Deuteronome 33
33
Mosi a katekisa a tixaka ta ka Israeli.
1Lexi hi xikatekiso xa Mosi, a munhu wa Nungungulu, lexi a nga katekisa ha xona a vanana va ka Israeli na a nga se kufa, aku:
2Jehova i lota hi le Sinai,
A ta va tsuwukela hi le Seire:
I lo woninga na hi le xitsungeni xa Parani,
Na sukela xikari ka zidlemo zo basa;
Lomu canjeni gakwe a nzilo wa nayo wu lo va humelela. Dan. 7:10; Miti. 7:53; Gal. 3:19
3Ina, yena wa ranza a tiko gakwe,
Vontlhe va kubasa va gona va le canjeni ga wena,
Vona va tshama laha mikonzweni ya wena,
Va amukela a timhaka ta wena.
4Mosi i hi leletele a nayo,
Yi nga yona a tshomba ya hlengeletano wa Jakobe.
5Ku wa hi ni hosi ya Jexuruni,
Laho a tihosana ta vanhu ti tlhangeneko
Ni tontlhe tinyangwa ta ka Israeli ti tsombeneko.
6Ngha Rubeni a hanya, a ngafi,
Hambu loku vanhu vakwe va hi va tsongwani!
7Na a katekisa Juda, i te ngalo:
Jehova, zwana a gezu ga Juda,
U mu wuyisa a tikweni gabye.
I lo ti lwela hi mandla yakwe wutsumbu,
Wena uva muvuni wakwe a ku mu tlhatlhisa ka valala vakwe!
8Ha Levi i te ngalo:
Tumina wa wena ni Urima wa wena a zi nyikiwe ka wa kubasa wa wena,
Loyi u mu ringileko le Masa,
Loyi u nga kanetisana naye le matini ya le Meriba. Ekso. 17:7; 28:30
9Loyi a nga ku ngalo hi dadani wakwe ni mamani wakwe: A nzi va wonangi!
Loyi a nga tivangiko vamakabye vakwe,
Loyi a nga khataleliko a vanana vakwe,
Kasi va hlayisa a gezu ga wena.
Va chivirikela xivumelwano xa wena. Ekso. 32:25; Mat. 10:37; Lu. 14:26
10Vona va gonzisa Jakobe a zileletelo za wena,
Ni nayo wa wena ka Israeli.
Vona va vekela a libani lomu tinhovini ta wena,
Ni minyikelo yo hiswa alatini ga wena.
11O Jehova, katekisa ntamu wakwe,
U amukela mitiro ya mandla yakwe.
Lamata mihlana ya valala vakwe, ni ya lava va mu vengako,
Kasi va fela ku kala va nga ha suki kambe.
12Ha Benjamini i te ngalo:
Xiranzwa xa Jehova,
I ta tshama kuruleni zinwe na yena;
Jehova i ta mu fenengeta kala kupinzuka,
Yena i ta tshama makatleni ya yena.
13Ha Josefa i te ngalo:
A tiko gakwe a gi katekiswe hi Jehova
Hi zilo zo saseka za le tilweni, hi nzhokati,
Ni za le kueteni lezi zi nga le hasi,
14Ni mihanzu yo nanziha ya gambo,
Ni mihanzu yo nanziha ya tihweti,
15Ni mihanzu yo nanziha ya zitsunga za kale,
Ni malongo ya zitsunga za kala kupinzuka,
16Ni mihanzu yo nanziha ya misava, ni ya kutala ka yona.
Ni tipswalo ta loyi a nga wa tshamile xihlahleni.
A zi tshame hlokweni ya Josefa,
Ni le hlokweni ya hosi ya vanakulobye! Ekso. 3:2; Miti. 7:30
17A nkuzi yakwe ya matewula mbukosi ga yena,
A timhonzo takwe timhonzo ta nyari;
I ta tlhava ha tona vontlhe vanhu khatiginwe,
Kala le magemeta-musi ya misava.
Hi gona wunyingi ga va ka Efraime,
Ni matala ya va ka Manasa.
18Ha Zebuloni i te ngalo:
Tsaka, Zebuloni, a kuhumeni ka wena,
Na wena Isakari, le matendeni ya wena!
19Vona va ta vitana a vanhu le xitsungeni;
Va nyikela miphahlo ya kululama,
Hakuva va ta anwa a wunyingi ga mabimbi.
Ni le tshombeni leyi yi fihlilweko vunyeni.
20Ha Gadi i te ngalo:
I katekile loye a enzelekisako Gadi!
A etleleko khwatsi i pswele ga nghala,
A pfhemula a woko ni hloko.
21Yena i ti hlawulele a wutshamu ga chukwana,
Hakuva a xiavelo xa hosi xi vekelwe yena,
Yena a famba ni tihosana ta vanhu,
A maha kululama mahlweni ka Jehova,
Ni zileletelo zakwe zinwe na Israeli.
22Ha Dani i te ngalo:
Dani i role ga nghala,
Legi gi tlulako hi le Baxani.
23Ha Naftali i te ngalo:
O Naftali, U xure hi ma thomo!
U tatisilwe hi zikatekiso za Jehova!
Yana u ya fumela a tlhelo ga Mupela-gambo ni le Dzongeni!
24Ha Axeri i te ngalo:
Axeri a katekiswe xikari ka vana va vavanuna;
Ngha a ranzeka ka vanakulobye,
A pete nkonzo wakwe lomu ka mafura.
25Zikwinyaro za wena zi tava za ziketse ni za suku,
A ntamu wa wena wu ta ecana ni masiku ya wena.
26O Jexuruni! A nga kona wa ku fanana ni Nungungulu,
Loyi a tako ku ta ku vuna na khilele matilo;
A wukulu gakwe gi tlakusilwe le marefini,
27Nungungulu wa pinzukelwa mbuchavelo ga wena,
Ni laha hasi ku fumela a mawoko yakwe ya pinzukelwa.
I hlongolile a valala mahlweni ka wena,
A ku ngalo: Lovisa!
28Israeli i akile hi kurula,
A hlowo ya Jakobe yi tshameka,
A tikweni ga mavele ni vinya;
Hakunene a tilo gakwe gi dona a nzhokati. Jer. 23:6; 33:16
29U katekile wena, Israeli! Himani a fananako na wena,
Wena tiko u hanyiswako hi Jehova!
A nga xitlhangu xi vikelako,
Ni supado ya wukulu ga wena!
A valala va wena va ta khoziswa mahlweni ka wena, Kanilezi wena u ta kanzihela a matshamu yabye ma tlakukileko!
Currently Selected:
Deuteronome 33: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
