Ezekieli 22
22
A muti wa nkhata.
1A gezu ga Jehova gi lota ka mina, giku:
2Nʼwana wa munhu, u ta lamula ke, u ta lamula a muti wa nkhata ke? Wu mahe wu tiva a manyalataniso wontihe ya wona.
3Uku: Hosi Jehova i ngalo: A muti wu halatako a nkhata xikari ka wona, kasi a xikhati xa wona xi fela kuta, wu ti mahela zifananiso kasi ku ti nyenyezisa ha zona! 2 Tih. 21:16
4U na ni nanzu hi nkhata lowu u wu halatileko; u ti nyenyezisile hi zifananiso lezi u zi mahileko; u tshinetile a magumo ya masiku ya wena ni ya malembe ya wena. Hikwalaho nzi ku mahile a xiruko xikari ka vamatiko ni xihlekiso xa matiko wontihe.
5Lava va nga kusuhi ni lava va nga le kule na wena va ta ku hleka, wena loyi u nga ni vito go biha, u teleko hi zolonga.
6Languta, yinwe ni yinwani ya tihosana ta ka Israeli yi wa halata nkhata lomu ka wena kukotisa a ntamu wa yona.
7Lomu ka wena a vararu ni vanyine va kanyiswa, a vamatiko va tsimbeketwa; lomu ka wena ku xaniswa lava va felweko ni tinoni.
8U kanyisile a zilo za mina za kubasa, u nyenyezisa a masabado ya mina.
9Xikari ka wena ku na ni lava va hlevako, lezaku ku ta ta halatiwa nkhata; lomu ka wena va gela zitsungeni; xikari ka wena va mahile wubemba.
10A ka wena va funungule a wumbyiri ga vararu vabye; a ka wena va etlela ni vavasati lava va nga xikhatini xo tsawuka. Levi 18:8, 19; 20:14, 18
11Ku mahiwa manyala ni sati wa muakelane, a vanwani va maha kubiha ni vakatamwane, a ka wena va wisa tingana a vamakabye va xisati, a vanhwana vo belekwa hi vararu vabye.
12A ka wena ka xavelelwa kasi ku halata nkhata, u pembisile kasi ku bhinzula, u kalavela a vaakelane hi ku wutla, u nzi rivakelwa, ku wula Hosi Jehova.
13Nzi phakatele a mandla ya mina hi zanga hi kota ya kukalavela ka wena, ni nkhata lowu wu halatilweko xikari ka wena.
14A mbilu ya wena yi ta tiya ke, kutani a mandla ya wena ma tava ni ntamu a masikwini lawa nzi: ta nga cuwukana na wena ke? Mina Jehova nzi zi wonile, nzi ta zi maha.
15Nzi ta ku hangalasa xikari ka vamatiko, nzi ku xwanya le matikweni; nzi ta fuvisa wontihe manyalataniso ya wena.
16A wutsumbu ga wena u ta nyenyeziswa mahlweni ka vamatiko, u ta zi tiva lezaku hi mina Jehova.
17A gezu ga Jehova gi lota ka mina, giku:
18Nʼwana wa munhu, a yindlu ya ka Israeli yi mahile manyelo ka mina; vontlhelele va hi suku ni lata ni xiketse ni tsovu ntsena lomu ka nzhimbo; va hi manyelo ya siliva. Isa. 1:22; Jer. 6:28
19Hikwalaho Hosi Jehova i ngalo: Khwatsi hilezi nwentlhe mu nga manyelo, nzi ta mu tsombanyisa lomu xikari ka Jerusalema.
20Kota lezi va wungeletelako a siliva ni suku ni xiketse ni tsovu lomu nzhimbyeni, va buvetela a nzilo hehla ka zona; kasi za nyeka; nzi ta mu wungeletelisawu zalezo a zangeni ya mina ni khulweni ga mina; nzi mu chela lomu nzhimbyeni mu nyeka.
21Ina, nzi ta mu wungeletela nzi buveta a nzilo wa zanga ya mina lahasi ka nwina, mu nyeka xikari ka wona.
22Mu ta nyekiswa xikari ka wona ku fanana ni siliva yi nyekiswako lomu nzhimbyeni; zonake mu ta zi tiva lezaku mina Jehova nzi chulule a zanga ya mina hehla ka nwina.
23A gezu ga Jehova gi lota ka mina, giku:
24Nʼwana wa munhu, wula ka Jerusalema, uku: Wena u tiko leʼgi nga basiswangiko, legigi nga tsakiswangiko hi vula sikwini ga zanga.
25Ku na ni gujeguje xikari ka vaprofeti va nga ka gona, khwatsi i nghala leyi yi dzumelako a pfimba. Vaga mihefemulo ya vanhu, va wutla titshomba ni zilo za lisima; va anzisa a tsengo wa tinoni xikari ka gona. Mika 3:11; Mar. 12:40
26A vaprofeti va gona va tlulile a nayo wa mina, va nyenyezisa a zilo za mina za kubasa. A va hambanyisi xikari ka leʼzo basa ni za nyalidede, ge hambu ku tivisa a vanhu a kuhambana ku nga xikari ka zilo zi basileko ni lezi zi nga basangiko. Va tsimba mahlo yabye kasi va nga woni a masabado ya mina, zonake nzi nyenyeziswa xikari kabye. Levi 10:10; Jer. 2:8; Zef. 3:4
27A tihosana ta gona ti khwatsi timhisi ti huhulukelako a pfimba xikari ka gona; ti halata nkhata, ti lovisa mihefemulo ya vanhu lezaku ti kuma bhinzu.
28A vaprofeti va kona va ti tota hi mhemba, va wona miwoniso ya hava, va ti vumbela mawunwa, vaku: Ku wula Hosi Jehova, kasi lezo Jehova a nga wulangi nchumu.
29A vanhu va tiko legi vatsimbeketi ni vaphangi; ina, va xanisa a zisiwana ni vavumali, va tsimbeketa a vamatiko ahandle ka fanelo.
30Nzi lavile a munhu xikari kabye loyi a ta nga bhiya lihlavu, a yima laha vangeni mahlweni ka mina a lwela tiko, lezaku nzi nga gi lovisi, kanilezi a nzi mu kumangi.
31Hikwalaho nzi ta chulula a zanga ya mina hehla kabye, nzi va lovisi hi nzilo wa khulo ga mina; nzi ta veka a nanzu wa zimaho zabye tihlokweni tabye, ku wula Hosi Jehova.
Currently Selected:
Ezekieli 22: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
