Habakuka 3
3
A mukombelo wa Habakuka.
1A mukombelo wa muprofeti Habakuka, wu yimbelelwa zinwe ni zitende.
2Jehova, nzi zwile a mubiko wa wena, nzi wuya nzi chava!
Jehova, vuxa a ntiro wa wena xikari ka malembe lawa,
A xikari ka malembe lawa u ta wu tivekisa;
Alakanya ku hi hawukela zangeni ya wena.
3Nungungulu wata hi le Temani,
Loyi wa ku Basa wata hi le xitsungeni xa Parani. (Sela.)
A kungangamela kakwe ku fenengeta a matilo,
A misava yi tele hi kudumiswa kakwe. Ekso. 19:16; Deut. 33:2
4A kuhatima kakwe ku fanana ni ka gambo,
A miseve ya kuwonekela yata hi canjeni gakwe;
Hi kona wu fihlilweko a ntamu wakwe.
5A ntungu wa mu rangela mahlweni,
A kufa loku ku hisako ku mu lanza hi lenzhako.
6A yima a pima misava,
A cuwuka, a matiko ma rurumela;
A zitsunga za kale zi panzeka,
A miganga ya kaleloko yi korama;
Ti nga tindlela takwe ta kaleloko.
7Nza wona a matenda ya Kuxani na ma hlokiswa,
Ku rurumela ni matenda ya tiko ga Midiani.
8Jehova a nga tsanwiswa hi micongo ke?
U wa zangarela a micongo ke?
Kutani u zangarela a bimbi,
Lezi u khilelako a mahaxi ya wena,
U famba hi tikareta ta wena ta ku hanyisa?
9A wura ga wena gi le kubaseni;
A nkutsu wa wena wu tele hi tigalala. (Sela.)
U panzile misava hi micongo.
10A zitsunga za ku wona, zi chava;
Ku hunza a swinga wa mati.
A kueta ku zwata a gezu ga kona,
Ku tlakusa a mandla ya kona.
11A gambo ni hweti zi lo yima matshanwini ya zona,
Hi kota ya kuhatima ka tigalala ta wena loku ti hunza,
Ni kukwezima ka tlhari ga wena gi hatimako.
12U tsemakanya tiko hi zanga,
U hula mifumo hi khulo.
13U humela ku ponisa a tiko ga wena,
A ku hanyisa loyi a totilweko wa wena;
U faya a langwa la yindlu ya vakubiha,
U khungumula a yindlu kala xiseketelweni. (Sela.)
14Hi tigalala takwe u tlhavile a nduna ya tinhenha takwe,
Lava va tako khwatsi xipupuri a ku ta nzi hangalasa,
Na va bhuma khwatsi hi loku vaga a zisiwana kufihlaleni.
15U famba hehla ka bimbi hi ma haxi ya wena,
Hehla ka mabyandlati ya hombe.
16Nzi zi zwile, a mbilu ya mina yi rurumela,
Hi gezu lego a milomu ya mina yi dzudzumela;
Ku enghena kubola marambyini ya mina, na nzi kari nzi rurumela.
Nzi yimelwe hi ku rinzela a siku ga khombo,
A siku legi a tiko gi ta nga hlaselwa hi valala.
17Hambu lezo a kuwu wu to kala wu nga ha hluki,
Ge hambu a mivina a ku pswala mihanzu,
Ni mihanzu ya maoliva yi nga humi,
Ni masimu ma nga humesi zakuga;
Hambu loku tiyivu ti vumaleka rangeni,
Ni tihomu ti hi hava marangeni,
18Hambu zi hi tano, nzi ta tsakela Jehova,
Nzi tsakela a Nungungulu wa kuhanyiswa ka mina.
19Hosi Jehova hi yena a ntamu wa mina,
I ta hunzula a milenge ya mina yi fanana ni ya timhuti,
I ta nzi fambisa zitsungeni za mina. 2 Sam. 22:34
A ka muchuli, ku yimbelelwa ka zitende za mina.
Currently Selected:
Habakuka 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
