Ezekieli 29
29
A xiprofeto ha Gipite.
1Hi lembe ga wukhume, hi hweti ya wukhume, hi siku ga wukhume ni mambiri, a gezu ga Jehova gi lota ka mina, giku:
2Nʼwana wa munhu, hunzuluka u cuwuka ka Faro a hosi ya le Gipite, u mu profetela yena ni tiko gontlhe ga Gipite.
3Kanela uku: Hosi Jehova i ngalo: Nzi yimekelene na wena Faro, hosi ya le Gipite, drako ga hombe gi etlelako lomu xikari ka micongo ya gona, gi nge ngalo: Lowu congo ngwa mina, nzi ti mahele wutsumbu ganga.
4Nzi ta ku vekela zimemba miblayeni ya wena, nzi maha a zidluwani za micongo ya wena zi namarela magwarwini ya wena; nzi ta ku humesa lomu xikari ka micongo ya wena, zinwe ni zidluwani zontlhe lezi zi namareleko magwarwini ya wena.
5Nzi ta ku hoxa xiwuleni, wena ni zidluwani za micongo ya wena, u ta wela lomu mafuzini; u nga ta tsomhanyiswa hambu ku rolelwa. Nzi ta ku nyikela akuva u giwa hi zihari za misava ni tinyanyani ta tilo.
6Vontlhe vaaki va tiko ga Gipite va ta zi tiva lezaku hi mina Jehova, hakuva va wa hi nhonga ya lihlanga a ka yindlu ya ka Israeli. 2 Tih. 18:21; Isa. 36:6
7Laha va nga ku khoma hi canja u lo tshoveka, u panza makatla yabye; ni loku va khegela ka wena u lo tshoveka, u va siya a ziwunu zabye na zi rurumela.
8Hikwalaho Hosi Jehova i ngalo: Nzi ta ku nehela supado, nzi hihirita vanhu ni zihari lomu ka wena.
9A tiko ga Gipite gi ta hahluka gi maha marumbi; va ta zi tiva lezaku hi mina Jehova; hakuva yena a teku: A congo ngwa mina, hi mina nzi wu mahileko.
10Hikwalaho nzi yimekelene na wena ni micongo ya wena; a tiko ga Gipite nzi ta gi hahlula nzi gi maha marumbi, kusukela le Migdole kala Sevene, le mbhinganweni wa Etiopia.
11Ku nga ta tsemakanyiwa hi nkonzo wa munhu, ni masonzo ya zifuyo ma nga ta hunza kona, ge hambu ku akiwa hi munhu kala anzhako ka 40 wa malembe.
12A tiko ga Gipite nzi ta gi maha a rumbi xikari ka matiko lawa ma nga marumbi, ni miti ya gona xikari ka miti leyi yi hahlulweko yi tava marumbi kala nzhako ka 40 wa malembe. Nzi ta hangalasa a maGipite le matikweni, va xwanyiwa matikweni manwani.
13Hakuva Hosi Jehova i ngalo: Anzhako ka 40 wa malembe nzi ta tsombanyisa a maGipite hi ka matiko lawa va hangalakileko ka wona;
14nzi ta wuyisa a maGipite lava va nga le wukhumbini, va tlhelela tikweni ga Patrosi, a tikweni gabye ga maheleko; vona va ta kuva mufumo lowu wu nga hiko na ntamu.
15Wu tava wu tsongwani nguvu xikari ka mifumo yontlhe, wu nga ta ha ti tlakusa hehla ka yinwani mifumo. Nzi ta wu hungula kasi wu nga ha fumeli manwani matiko.
16Wu nga ta ha tsumbiwa hi yindlu ya ka Israeli, hakuva wu ta va alakanyisa hi kuonha kabye laha va nga hunzulukela ka wona. Va ta zi tiva lezaku hi mina Hosi Jehova.
17Hi lembe ga 27, hi hweti yo sangula hi siku go sangula ga hweti, a gezu ga Jehova gi lota ka mina, giku:
18Nʼwana wa munhu, Nebukadrezzare a hosi ya le Babuloni, i rumile a yimpi yakwe ku tira a ntiro wo binza le Tire. A tihloko tontlhe ti lo kuluveka, ni makatla wontihe ma wa pswhomukile. Kanilezi yena ni yimpi yakwe a va kumangi hakhelo le Tire ya ntiro lowu va wu mahileko wa ku gi vukela.
19Hikwalaho Hosi Jehova i ngalo: Nzi ta nyikela a tiko ga Gipite ka Nebukadrezzare a hosi ya le Babuloni; i ta gotsa a zidlemo za kona, a teka ni muphango; lezo zi tava hakhelo ya yimpi yakwe.
20Nzi mu nyikile a tiko ga Gipite kota nzhiho wa ntiro lowu a nzi maheleko, hakuva va nzi tirele, ku wula Hosi Jehova.
21Hi siku lego a yindlu ya ka Israeli nzi ta yi milisela a limhonzo, nzi ku maha u vulula a nomu wa wena xikari ka vona; va ta zi tiva lezaku hi mina Jehova.
Currently Selected:
Ezekieli 29: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
