Ezekieli 23
23
A vamakabye vambiri, Ohola na Oholiba.
1A gezu ga Jehova gi lota ka mina kambe, giku:
2Nʼwana wa munhu, ku wa hi ni vavasati vambiri vo pswaliwa hi nyine munwe.
3Va lo maha wuoswi le Gipite; va lo maha wuoswi wunhanyaneni gabye, va khomakhomiwa mavele, va pswhinyingetelwa tihlofu na va hi vatsongwani.
4A mavito yabye, loyi wa nhonzwa hi Ohola, a nzisana hi Oholiba. Va lo maha va mina, va beleka vafana ni vanhanyana. A mavito lawa, Ohola hi Samaria, na Oholiba hi Jerusalema.
5Ohola i lo maha wuoswi na hi wa mina; i lo ranzana nguvu ni zigangu zakwe a maAssiria lava a akeleneko navo, 2 Tih. 15:19; 17:3
6va nga wa ambala a tinguwo ta wukuxe, a vafumeli ni vatongi, vontlhe va nga majaha ma ranzekako, a vakhileli va mahaxi.
7Wuoswini gakwe i lo ti nyikela nguvu ka vavanuna va hlawulekako xikari ka maAssiria vontlhe; a ti nyenyezisa hi vontlhe lava a va ranzako ni zontlhe zifananiso zabye.
8Ni wuoswi legi a nga gi maha ni va le Gipite a nga gi tsikengi; lava va nga wa etlela naye wunhanyaneni gakwe, va pswhinyingetela a tihlofu ta wuswa gakwe; va chulula a wubhayi gabye hehla kakwe.
9Hikwalaho nzi lo mu nyikela mandleni ya zigangu zakwe, a mandleni ya maAssiria va nga vona a nga va ranza nguvu.
10Va lo vumbulula a wumbyiri gakwe: va teka vafana ni vanhanyana vakwe, yena wutsumbu va lo mu daya hi supado. I lo maha a tsheketo xikari ka vavasati laha a nga lamuliwa ni ku tsayiswa.
11A makabye wakwe Oholiba i zi wonile, hambu zi hi tano, i lo hunzeleta a kubiheni ka kunavela kakwe, ni wuoswi gakwe legi gi nga tlula a wuoswi ga makabye wakwe.
12I lo ranza nguvu a maAssiria, a vafumeli ni vatongi va nga hi vaakelane vakwe, lava va nga ti bombisa khwatsi nguvu, a vakhileli va mahaxi, vontlhe va wa hi majaha ma hlawulekako. 2 Tih. 16:7
13Nzi lo wona lezaku i ti nyenyezisile; hi wumbiri gabye va wa hi va hanyela ginwe.
14I lo enzelekisa a wuoswi gakwe, hakuva laha a nga wona a zifananiso za vavanuna va maKaldea na zi tsalilwe laha khurisini hi penda yo pswhuka,
15na va bohile tifunga ziwunwini zabye, ni zihuku za mavalavala tihlokweni tabye, na va hi tihosana, zifananiso za vanhu va Babuloni le Kaldea, a tiko gabye ga maheleko,
16zalezo a nga va wona i lo va ranza, a rumela mitsumi kabye le Kaldea.
17A maBabuloni ma lota ka yena sangweni ga liranzo, va mu nyenyezisa hi wubhayi gabye; loku yena a ti nyenyezisile navo a moya wakwe wu lo swihala ha vona.
18I lo maha wuoswi gakwe kubaseni a vumbulula a wumbyiri gakwe; ni moya wa mina wu lo swihala ha yena, khwatsi hilezi wu nga swihala ni makabye wakwe.
19Kasike i lo enzelekisa a wuoswi gakwe na alakanya a masiku ya wuswa gakwe, a xikhati lexi a nga maha wuoswi le tikweni ga Gipite;
20a navela kambe a zigangu zakwe, lezi a nyama ya zona yi nga ku khwatsi i nyama ya timbongola, ni kuhiseka ka zona ku fanana ni ka mahaxi.
21Hilezo u lo khumbula a wubemba ga wuswa ga wena, laha a vaGipite va nga pswhinyingetela a tihlofu ta mavele ya wunhwana ga wena.
22Hikwalaho wena Oholiba, Hosi Jehova i ngalo: Languta, nzi ta ku vuxela a zigangu za wena, lezi u hambeneko nazo, nzi ta va tisa va ku vukela matlhelo wontihe:
23a maBabuloni, ni maKaldea wontihe, Pekode na Xoa na Koa, ni wontihe maAssiria, a majaha ma hlawulekako, a vafumeli ni vatongi vontlhe, a tihosana ni vanhu va dumileko, vontlhe na va khilele mahaxi.
24Va tata va ku vukela hi matlhari, ni tikareta ta yimpi, ni maranzani, ni xidlemo xa vanhu. Va ta ku ranzela matlhelo wontihe hi tingenge ni zitlhangu ni zihuku za xiketse; nzi ta va nyika ntamu ku ku lamula, va ku lamula hi lamulela gabye.
