Ezekieli 30
30
1A gezu ga Jehova gi lota ka mina kambe, giku:
2Nʼwana wa munhu, profeta uku: Hosi Jehova i ngalo: Rilani! Yowe, a siku lego!
3Hakuva a siku gi tshinele, gona a siku ga Hosi gi laha kusuhani, a siku ga madzuvi: xikhati xa vamatiko. Joeli 2:1; Zef. 1:14
4A supado yi tata hehla ka Gipite, ni miketo yi ta kuva kona le Etiopia, laha a va delweko va ta ngawa le Gipite. Ku ta tekiwa a zidlemo za gona, ni ziseketelo za gona zi ta khungumulwa.
5Etiopia, na Pute, na Lude, hi vontlhe vanhu va xangeleneko; na Kube, ni vanana va tiko ga xivumelwano, va ta dawa hi supado zinwe navo.
6Jehova i ngalo: Lava kambe va yimelako Gipite va tawa, ni matshanza ya ntamu wakwe ma ta mbhela. Kusukela Migdole kala Sevene a vanhu va ta dawa hi supado, ku wula Hosi Jehova.
7Va tava marumbi xikari ka matiko lawa ma nga marumbi, a miti yakwe yi tava xikari ka miti leyi yi hahlulweko.
8Va ta zi tiva lezaku hi mina Jehova, laha nzi ta nga dzivela a nzilo le Gipite, ni vavuni vakwe vontlhe va lobyisilwe.
9Hi siku lego ku ta huma mitsumi hi ka mina, yi famba hi mataru a ku ya dzukisa a maEtiopia a kutshamekeni kabye. Ku tava kona a kubayiseka hehla kabye hi siku lego ga Gipite; hakuva gona gata!
10Hosi Jehova i ngalo: Kambe nzi ta lovisa bhi a wunyingi ga maGipite hi canja ga Nebukadrezzare a hosi ya le Babuloni.
11Yena ni vanhu vakwe, a vanhu vo leva va le matikweni, va ta tisiwa ku ta lovisa a tiko. Va ta hlomula a tisupado tabye a ka Gipite, va tata a tiko hi zirumbi.
12Nzi ta maha micongo yipswha, nzi xavisa a tiko mandleni ya vanhu vo biha. Nzi ta gi hahlula ni zontlhe zi nga ka gona hi canja ga vamatiko; hi mina Jehova nzi zi wulileko.
13Hosi Jehova i ngalo: Kambe nzi ta khungumulela a zifananiso, nzi fuvisa a vanungungulu va hava tikweni ga Nofe; ku nga ha ta kuva kona ni hosana a tikweni ga Gipite, nzi ca chela hlanekera a tikweni ga Gipite.
14Patrosi nzi ta mu maha a rumbi, nzi hisa Zoane, nzi tsayisa a va le No.
15Nzi ta chulula a zanga ya mina hehla ka Sina, a khokhola ga le Gipite; nzi hihirita a xidlemo xa le No.
16Nzi ta dzivela a nzilo le Gipite; Sina i tava kuxanisekeni ka hombe nguvu, No i ta avanyeka, Nofe i ta putsuketwa hi valala ni hlikanhi.
17A majaha ya le Aveni ni ya le Pibesete ma ta dawa hi supado; ni va miti va ta yiswa wukhumbini.
18Le Tehafnehesi a hlikanhi wu ta phuma, laha nzi ta nga tshova a miyoka ya Gipite, ni matshanza ya ntamu wakwe ma ta mbhela; i ta fenengetwa hi refu, ni vanhwana vakwe va taya wukhumbini.
19Nzi ta lamulisa lezo xikari ka Gipite; na vona va ta zi tiva lezaku hi mina Jehova.
20Hi lembe ga wukhume ni ginwe, hi hweti yo sangula, hi siku ga wuntlhanu ni mambiri ga hweti, a gezu ga Jehova gi lota ka mina, giku:
21Nʼwana wa munhu, nzi tshovile a woko ga Faro a hosi ya le Gipite; languta, a gi bohelelwangi ni ku cheliwa muri, a gi tsonzelelwangi miceka kasi ku gi maha giva ni ntamu wo khoma a supado.
22Hikwalaho Hosi Jehova i ngalo: Nzi yimekelene na Faro a hosi ya le Gipite, nzi ta tshova mawoko yakwe, legi ga ntamu ni legi gi tshovekileko, nzi wisa a supado canjeni gakwe.
23Nzi ta hangalasa a maGipite xikari ka matiko, nzi ma xwanya le matikweni. 24Nzi ta tiyiseta a mawoko ya hosi ya le Babuloni, nzi veka supado ya mina canjeni gakwe; kanilezi nzi ta tshova a mawoko ya Faro, kasi a keta mahlweni kakwe a kufanana ni munhu loyi a tlhabyilweko.
25Nzi ta seketela a mawoko ya hosi ya le Babuloni, a mawoko ya Faro ma tawa. Vona va ta zi tiva lezaku hi mina Jehova laha nzi ta nga veka a supado ya mina canjeni ga hosi ya le Babuloni, a gi nawuluta hehla ka tiko ga Gipite.
26Nzi ta hangalasa a maGipite xikari ka matiko, nzi va xwanya le matikweni; va ta zi tiva lezaku hi mina Jehova.
Currently Selected:
Ezekieli 30: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
