Deuteronome 10
10
1A ka xikhati lexo Jehova i te ngalo ka mina: Vatla timbila timbiri ta maribye, to kota leʼto ranga, u kanziha uta ka mina le xitsungeni; u vatla ni nghaxa ya sinya.
2Nzi ta tsala lomo ka timbila leti a timhaka leti ti nga wa hi lomu ka leti to ranga leti u ti layileko, kasi u fela ku ti veka lomu ka nghaxa. Ekso. 25:16, 21; 32:19
3Zinghaho nzi lo maha a nghaxa hi sinya ya munga, nzi lo vatla timbila timbiri ta maribye to fanana ni leti to sangula, zonake nzi lo kanziha xitsungeni na nzi hi ni timbila timbiri mandleni ya mina.
4Na Jehova i lo tsala lomo ka timbila lezi a nga wa tsalile ka leti to sangula, khume ga milayo leyi a nga wa yi wulawulile le xitsungeni, na a hi lomu nzilweni hi siku ga tlhangano; zonake Jehova i lo nzi nyika tona.
5Nzi lo tlhela nzi relela hi le xitsungeni, nzi ya veka a timbila lomu ka nghaxa leyi nzi nga wa yi mahile, ta ha tshamile kona khwatsi hi lezi Jehova a nzi leleteleko.
6Zonake a vanana va ka Israeli va lo suka le hlobyeni ya vanana va ka Jakani vaya le Mosera. Na Aroni i lofa laho a kelelwa laho; zonake Eliazare a nʼwana wakwe i lo tira wupristi wutshanwini ga raru wakwe.
7Va lo suka laho vaya Gudgoda, zonake va lo suka Gudgoda vaya le Jotbatha, a tiko ga micongo.
8Ka lexo xikhati Jehova i lo hlawula a nyangwa ya vaLevi kasi va fela ku rwala a nghaxa ya xivumelwano xa Jehova, ni ku yima mahlweni ka Jehova, ni ku mu khozela, ni ku katekisa vanhu hi vito gakwe, kala ka siku ga nyamutlha.
9Hikwalaho a vaLevi a va na ku avelwa tshomba zinwe ni vamakabye vabye. Tshomba yabye hi Jehova, khwatsi hi lezi Jehova Nungungulu wa wena a mu byelileko. Mitse. 18:20; Jox. 18:7
10Mina nzi lo tshama xitsungeni 40 wa masiku ni 40 wa wusiku, khwatsi hi kusanguleni. Na Jehova i lo nzi ingisa kambe ka lexo xikhati; Jehova a nga mu lovisangi.
11Na Jehova i te ngalo ka mina: Suka u famba, u ya rangela a vanhu, va ya enghena va teka a tiko legi nzi nga hlambanya ka vararu vabye ku va nyika.
12Makunu-ke Israeli, Jehova Nungungulu wa wena i lava yini ka wena ke? A hi lezaku u mu chava Jehova Nungungulu wa wena, u famba hi tontlhe tindlela takwe, u mu ranza, u tirela Jehova Nungungulu wa wena hi mbilu yontlhe ya wena, ni muhefemulo wontihe wa wena;
13na u kari u hlayisa milayo ya Jehova ni zileletelo zakwe, lezi nzi ku leletelako zona nyamutlha, kasi u fela ku tshameka ke?
14Wa wona! a matilo, ni matilo ya matilo, nja Jehova Nungungulu wa nwina, zinwe ni misava ni zontlhe zi nga ka yona.
15Kanilezi Jehova i wa tangaliswa hi vararu va nwina, a va ranza; a kala a hlawula a vana vabye anzhako ka vona, a mu hlawula nwina xikari ka matiko wontihe, khwatsi hi lezi mu zi wonako inyamutlha.
16Enghenisani wukwera a timbilu ta nwina, mu nga nonohisi tinhamu ta nwina;
17hakuva Jehova Nungungulu wa nwina i Nungungulu wa vanungungulu, ni Hosi ya tihosi, i Nungungulu wa hombe, wa mintamu, ni loyi a chavekako, loyi a nga hlawuliko a nghohe ya munhu, loyi a nga amukeliko ku rengelelwa; 2 Kro. 19:7; Joba 34:19; Miti. 10:34
18loyi a yimelako zisiwana ni tinoni kulamuleni; loyi a ranzako valuveli, a va nyika kuga ni kuambala.
19Hikwalaho ranzani valuveli, hakuva nwinawu mu wa hi valuveli le tikweni ga Gipite.
20Chava Jehova Nungungulu wa wena, u mu khozela, u namarela kakwe, u hlambanya hi vito gakwe.
21Hi yena a wudzunzo ga wena, hi yena Nungungulu wa wena, loye a ku maheleko a zilo za hombe lezi zi chavisekako, lezi u zi wonileko hi mahlo ya wena.
22Vararu va wena va relele vaya Gipite na va hi 70, makunu lezi Jehova Nungungulu wa wena i ku anzisile khwatsi hi tinyeleti ta tilo. Gen. 15:5; 22:17; 46:27
Currently Selected:
Deuteronome 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
