Isaya 47
47
A kuwa ka Babuloni.
1Chika, u tshama tshurini,
Wena nhwana, nʼwana Babuloni!
Tshama lahasi, a ku na xitshamu xa wuhosi,
Wena nhwana wa maKaldea;
Hakuva u nga ta ha vitanwa aku u nene niku u sasekile.
2Sila mapa laha xigayweni!
Tlhatlha veli ya wena,
U kunya nguwo ya wena u tlhatuka micongo.
3A wumbyiri ga wena gi ta funungulwe,
Ina, a tingana ta wena ti ta woniwa.
Nzi ta ti photela,
Nzi nga ta tsetselela munhu. Isa. 3:17; Nah. 3:5
4A Mutiruli wa hina a vito gakwe hi Jehova wa tiyimpi,
Loyi a Basileko wa ka Israeli.
5Tshama hasi u miyela,
U enghena munyameni, nhwana wa maKaldea!
Hakuva u nga ta ha vitanwa aku,
U Muzinza wa matiko.
6Nzi wa zangarele a tiko ga mina,
Nzi nyenyezisa a tshomba ya mina,
Nzi va nyikela mandleni ya wena.
A ku va mahelangi wuxinji;
U lo binzisa nguvu a muyoka wa wena hehla ka zikhosana.
7Wena u ngalo: Nzi tava muzinza kala kupinzuka.
A ku khatalelangi lezi zilo,
A ku alakanyangi lezaku zi ta mbhela. Kuv. 18:7
8Hikwalaho zwana lezi, wena loyi u ranzako ku ti tsakisa;
Wena loyi u tshamekileko:
Wena loyi unge mbilwini ya wena:
Hi mina nzoce, a ku na munwani,
Cima nzi nga ta kuva noni,
Hambu ku lahlekelwa hi vanana.
9Kanilezi a makhombo laya mambiri ma ta ku humela xikanwe hi siku ginwe:
U ta lahlekelwa hi vanana uva noni;
Zi ta wela ka wena hi kutikisilweko,
Hambu loku u hi ni mimbhulo yo tala ni wuloyi ga ntamu.
10Hakuva u ti tsumbile kubiheni ka wena, uku:
A nga kona a nzi wonako!
A wutlhari ga wena ni wutivi ga wena gi ku hambukisile.
Ute mbilwini ya wena:
Hi mina nzoce, a nga kona munwani.
11Hikwalaho a khombo gi ta ku wela,
U nga ta ku tiva lomu gi ta ngata ha kona.
U ta welwa hi mhango, u nga zi koti ku ti vikela;
A kulova ku ta ku wela hi xitshuketi
Na u nga tivi nchumu.
12Yima zalezi ni wutumbe ga wena ni mimbhulo yinyingi ya wena,
Leyi u yi tirileko kusukela wusweni ga wena,
Kutani zi ta ku vuna ku chavisa a valala va wena.
13U ti karatile hi kuya tinʼangeni tinyingi,
Lava va pimako hi matilo, ni laʼva cuwukako tinyeleti,
Ni lava va vumbako xikhatini xa hweti yiswa,
A va ku ponise ka lezi zi ta nga humelela ka wena.
14Langutani, va taku khwatsi i byanyi,
A nzilo wu ta va hisa;
Va nga ta ti ponisa ntanwini wa langavi.
A hi makhala yo ti kufumeta ha wona,
A hi nzilo wa ku wora.
15Va tava tano lava u lombileko wusungukati kabye,
Lava u bhinzuleko navo kusukela wusweni ga wena
Va ta hangalaka vaya matshanwini yabye,
A nga kona a ta nga ku ponisa!
Currently Selected:
Isaya 47: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
