Deuteronome 9
9
1Ingisa Israeli! Inyamutlha u ta tlhatuka Jordani, uya enghena u khozisa matiko lawa ma ku hunzako hi wukulu ni ntamu, ni miti ya hombe yi nga ni makhokhola ma chikelako tilweni,
2ni vanhu vo tala vo leha, a vanana va ka Anake lava u va tivako, lava u zwileko wudumo gabye, lezaku: Himani a ta nga tiya mahlweni ka vanana va ka Anake ke?
3Zi tive inyamutlha lezaku Jehova Nungungulu wa wena hi yena a ta nga tlhatuka zinwe na wena, na a famba mahlweni ka wena khwatsi hi nzilo lowu wu hisako; hi yena a ta nga va lovisa, a va koramisa mahlweni ka wena; zonake wena u ta va hlasela u va lovisa vontlhe hi xihatla khwatsi hi lezi Nungungulu a ku byelileko. Maheb. 12:29
4Laha Jehova Nungungulu wa wena a ta ngava a hlongole valala va wena, u nga wuli mbilwini ya wena, uku: Jehova i nzi fumisile ka tiko legi hi kota ya kululama ka mina; hakuva Jehova i hlongola lawa matiko hi kota ya kubiha ka wona.
5A ku engheni ku ti tekela a tiko gabye hi kota ya kululama ka wena ni wunene ga mbilu ya wena, kanilezi Jehova Nungungulu wa nwina i hlongola matiko lawa mahlweni ka wena hi kota ya kubiha ka wona, ni lezaku a fela ku tiyisa a gezu legi Jehova a hlambanyileko ka vararu va wena, Abrahama na Isaka na Jakobe.
6Hikwalaho tiva lezaku Jehova a nga ku nyiki a tiko legi go saseka ku gi fumela hi kota ya kululama ka wena, hakuva wena u tiko ga vanhu va tinhamu to nonoha.
7Alakanya, u nga rivali lezaku u zangarisile kuyini Jehova Nungungulu wa nwina le xiwuleni; nwina mu vukele Jehova kusukela a siku lego a ku humesileko tikweni ga le Gipite, kala mu chikela ka legi wutshamu, Ekso. 14:11; Mitse. 11:4; Tis. 95:10
8hambu le Horebe nwina mu lo zangarisa Jehova, lezaku Jehova a zangara a lava ku mu lovisa.
9Laha nzi nga wa kanzihile xitsungeni ku ya amukela a timbila ta maribye, ti nga tona timbila ta xivumelwano lexi Jehova a nga xi maha zinwe na nwina, nzi lo tshama xitsungeni 40 wa masiku ni 40 wa wusiku, na nzi ngagi zakuga, na nzi nganwi mati.
10Zonake Jehova i lo nzi nyika a timbila timbiri ta maribye, ku tsalilweko ka tona hi litiho la Nungungulu; a ka tona ku wa tsalilwe a timhaka tontlhe leti Jehova a mu byelileko xitsungeni, na a hi lomu nzilweni a siku lego ga tlhangano.
11Laha na ku mbhelile 40 wa masiku ni 40 wa wusiku, Jehova i lo nzi nyika a timbila leti timbiri ta maribye, ti nga timbila ta xivumelwano.
12Jehova i te ngalo ka mina: Suka, u hatlisa u relela, hakuva a vanhu va wena lava u va humesileko le Gipite va onhile; va hatlisile ku hambuka a ndleleni leyi nzi va leleteleko yona; va ti mahele xifananiso xi chululweko. Ekso. 32:7
13Na Jehova i lo engeta aku ngalo: Nzi wonile lezaku lava vanhu va na ni tinhamu to nonoha.
14Nzi tsike nzi va lovisa, nzi fuvisa a vito gabye lahasi ka tilo; nzi ta ku maha uva tiko ga hombe gi nga ni ntamu ku hunza vanhu lava.
15Nzi lo tlhela nzi relela hi le xitsungeni, a xitsunga xontlhe na xi vura hi nzilo; nzi wa hi ni timbila leti timbiri ta xivumelwano lomu mandleni ya mina.
16Nzi lo wona lezaku mu wa onhile ka Jehova Nungungulu wa nwina; mu wa ti mahele a role gi chululweko. Mu lo hambuka hi kuhatlisa ka ndlela leyi Jehova a mu leleteleko yona.
17Zonake nzi lo teka a timbila leti timbiri, nzi ti cukunyeta hi mandla ya mina, nzi ti faya kuwoneni ka nwina.
18Zonake nzi lowa lahasi mahlweni ka Jehova, 40 wa masiku ni 40 wa wusiku khwatsi hi kusanguleni; a nzi gangi zakuga hambu ni kunwa mati, hi kota ya xionho lexi xa hombe mu onhileko ha xona, hi ku maha lezi zi bihileko mahlweni ka Jehova, mu mu zangarisa.
19Hakuva nzi wa chava nguvu hi zanga ya Jehova yo tshisa, leyi a nga zangarile ha nwina yo xuva ku mu lovisa. Kanilezi Jehova i lo nzi ingisa ni ka lexo xikhati.
20Yenawu Aroni, Jehova i wa zangarile ha yena, a lava ku mu daya, ka xwalexo xikhati nzi lo kombelela na Aroni.
21A xionho xa nwina, gi nga gona role legi mu gi mahileko, nzi lo gi teka nzi gi hisa, ni ku gi fayetela, nzi gi gaya nzi gi silisisa, nzi maha tsutsungwani ha gona, zonake nzi wu chela lomu congweni lowu wu tako hi le xitsungeni.
22Ni kambe mu zangarisile Jehova le Tabera, ni le Masa, ni le Kibrote-Hatava. Ekso. 17:7; Mitse. 11:1, 3, 34
23Ni loku Jehova a mu rumile na mu hi le Kadexe-Barnea, aku: Kanzihani mu ya teka a tiko legi nzi mu nyikileko gona; nwina mu lo ala kuleletela ka Jehova Nungungulu wa nwina; a mu vumelangi, mu lo kaneta a gezu gakwe.
24Nwina mu wa hi ni mijiri ha Jehova kusukela siku lego nzi nga sangula ku mu tiva nwina.
25Hikwalaho nzi lo khizama mahlweni ka Jehova, 40 wa masiku ni 40 wa wusiku nzi lo korama lahasi, hakuva Jehova i wa wulile lezaku i ta mu lovisa.
26Nzi lo khongela ka Jehova, nziku: Hosi Jehova, u nga lovisi a vanhu va wena ni tshomba ya wena, lava u nga va tlhatlhisa hi wukulu ga wena, lava u nga va humesa le Gipite hi canja ga ntamu.
27Alakanya malanza ya wena, Abrahama, na Isaka, na Jakobe; u nga cuwuki a kunonoha ka timbilu ta lava vanhu, ni kubiha kabye, ni xionho xabye,
28kasi a vanhu va tiko legi va nga wuli lezaku: Jehova i tsanzekile ku va enghenisa ka tiko legi a nga wa va tsumbisile gona, ni kambe wa va venga, yena i va nehile kasi a fela ku ta va daya lomu xiwuleni.
29Kasi lezo vona mbanhu va wena, ni tshomba ya wena, lava u va humesileko le Gipite hi ntamu wa wena wa hombe, ni woko ga wena gi nawulutilweko.
Currently Selected:
Deuteronome 9: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
