika a ribye ga nhova ke?
Kutani a mati yo titimela ma khulungako mata hi le kule ma ngapswha ke?
15Hakuva a vanhu va mina va nzi rivakelwe,
Va hisile libani ka zifananiso;
Zi va khunguvanyekisile tindleleni tabye, a mipfutleni ya kale,
Kasi va njenjereka ndleleni yo hambuka leyi yi nga bhoxiwangiko.
16Lezoke va maha tiko gabye giva xirewukiso,
Ni xiruko hi laʼku nga mbheliko;
Lezaku ni wihi a hunzako kona a hlamala,
A ziviza hloko yakwe.
17Ku fanana ni mheho ya Mutsuwuka-gambo nzi ta va hangalasa
Mahlweni ka valala vabye;
Hi siku ga kulobyiswa kabye
Nzi ta va fularela, nzi nga va kambi nghohe.
18Zonake vaku: Ngonani hi maba xikungo xo vukela Jeremia; hakuva a vapristi va nga ta tsanzeka ku hi nyika xiluleko, kutani tlhari ku hi nyika wusungukati, hi nyikwa magezu hi vaprofeti. Tanani, hi ya mu hika hi tirimi ta hina, hi nga khataleli timhaka takwe. Ezek. 7:26; Mal. 2:7
19Jehova, tiya ndleve ka mina, Uzwa a magezu ya valala va mina!
20Xana a zinene zi ta tlheliselwa hi kubiha ke?
Hakuva va kelile a nkele kasi ku hojometa a muhefemulo wa mina.
Alakanya lezaku nzi yimile mahlweni ka wena,
Kasi nzi va koxela zinene,
Ni ku tlhelisela kule na vona a khulo ga wena.
21Hikwalaho nyiketa vanana vabye ndlaleni,
U va hendleleta ku dawa hi supado;
Kasi a vasati vabye va felwa hi vanana, ni ku maha tinoni.
A vanuna vabye a va dayiwe hi ntungu.
Ni majaha yabye a ma dayiwe hi supado kulweni.
22A tihuwa a ti zwale tindlwini tabye
Gona siku u nehako a ntlawa wa vaphangi kabye hi xitshuketi;
Hakuva va kelile a rinzi go nzi hojometa kona.
Ni ku dembela mithlamu mikonzweni ya mina.
23Kanilezi wena Jehova wa gi tiva
A kungo gabye gontlhe go hlota ku nzi daya;
U nga tsetseleli a kubiha kabye, Hambu a ku vinya a xionho xabye mahlweni ka wena;
A va khunguvanyeka mahlweni ka wena,
Va mahele lezi xikhatini xa zanga ya wena.
Currently Selected:
Jeremia 18: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
