Ezekieli 18
18
Va khongotelwa a kuva va hunzuluka.
1A gezu ga Jehova gi lota ka mina kambe, giku:
2Hiyini mu wulako a vingu legi ha Israeli, muku: A vadadani va gile a mauva laʼmambisi, a meno ya vanana ma na ni wureremeti?
3Nza hlambanya hi kuhanya ka mina, ku wula Hosi Jehova, mu nga ta ha gi wula kambe lomu ka Israeli.
4Langutani, yontlhe mihefemulo nja mina; kota lezi a muhefemulo wa dadani wu nga wa mina, ni wa nʼwana kambe ngwa mina. A muhefemulo lowu wu onhako wu tafa. Gen. 18:25
5Kanilezi loku munhu a lulamile, a maha lezi zi nga za nayo ni nongameto,
6a nga geli le hehla ka zitsunga, ge hambu ku tlakusa a mahlo yakwe a cuwuka a zifananiso za yindlu ya ka Israeli, leyi a nga wisangiko tingana a sati wa muakelane wakwe, ge hambu ku tlhangana ni wasati loyi a nga xikhatini xo tsawuka;
7loyi a nga onhelangiko munhu, loyi a tlhelisileko a seve wa loyi a nga hi ni nanzu, loyi a nga wutliko nchumu, loyi a phamelako loyi a nga ni ndlala, a hanzulela loyi a nga ni wuna; Ekso. 22:26; Deut. 24:10; Mat. 25:35
8loyi a nga pembisiko hi ku bhinzula, loyi a canja gakwe gi nga enghenangiko kubiheni, a lamulako xikari ka vanhu hi nongameto;
9loyi a hlayisako milayo ya mina, a lanzela zileletelo za mina, a tsumbeka, yaloye i basile, hizinene i ta hanya, ku wula Hosi Jehova.
10Loku a pswala a mufana wa muphangi, a muhalati wa nkhata, kutani munwe a mahako zinwani za zontlhe lezi,
11loyi a nga fambiko hi tindlela ta raru wakwe, kanilezi a gela lomu zitsungeni, a wisa tingana a sati wa muakelane wakwe,
12a onhela a nyakeke ni muvumali, a phanga, loyi a, nga tlhelisangiko a seye, loyi a tlakusileko mahlo yakwe a cuwuka zifananiso, loyi a mahileko manyala,
13loyi a pembisileko hi ku bhinzula; a nʼwana loyi i ta hanya ke? A nga ta hanya. I tafa futsi, hakuva i mahile wontihe lawa manyalataniso, a nkhata wakwe wu tava hehla kakwe. Levi 20:9
14Kanilezi loku a pswalile a mufana loyi a wonako a zionho zontlhe lezi a zi mahileko raru wakwe, a zi chava kasi a nga zi mahi,
15a nga geli zitsungeni, hambu ku tlakusa a mahlo yakwe a cuwuka a zifananiso za yindlu ya ka Israeli, a nga wisi tingana a sati wa muakelane wakwe,
16a nga onheli munhu, loyi a nga tekiko seve hambu ku phanga, kanilezi a phamela loyi a nga ni ndlala, a hanzulela loyi a nga ni wuna,
17loyi a nga onheliko lava va vumalako, a nga pembisi hi ku bhinzula, a lanzela zileletelo za mina ni ku hlayisa milayo ya mina; yena a nga tafa hi kota ya zigoho za raru wakwe, i ta hanya futsi.
18A raru wakwe i tafa hi kota ya zigoho zakwe, hakuva i tsimbeketile vanhu hi tihanyi, a phanga nakulobye, a maha mitiro yi bihileko xikari ka vanhu va ka kabye.
19Nwina mu ngalo: Hikuyini a nʼwana a nga rwaliko a kugoha ka raru wakwe? Loku a nʼwana a mahile lezi zi nga za nayo ni nongameto, a hlayisa a milayo ya mina a yi maha, yena i ta hanya futsi.
20A muhefemulo, lowu wu onhako wu tafa; a nʼwana a nga ta rwala a kugoha ka raru wakwe, ge hambu raru ku rwala a kugoha ka nʼwana. A kululama ka loyi a lulamileko ku tava hehla kakwe, ni kubiha ka loyi a bihileko ku tava hehla ka yena, Deut. 24:16; 2 Tih. 14:6
21Kanilezi loku a wakubiha a hunzuluka a tsika zontlhe a zionho lezi a zi mahileko, a hlayisa yontlhe milayo ya mina, a famba hi nayo ni nongameto, hizinene i ta hanya, a ngafi.
22A nga ta hlayelwa ni xinwe xa zihambunyeto lezi a zi mahileko, i ta hanya hi kota ya kululama loku ai ku mahileko.
23Nzi wa ta tsakela a kufa ka loyi wa kubiha ke? ku wula Hosi Jehova, nzi nga tsakeli lezaku a hunzuluka ndleleni yakwe a hanya ke?
24Kanilezi loku a wakululama a tsika kululama kakwe a onha, a maha manyalataniso wontihe ya wakubiha, i ta hanya ke? A nga ta hlayelwa ni xinwe xa zimaho zi lulamileko lezi a zi mahileko. I tafa hi kota ya kuhluwuka kakwe ni zionho lezi a zi onhileko.
25Nwina muku: A ndlela ya Jehova a yi lulamangi. Zwanani nwina va yindlu ya ka Israeli! A yi lulamangi a ndlela ya mina ke? a hi leti ta nwina ti nga lulamangiko ke?
26Loku a wakululama a tsika kululama kakwe a onha, i ta fela kona, afa hi kota ya kugoha a ku mahileko.
27Kambe, loku a wakubiha a hunzuluka a tsika a kubiha loku a ku mahileko, a maha lezi zi nga za nayo ni nongameto, a muhefemulo wakwe wu ta hanya.
28Hakuva a ehleketako, a tsika zihambunyeto zakwe lezi a zi mahileko, hizinene i ta hanya, a ngafi.
29A yindlu ya ka Israeli yiku: A ndlela ya Jehova a yi lulamangi. Nwina va yindlu ya ka Israeli, A ti lulamangi a tindlela ta mina ke? a hi leti ta nwina ti nga lulamangiko ke?
30Hikwalaho nzi ta mu lamula, nwina va yindlu ya ka Israeli, munwe ni munwani kukotisa tindlela takwe, ku Wula Hosi Jehova. Wuyani, mu hunzuluka zihambunyetweni za nwina zontlhe, kasi a kugoha ka nwina ku nga mu lovisi.
31Cukumetani a zihambunyeto zontlhe za nwina lezi mu zi mahileko, mu ti kumela a mbilu yiswa ni moya muswa. Mu ta lova hikuyini, nwina va yindlu ya ka Israeli?
32Hakuva a nzi tsakeli a kufa ka loyi a lovako, ku wula Hosi Jehova. Hikwalaho hunzulukani, mu hanya.
Currently Selected:
Ezekieli 18: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
