Ezekieli 8
8
A ku khozela zifananiso lomu tempeleni.
1Hi lembe ga wuntlhanu ni ginwe, hi hweti ya wuntlhanu ni yinwe, hi siku ga wuntlhanu ga hweti, laha nzi nga tshamile lomu ndlwini ya mina zinwe ni masingalakati ya ka Juda, a canja ga Hosi Jehova gi lo wela hehla ka mina.
2Nzi lo cuwuka nzi wona a nzilo na wu hi ni xiwumbeko xa munhu. Kusukela xiwunwini kuya hasi ku wa fanana ni nzilo, ni kusukela xiwunwini xakwe kuya hehla ku wa ngangamela ku fanana ni suku yi hatimako.
3I lo nawuluta xo khwatsi hi woko, a nzi khoma hi misisi ya mina, zonake a moya wu lo nzi tlakula ndengelengeni, wu nzi yisa Jerusalema hi miwoniso ya Nungungulu, a ka nyangwa ya le nzeni ya hubye, leyi yi ngomamako Nwalungu, laha ku nga hi ni xifananiso lexi xi vuxako kutsanwa ka Nungungulu. 2 Kro. 33:7, 15; Ezek. 3:12
4A kungangamela ka Nungungulu wa ka Israeli ku wa hi kona, kufanana ni muwoniso lowu nzi nga wu wona le koveni. Ezek. 3:12
5Aku ka mina: Nʼwana wa munhu, tlakusa a mahlo ya wena u cuwuka Nwalungu. Nzi lo tlakusa mahlo ya mina nzi cuwuka Nwalungu, nzi wona a xifananiso lexi xi vuxako kutsanwa ka Nungungulu laha nyangweni ya tlhelo ga Nwalungu ya alati. Ekso. 20:5; Deut. 32:16
6I te ngalo ka mina: Nʼwana wa munhu, wa zi wona lezi va mahako ke? Nja hombe a manyalataniso lawa a yindlu ya ka Israeli yi mahako laha, lezaku nzi fela ku Suka lomu ndlwini ya mina yo basa. Kanilezi wa ha ta wona a manwani manyalataniso ya hombe yo tlula lawa.
7I lo nzi neha laha nyangweni ya hubye; laha nzi nga cuwuka nzi lo wona a mole laha khurisini.
8Zonake aku ka mina: Nʼwana wa munhu, bhoxa khurisi. Loku nzi bhoxile khurisi, languta, ku wa hi ni nyangwa.
9Aku ka mina: Enghena u ya wona a manyalataniso yo biha lawa va mahako laha.
10Nzi lo enghena, nzi wona a zifananiso za tixakaxaka tinyingi ta zikokakoka ni zihari zo nyenyeza, ni zifananiso za vanungungulu va yindlu ya ka Israeli na zi tsaletelwe matlhelo wontihe laha makhurisini.
11Ku wa yimile mahlweni ka zona a 70 wa vavanuna, a masingalakati ya yindlu ya ka Israeli. Xikari kabye ku wa yimile Jaazania nʼwana Xafani; a munwe ni munwani i wa hi ni xibya xa mpepo lomu canjeni gakwe, ni masema ya musi wa mpepo ma lo tuvikela hehla. 2 Tih. 22:3
12Zonake aku ka mina:. Nʼwana wa munhu, wa zi wona lezi a masingalakati ya yindlu ya ka Israeli ma zi mahako lomu munyameni, munwe ni munwani lomu ndlwini yakwe ya zifananiso ke? Hakuva ve ngalo: Jehova a nga hi woni; Jehova i tsikile a tiko.
13Aku ka mina kambe: Wa ha ta wona kambe a manyalataniso ya hombe lawa va ma mahako.
14Zonake i lo nzi yisa nyangweni ya yindlu ya Jehova, leyi yi ngomamako Nwalungu. Languta, laho ku wa tshamile a vavasati na va rilela Tammuza.
15Aku ka mina: Nʼwana ma munhu, wa zi wona lezi ke? Wa ha ta wona manyalataniso ya hombe ku hunza lawa.
16I lo nzi yisa hubyeni ya lomu xikari ka yindlu ya ka Jehova. Languta, laha nyangweni ya tempeli ya Jehova, xikari ka nyangwa ni alati, ku wa hi ni Xipimo xa 25 wa vavanuna, na va fularele a tempeli ya Jehova, a tinghohe tabye na ti cuwukile Mutsuwuka-gambo, na va khozela a gambo hi tlhelo ga Mutsuwuka-gambo, 2 Tih. 23:5, 11
17Zonake i te ngalo ka mina: Nʼwana wa munhu, wa zi wona lezi ke? Xilo xo hehuka ka yindlu ya ka Juda a ku maha manyalataniso khwatsi hi lezi va zi mahako laha ke? Hakuva va tatile a tiko hi tihanyi, va tlhela va vuxa a zanga ya mina; languta, va tshineta a ravi tinhovini tabye.
18Hikwalaho minawu nzi ta va holovela. A tihlo ga mina gi nga ta va nyenyeletela, ge nzi nga ta va zwela wusiwana. Hambu loku va rila tindleveni ta mina hi gezu ga hombe, nzi nga ta va ingisa. Mav. 1:28; Jer. 11:11
Currently Selected:
Ezekieli 8: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
