Maheberu 7

A tshamela ga Melkizedeki.

1Melkizedeki loyi a nga hi hosi ya le Salema, tlhelo mupristi wa Nungungulu a nga Hehla-hehla, yena i lo tlhangana na Abrahama na a wuya hi le ko daya tihosi, a mu katekisa. Gen. 14:18

2Zonake Abrahama i lo mu pambulela a xipanze xa wukhume xa muphango wontihe. Loku ku tlhamuselwa a vito gakwe, a kuranga i wa hi Hosi ya kululama, ni kambe i Hosi ya le Salema, lezo hi ku ngalo: I Hosi ya kurula.

3A nga hi na dadani, a nga hi na mamani, a nga hi na lixaka, a nga hi na kusangula ka masiku, hambu ni kugumelwa ka kuhanya kakwe, kanilezi i fanana ni Nʼwana wa Nungungulu, a simamisa a hi mupristi kala kupinzuka.

4Makunu pimani lezaku i kulisile kuyini a munhu loyi Abrahama, a nyapanze wa hina, a nga mu pambulela a xipanze xa wukhume xa muphango. Gen. 14:20

5Hakunene a vana va Levi, lava va amukelako a xikhundla xa wupristi, va layilwe hi nayo a ku teka za wukhume ka vanhu, hi lezaku ka vamakabye vabye, hambu lezi vona va nga huma xiwunwini xa Abrahama. Mitse. 18:21, 26

6Kanilezi loyi a nga hiko wa lixaka labye i lo teka za wukhume ka Abrahama, a katekisa loye a nga hi ni zitsumhiso. Gen. 14:19; Rom. 4:13; Gal. 3:16

7Makunu a ku na ku kanetwa lezaku loyi tsongwani i katekiswa hi loyi wa hombe.

8Kwalaha lava va tekako za wukhume hi vanhu lava va fako, kanilezi leyo zi amukelwa hi munwe ku kustumunywako ha yena lezaku wa hanya.

9Kutani hi nga wula lezaku na yena Levi, loyi a tekako za wukhume, i humesile za wukhume ha yena Abrahama,

10hakuva i wa hi lomu xiwunwini xa kokwani wakwe laha a nga tlhangana na Melkizedeki.

11Makunu loku a kumbheleliswa ku kumeka hi wupristi ga va ka Levi (hakuva hi gona gi nga yimisa a milayo ya tiko), xana ku wa ha lavekela yini lezaku ku huma munwani mupristi hi tshamela ga Melkizedeki, loyi a ta nga kala a nga hlayelwi a tshamela ga Aroni ke? Gal. 2:21; Xip. 8:7

12Hakuva loku a wupristi gi hunzuluswa, ku la eka lezaku ku hunzuluswa ni nayo kambe.

13Hakuva loyi a timhaka leti ti wulawulwako ha yena ngwa limbe lixaka, lolu ku nga humangiko ka lona a munhu wo khozela alatini.

14Hakuva zi la su dlunya lezaku a Hosi ya hina yi humile lixakeni la ka Juda; a lixaka lolu Mosi a nga wulangiko nchumu ha lona hi tlhelo ga wupristi. Isa. 11:1; Mat. 1:3; Kuv. 5:5

15Lezo zi te dlunya nguvu loku ku huma munwani mupristi wo fanana na Melkizedeki,

16loyi a yimisilweko a kuva mupristi hi kota ya ntamu wa wutomi gi nga mbheliko, na ku nga hi kota ya nayo wa kulaya ka nyama.

17Hakuva ku kustumunyilwe ha yena ku ngalo:

Wena u mupristi kala kupinzuka,

Hi tshamela ga Melkizedeki. Tis. 110:4

18Hakuva a nayo wo ranga wu fuvisilwe hilezi a wu hi ni gome, wu nga vuni nchumu Rom. 8:3; Gal. 4:9

19(hakuva a nayo a wu mbhelelisangi nchumu), ku engheniswa a kutsumba ka chukwana, loku hi tshinelako ka Nungungulu ha kona. Miti. 13:39; Rom. 5:2; Xip. 6:18

20Kona a ku engheniswangi a handle ka kuhlambanya.

21Hakunene a vanwani va enghenisilwe xikhundleni xa wupristi a handle ka kuhlambanya, kanilezi yena i lo engheniswa hi kuhlambanya hi loyi a ngaku ngalo kakwe: A Hosi yi hlambanyile, yi nga ha ta hunzuluka, yite: Wena u mupristi kala kupinzuka. Tis. 110:4

22Hizalezo Jesu i mahile a mutiyisi wa xivumelwano xi nene ku hunza lexi xa kale:

23A vapristi vanwani va wa hi vanyingi, hakuva a va nga zi koti ku simamisa ntirweni wabye hi kota ya kufa;

24kanilezi yena, kota lezi a tshamako kala kupinzuka, a wupristi gakwe a gi na ku hunzulwa.

25Hi kota ya lezo i na ni ntamu wa ku hanyisa hi kumbheleleko vona lava va tshinelako ka Nungungulu ha yena, hakuva wa hanya xontlhe xikhati kasi ku va kombelela.

26Hakuva hi wa fanele a kuva ni mupristi wa hombe wa kunghahi, loyi a basileko, a nga hiko na nanzu ni zivi, a hambanyisilweko ni vaonhi, a tlakuselweko hehla ka matilo; Efe. 4:10

27loyi ku nga lavekiko kakwe lezaku masiku ni masiku a humesa miphahlelo ya zionho zakwe kuranga, a tlhela a humesela ya zionho za vanhu, khwatsi hi vanwani vapristi va hombe; hakuva lezo i lo zi maha kanwe ku enela, laha a nga ti nyikela wutsumbu gakwe. Levi 9:7; 16:15; Rom. 6:10

28Hakuva a nayo wu yimisa a vanhu lava va nga ni gome a kuva vapristi va hombe; kanilezi a mhaka ya kuhlambanya leyi yi ngata hi nzhako ka nayo, yi yimisa a Nʼwana a mbhelelisilweko kala kupinzuka.

Currently Selected:

Maheberu 7: TSC72

Highlight

Copy

Compare