Va le Efesusi 4
4
A ku mahiwa munwe hi Moya.
1Hikwalaho mina loyi nzi nga peresu Hosini, nza mu khongotela a kuva ni mafambela lawa ma faneleko a kuvitanwa loku mu nga vitanwa ha kona; Kol. 1:10
2muva ni kutikoramisa kontlhe, ni lihlaza-mbilu, mu timiselana hi liranzo, Gal. 5:22
3mu pinyamela a ku hlayisa a wunwe ga Moya hi xiboho xa kurula. Kol. 3:14
4Wu kona miri munwe ni Moya munwe, kota lezi mu nga vitanelwa a kutsumba kunwe laha mu nga vitanwa. Rom. 12:5
5A Hosi yinwe, a kukholwa kunwe, a kubapatiza kunwe, 1 Kor. 8:6; Maheb. 6:6
6ni Nungungulu munwe a nga Dadani wa vontlhe, loyi a nga hehla ka vontlhe, ni xikari ka vontlhe, ni ku tshama ka vontlhe. Tis. 83:18; Mal. 2:10; Rom. 11:36
7Kanilezi a tipswalo ti lo nyikiwa ka munwe ni munwani wa hina khwatsi hi lipimo la xinyikiwo xa Kristu.
8Hikwalaho ku tsalilwe ku ngalo:
Laha a nga tlakukela hehla i lo rangela vakhomiwa,
A nyika zinyikiwo ka vanhu. Tis. 68:18; Kol. 2:15
9Makunu lezi zaku: I lo tlakukela, zi wula yini loku ku nga hi lezaku i wa rangile a relela wutshanwini ga lahasi ka misava ke? Joh. 8:13
10Yena loyi a nga relela hi yaloye a nga tlakukela hehla ka matilo wontihe, lezaku a tatisa zilo zontlhe. Miti. 1:9; 1 Tim. 3:16; Maheb. 4:14; 7:26; 8:1; 9:24
11I lo nyika vanwani a kuva vapostoli, ni vanwani a kuva vaprofeti, ni vanwani a kuva vavangeli, ni vanwani a kuva varisi ni vagonzisi, 1 Kor. 12:28; Xip. 2:20
12kasi a vobasa va fela ku mbhelela ntirweni wa wurisi, ku akiwa a miri wa Kristu, 1 Kor. 14:26; Xip. 1:23; Kol. 1:24
13hi kala hina hontlhe hi chikela kuzwaneni ka kukholwa, ni ka ku tiva a Nʼwana wa Nungungulu, ni ka wudota gi mbheleleko, ni ka lipimo la xiyimo xi mbheleleko xa Kristu; Kol. 2:2
14lezaku hi nga ha mahi zihlangi, hi ndlengandlengiswa kukotisa mabyandlati ya bimbi hi timheho tontlhe ta tigonzo, kutani hi kukanganyisa ka vanhu, ni wumbyori gabye ga ku khohlisa. Mat. 11:7
15Kanilezi hi ta hlayisa zinene hi liranzo, hi kula zilweni zontlhe ka yena, loyi a nga hloko, yena Kristu,
16loyi a miri wakwe wontihe wu tlhanganyiswako khwatsi, ni ku tiyiswa hi xivuno lexi xi nyikwako hi xiro xinwe ni xinwani, wu kuma kukula hi ntamu lowu wu avelwako xiro xinwe ni xinwani, kasi wu akiwa hi liranzo. Kol. 2:19
Fambani kata vanana va kuwonekela.
17Nzi laya ni ku tiyisa Hosini, nziku: Ngha mu nga ha fambi kota vamatiko, lava va fambako maalakanyweni yabye ya hava,
18na va pfhupelisilwe kupimeni kabye, va hambene ni kuhanya ka Nungungulu hi kota ya kungativi loku ku nga kona xikari kabye, hi kota ya kunonoha ka timbilu tabye. Miti. 26:18; Gal. 4:8; Xip. 2:12; 1 Tes. 4:5
19Laha na va nga ha zi koti kuzwa va lo ti nyikela wurembini, va tira kungahlazeki kontlhe ku hunza mpimo. Rom. 1:24; 1 Tim. 4:2
20Kanilezi nwina a mu mu gonzangi kota lezo Kristu,
21loku mu mu zwile, mu gonziswa ka yena, kota lezi a zinene zi nga ka Jesu.
22Xungetano ni mahanyela ya nwina ya kale mu yimelwe hi ku ti tlhatlha ka munhu wa kale, loyi a onhekako hi kunavela ka kukhohlisa;
23kasi mu mahiwa laʼvaswa a moyeni wa kupima ka nwina, Rom. 12:2; 2 Kor. 2:10, 11; Kol. 3:10
24mu ambala munhu muswa, loyi a vangilweko ku fanana ni Nungungulu kululameni ni kubaseni ka zinene.
25Hikwalaho tsikani mawunwa, mu wulawula zinene munwe ni munwani ka waakelane wakwe, hakuva munwe ni munwani xiro ka vanwani.
26Zangarani, kanilezi mu nga onhi; ngha gambo gi nga peli na ma ha zangarile,
27ngha mu nga mu nyiki xikhati Satani. Jak. 4:7
28Ngha loyi a nga hi khamba a nga ha yivi kambe; kanilezi a ti karate a tira lezi zi sasekileko hi mandla yakwe, kasi a fela kuva nazo zo nyika loyi a vumalako.
29A kuwulawula ko nyenyeza ngha ku nga humi milonwini ya nwina, sine timhaka ta zinene ta ku vunetela laha ku lavekako, lezaku tiva xikatekiso ka lava va ingisako.
30Mu nga vangeli wusiwana a Moya wa ku Basa wa Nungungulu, lowu mu nga fungiwa ha wona hi kota ya siku ga kutirulwa. Isa. 63:10; Rom. 8:23
31A titsheku tontlhe, ni khulo, ni zanga, ni guwa, ni wuxezi, ngha zi suswa ka nwina, zinwe ni mona wontihe.
32Ngha mu hi ni wunene ka munwe ni munwani, mu zwelana wusiwana, ni ku tsetselelana, kota lezi Nungungulu kambe a nga mu tsetselela ha Kristu.
Currently Selected:
Va le Efesusi 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
