Va le Galatia 3
3
1Maphuphulu nzi nwina vaGalatia, mu kanganyisilwe hi mani, nwina lava Jesu Kristu a nga kombiswa ka nwina kubaseni kota loyi a belelweko? 1 Kor. 1:23; Xip. 5:7
2Nza ranza ku mu wutisa hi mhaka leyi ntsena: Xana mu amukele Moya hi mitiro ya nayo, kutani hi lezi mu nga ingisa mu tlhela mu kholwa ke? Miti. 2:38; Rom. 10:16; Maheb. 6:4
3Kasi mu maphuphulu ya kunghahi ke? Nwina lava mu nga sangula hi Moya mu ta mbhetisa hi za nyama ke? Xip. 4:9; Maheb. 7:16
4Xana mu xanisekele zilo zontlhe lezi mahala ke? Loku hakunene zi hi mahala! 2 Joh. 8
5Hikwalaho yena loyi a mu nyikako Moya, loyi a tirako zihlamaliso xikari ka nwina, i maha lezi hi mitiro ya nayo, kutani hi kuingisa ka ku kholwa ke? 2 Kor. 3:8
A xivumelwano xi nga mahiwa na Abrahama.
6Kota lezi Abrahama a nga kholwa Nungungulu, ku lo hlayelwa ka yena aku kululama.
7Hikwalaho tivani lezaku lava va nga va kukholwa, vona i vana va Abrahama. Joh. 8:39
8Khwatsi hilezi a mutsalo wu wonileko kale lezaku Nungungulu i ta hlayela a vamatiko kululama hi kukholwa, wu lo tivisa Abrahama a mahungu yo saseka hi mahlweni wuku: A matiko wontihe ma ta katekiswa ha wena. Gen. 12:3
9Hikwalaho lava va nga va kukholwa va katekiswa zinwe na Abrahama loyi a kholilweko.
10Hakuva vontlhe lava va tsumbako a mitiro ya nayo va lahasi ka nzhukano; hakuva ku tsalilwe ku ngalo: I rukatelwe mani na mani loyi a nga longoloxiko zilo zontlhe zi tsalilweko bhukwini ga nayo, a zi maha. Deut. 27:26; Jer. 11:3
11Makunu zi la su dlunya lezaku a ku na munhu a hlayelwako kululama mahlweni ka Nungungulu hi nayo, hakuva ku tsalilwe ku ngalo: Lava va lulamileko va ta hanya hi kukholwa. Hab. 2:4; Maheb. 10:38
12Kanilezi a nayo a wu humi kukholweni; ku tsalilwe ku ngalo: Loyi a mahako a zileletelo za mina i ta hanya ha zona. Levi 18:5; Rom. 4:4; 11:6
13Kristu i lo hi tirula ka nzhukano ya nayo, laha a nga mahiwa a nzhukano hi kota ya hina; hakuva ku tsalilwe ku ngalo: I rukatelwe mani na mani loyi a hayekilweko sinyeni, Deut. 21:23
14lezaku a xikatekiso xa Abrahama xi fela kuta ka vamatiko ha Jesu Kristu; lezaku hi amukela a xitsumbiso xa Moya hi kukholwa. Isa. 32:15; 44:3; Ezek. 36:27; Joeli 2:28; Rom. 4:9
15Vamakabye, nzi wulawula hi wulela ga vanhu: Hambu loku ku hi xivumelwano xa munhu ntsena, loku xi tiyisilwe a ku na munhu a xi vinyako, hambu ku xi engetela nchumu. Maheb. 9:17
16Makunu a zitsumhiso zi lo wuliwa ka Abrahama ni ka pswalo wakwe. A ku wuliwi ku ngalo: Ni ka vona lava va humako pswalweni wa wena, khwatsi hi loku ku wuliwa hi vanyingi, kanilezi khwatsi hi loku ku wuliwa hi munwe, ku ngalo: Ni ka pswalo wa wena, wu nga Kristu. Gen. 12:3, 7; 1 Kor. 12:12
17Makunu lezi nzi wulako hi lezi. A xivumelwano lexi xi tiyisilweko kale hi Nungungulu a xi na ku vinyiwa hi nayo, lowu wu tileko na ku hunzile 430 wa malembe, a wu na ku maha xitsumbiso xi nga hi na ntamu. Ekso. 12:40; Rom. 4:13, 14
18Hakuva loku a tshomba yi nyikiwa hi nayo, a ya ha nyikiwi hi kota ya xitsumbiso; kanilezi Nungungulu i yi nyikile ka Abrahama hi xitsumbiso. Rom. 4:14; 8:17
A ntiro wa nayo.
19Loku zi hi lezo, xini a nayo ke? Wu lo nyikiwa nzhako hi kota ya zihambuko, wu tira kala ku chikela a pswalo lowu a xitsumbiso xi nga tsumbisile ka wona; wu lo yimiswa hi tingelosi a canjeni ga mutlhanganyisi. Ekso. 20:19; Deut. 5:5; Joh. 15:22; Miti. 7:53; 1 Tim. 1:9
20Makunu a mutlhanganyisi a hi mutlhanganyisi wa munwe ntsena. Kanilezi Nungungulu munwe. Rom. 3:29
21Xana a nayo wu alana ni zitsumhiso za Nungungulu ke? Kokwihi, hakuva loku wu wa nyikilwe ka vanhu a nayo lowu wu zi kotako ku hanyisa, hakunene a kululama ngha ku tile hi nayo.
22Kanilezi a mutsalo wu valele zontlhe kuonheni, kasi lava va kholwako va nyikiwa a xitsumbiso hi kukholwa ka Jesu Kristu.
23Kanilezi na ku nga se ku chikela a kukholwa, hi lo wundliwa lahasi ka nayo, na hi rinzelwa a kukholwa loku ku nga ngha ku ta vululwa.
24Hizalezo a nayo wu mahile a mugonzisi wa hina wa ku hi yisa ka Kristu, lezaku hi fela ku hlayelwa kululama hi kukholwa. Mat. 5:17
25Kanilezi na ku chikele a kukholwa, a ha hi lahasi ka mugonzisi.
26Hakuva nwina nwentlhe mu varisanyana va Nungungulu hi kukholwa ka Kristu Jesu. Joh. 1:12
27Hakuva nwina nwentlhe lava mu nga bapatizelwa Kristu, mu ambele Kristu.
28A ka hi kona muJuda hambu muGreki, a ka hi kona khumbi hambu a tlhatlhekileko, a ka hi kona wanuna hambu wasati; hakuva nwina nwentlhe mu munwe ka Kristu Jesu. Joh. 10:16; 17:21; Rom. 10:12
29Loku nwina mu hi va ka Kristu mu pswalo wa Abrahama, mu zigatshomba hi kota va xitsumbiso. Gen. 21:10; Rom. 8:17; 9:7; Maheb. 11:18
Currently Selected:
Va le Galatia 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
