Ezekieli 46
46
1Hosi Jehova i ngalo: A nyangwa ya hubye ya lomu xikari, leyi yi cuwukako tlhelo ga Mutsuwuka-gambo, yi ta valiwa a ka ntlhanu wa masiku ni ginwe ya ku tira; kanilezi hi siku ga sabado yi ta vululwe, ni siku a hweti yi wonekako yi ta vululwa.
2A hosana yi ta enghena hi ndlela ya ligumbagumba la nyangwa ya lehandle, a ya yima kusuhani ni mhanze ya nyangwa; loku yena a khizama laha xipimbitsini xa nyangwa a vapristi va ta nyikela a munyikelo wakwe wa kuhiswa ni wa kurula, zonake i ta huma. Kanilezi a nyangwa yi nga ta valiwa kala laha gambyeni.
3A vanhu va tiko va ta khizama laha livatini la nyangwa leyo mahlweni ka Jehova hi masiku ya sabado ni masiku ya hweti yiswa.
4A munyikelo wa kuhiswa lowu a hosana yi ta nga humesa ka Jehova hi siku ga sabado wu tava ntlhanu ni yinwe tiyivana ti nga hiko na vala, ni hamba yi nga hiko na vala.
5A munyikelo wa tinzhoho ku tava efa ginwe hi hamba yinwe, kanilezi a munyikelo wa tinzhoho wa tiyivana yi ta humesa kota lezi a zi ranzako; a wa mafura yi ta humesa a hini ginwe ka efa ginwe.
6Hi siku ya hweti yiswa yi ta humesa a honwana yi nga hiko na vala, ni ntlhanu wa tiyivana ni yinwe ni hamba yinwe, zi nga hiko na vala.
7Yi ta humesa a munyikelo wa tinzhoho, efa ginwe hi honwana yinwe, ni efa ginwe hi hamba yinwe, loku ti hi tiyivana yi ta maha lezi yi ta nga zi kota, zinwe ni hini ginwe ga mafura hi efa ginwe ni ginwani.
8Loku a hosana yi enghena, yi ta enghena hi ndlela ya ligumbagumba la nyangwa, yi tlhela yi huma hi yona ndlela ywaleyo.
9Kanilezi loku a vanhu va tiko vata mahlweni ka Jehova masikwini ya mibuzo, loyi a enghenako hi nyangwa ya tlhelo ga Nwalungu a ku ta khizama i ta huma hi nyangwa ya tlhelo ga Dzonga; ni loyi a enghenako hi nyangwa ya tlhelo ga Dzonga i ta huma hi nyangwa ya tlhelo ga Nwalungu. Va nga ta huma hi nyangwa leyi va enghenileko ha yona, va ta huma hi leyi yi cuwukeneko ni leyi va enghenileko ha yona.
10A hosana yi ta enghena zinwe navo, ni loku va huma, yi ta hunna navo.
11Lomu mibuzweni ni lomu zimuseni a munyikelo wa tinzhoho wu tava efa ginwe hi honwana yinwe, ni efa ginwe hi hamba yinwe; loku ti hi tiyivana yi ta nyika hi laha yi zi kotako; zinwe ni hini ginwe ga mafura ka efa ginwe ni ginwani.
12Loku a hosana yi humesa munyikelo hi ku zi ranza ka yona, na wu hi munyikelo wa kuhiswa kutani munyikelo wa kurula yi nga minyikelo ya kuranza ka yona ka Jehova, yi ta vululelwa a nyangwa ya tlhelo ga Mutsuwuka-gambo, zonake yi maha minyikelo ya yona ya kuhiswa ni ya kurula, khwatsi hilezi yi mahisako zona hi siku ga sabado. Zonake yi ta huma, a livati li valiwa loku yi humele.
13Siku ni siku u ta mahela Jehova a munyikelo wa kuhiswa hi yivana ya lembe ginwe yi nga hiko na vala; u ta wu maha mixo ni mixo. Ekso. 29:38; Mitse. 28:3
14Mixo ni mixo u ta nyikela zinwe na yona a munyikelo wa tinzhoho, a xipanze xa wuntlhanu ni xinwe xa efa ni xipanze xa wunharu xa hini ga mafura kasi ku xolovisa ha wona a tinzhoho. Lowu hi munyikelo wa zakuga ka Jehova wa xiyimiso xa simasima.
15A yivana yi ta nyikelisiswa lezo siku ni siku ni mixo, zive tano ni munyikelo wa tinzhoho ni wa mafura, hi wona munyikelo wa kuhiswa wa simasima.
16Hosi Jehova i ngalo: Loku a hosana yi nyika xinyikiwo ka munwe wa vana va yona, xi tava tshomba yakwe, xi ta lumba a vanana vakwe, xi tava xiavelo xabye xa tshomba.
17Kanilezi loku yi teka xipanze xa tshomba ya yona, yi nyika ginwe ga malanza ya yona, xi ta lumba a nanza lego kala ka lembe ga kutlhatlheka; zonake xi ta tlheliswa xiya ka hosana; hakuva i tshomba ya yona, yi lumba vana va yona. Levi 25:10; 27:24
18A hosana ngha yi nga teki a tshomba ya munhu hi ku mu hlongola ka lezi a nga nazo. Yi ta avela a vana va yona a tsomba leyi yi nga yakwe wutsumbu; kasi ku nga hlongolwi munhu ka lezi a nga nazo xikari ka vanhu va mina.
19Zonake i lo nzi enghenisa hi ndlela ya laha tlhelweni ga nyangwa, a nzi yisa lomu matsawini ya kubasa ya vapristi, lawa ma cuwukako tlhelo ga Nwalungu. Laho nzi lo wona a wutshamu hi le makutini ya tlhelo ga Mupela-gambo.
20Aku ka mina: Legi hi wutshamu a vapristi va ta nga bhikela kona a minyikelo ya milanzu ni ya kuonha, ni ya tinzhoho, kasi va nga humi nazo le hubyeni ya lahandle, zi ya basisa vanhu.
21Zonake i lo nzi yisa hubyeni ya lahandle, a nzi hunzisa hi ka mune wa magwitsi ya hubye; ka wontihe magwitsi ya hubye nzi lo wona a xihubyana.
22A ka magwitsi laya ya mune ya hubye ku wa hi ni zihubyana zi nga bhiyelwe, 40 wa mikono kuleha ni 30 wa mikono kuanama ka zona. A zihubyana lezi zi wa hi za mpimo munwe.
23A xinwe ni xinwani xi wa renzelekelwe hi ligingisi; ku wa mahilwe ni matshamu yo bhikela lahasi ka ligingisi a ka matlhelo wontihe.
24Zonake aku ka mina: Leti tiyindlu to bhikela, lomu a zitiri za yindlu zi ta nga bhikela kona a miphahlo ya vanhu.
Currently Selected:
Ezekieli 46: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