25Nzi ta ku vukela hi wukhuxu ga mina, nzi va maha va ku khoma hi tihanyi; va ta ku tsema a nhovu ni tindleve, ni misalela ya wena yi ta dawa hi supado. Va ta yisa kule a vafana va wena ni vanhwana va wena; ni misalela ya wena yi ta hiswa hi nzilo.
26Va ta ku runzuwulela a tinguwo ta wena, va ku tekela a wubombi ga wena go saseka. 27Zinghaho nzi ta ku maha u tsika a kubiha ga wena, a wubhayi ga wena ga le Gipite; u nga ta ha zi tlakusele mahlo, ge hambu ku alakanya Gipite kambe.
28Hakuva Hosi Jehova i ngalo: Nzi ta ku nyikela mandleni ya lava u va vengako, lava a moya wa wena wu hambeneko navo.
29Ya ta ku khoma hi tihanyi ta livengo, va susa a bhinzu ga mitiro ya wena, va ku siya na u hi ximbyiri u nga hi na nchumu; a wumbyiri ga wubhayi ga wena gi ta vumbululwa, a kubiha ka wena ni wubhayi ga wena.
30A zilo lezi zi ta maheka ka wena, hakuva u mahile wuoswi ni vamatiko u ti nyenyezisa hi zifananiso zabye.
31U fambile hi ndlela ya makwenu, hikwalaho nzi ta ku nyika a gombe gakwe.
32Hosi Jehova i ngalo: U tanwa hi gombe ga makwenu, legi go anama ni kueta; u tava xiruko ni xihlekiso, hakuva ga hombe.
33U ta popiwa u bayiseka hi gombe ga makwenu Samaria legi ga kuhahlula ni ku mahiwa marumbi.
34U ta gi minyeta, u tlhela u laza a zirengele za gona, u tlukulutela a mavele ya wena; hakuva mina nzi zi wulile, ku wula Hosi Jehova.
35Hikwalaho Hosi Jehova i ngalo: Kota lezi u nzi riveleko, u nzi fularela, hikwalaho u ta tsayiswa hi wuoswi ga wena ni wubhayi ga wena. 1 Tih. 14:9; Jer. 2:32; 3:21
36Jehova a engeta aku ka mina: Nʼwana wa munhu, u ta lamula Ohola na Oholiba ke? Loku zi hi lezo va tivisa a manyalataniso yabye.
37Hakuva va bhayile, a nkhata wu namarela mandleni yabye, va bhayile ni zifananiso zabye; ni vana vabye lava va nga nzi belekela, va va nyikele, a kuva kuga ka zona,
38Tlhatakumbiri va nyenyezisile a yindlu ya mina yo basa, va nyenyezisa ni masabado ya mina,
39hakuva a siku gwalego va nga wa dayele zifananiso a vana vabye, va lota ndlwini ya mina yo basa va ta yi nyenyezisa; hizalezo va nga mahisa zona ndlwini ya mina.
40Hehla ka lezo va vitanisile a vavanuna va le kule; loku mitsumi yi chikele kabye vona va lota, a vavanuna lava u nga hlamba hi kota ya vona, u penda mahlo ya wena, u ti bombisa hi zingwavila;
41zonake u lo tshama laha mubhedini wo saseka, na ku hi ni meza yi longisilweko mahlweni ka wona, laha u nga veka a libani la mina ni mafura ya mina.
42Ku lo zwala a guwa ga xidlemo xa vanhu va teku tinjha zinwe naye. Ku wa vitanilwe a vanhu va nyalidede va nga zidakwa za le xiwuleni. Va lo boha manayila mawokweni yabye ni zidlodlo zo saseka tihlokweni tabye.
43Zonake nziku ka wasati loyi a nga hi xibhayi xa kale: Ina yaloyi wa ha ta bhaya navo ke?
44Hakuva va lo enghena kakwe a kukotisa loku va enghena ka xibhayi; zinghaho va lo enghena ka Ohola na Oholiba, a vavasati va wuoswi.
45A vanhu va lulamileko va ta va lamula hi malamulelwa ya zibhayi ni malamulelwa ya vavasati laʼva halatako nkhata: hakuva vona zibhayi, ku na ni nkhata mandleni yabye. Gen. 9:6; Levi 20:10; Mitse. 35:31
46Hakuva Hosi Jehova i ngalo: Nzi ta va nehela a hlengeletano yi ta va vukela, nzi va nyikela a ku khomiwa hi tihanyi ni kuphangiweni.
47A hlengeletano leyi yi ta va gandla hi maribye, yi va daya hi supado; yi ta daya a vafana vabye ni vanhanyana vabye, va hisa tiyindlu tabye hi nzilo.
48Nzi ta fuvisisa lezo kontlhe kubiha lomu tikweni, kasi vontlhe vavasati va ta gonza a ku nga lanzeli a kubiha ka nwina.
49Va ta mu tlhelisela a kubiha ka nwina, mu tava ni nanzu wa zionho za zifananiso za nwina; zonake mu ta zi tiva lezaku hi mina Hosi Jehova,
Currently Selected:
Ezekieli 23: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
