Deuteronome 28
28
1Loku wena u ingisa khwatsi a gezu ga Jehova Nungungulu wa wena, u maha yontlhe milayo leyi nzi ku leletelako yona inyamutlha. Jehova Nungungulu wa wena i ta ku tlakusa hehla ka wontihe matiko ya misava.
2Zontlhe zikatekiso lezi zi tata hehla ka wena zi ku fenengeta, loku u ingisa a gezu ga Jehova Nungungulu wa wena.
3Wena u ta katekiswa laha mutini, ni ku katekiswa le masinwini.
4Ku ta katekiswa ni pswalo wa miri wa wena, ni mihanzu ya masimu ya wena, ni mihanzu ya mitlhambi ya wena, ya tihomu ni ya tiyivu.
5A zikatekiso zi tava lomo xirunzwini xa wena, ni lomu ka ngelo wa wena wa ku vuva zibaba.
6U ta katekiswa kuengheneni ka wena, u katekiswa ni kuhumeni ka wena.
7Jehova i ta ku nyika ku hlula valala va wena lava va ta nga ku vukela; va tata hi ndlela yinwe a ku talwa na wena, kanilezi va ta panzanyeka mahlweni ka wena hi 7 wa tindlela.
8Jehova i ta leletela a zikatekiso a kuva lomu ka zigurumbu za wena, ni ka yontlhe mitiro ya mandla ya wena, ni ku ku katekisa lomu ka tiko legi Jehova Nungungulu wa wena a ku nyikako gona.
9Jehova i ta ku yimisa lezaku uva tiko legi gi basileko, khwatsi hi lezi a hlambanyileko ka wena, loku u hlayisa a milayo ya Jehova Nungungulu wa wena, ni loku u famba hi tindlela takwe. Ekso. 19:6
10Zonake a matiko wontihe ya misava ma ta wona lezaku wena u vitanwa hi vito ga Jehova, va ta ku chava.
11Jehova i ta anzisa nguvu a pswalo wa miri wa wena, ni mihanzu ya zifuyo za wena, ni mihanzu ya masimu ya wena, lomu ka tiko legi Jehova a hlambanyileko ka vararu va wena ku ku nyika gona.
12Jehova i ta ku vululela tilo, gi nga bako gakwe ga titshomba, ni ku nyika a misava ya wena a tivula hi zikhati za tona, ni ku katekisa yontlhe mitiro ya mandla ya wena. Wena u ta cenekisa matiko ya ku tala, kanilezi wena u nga ta ceneka nchumu ka wona.
13Jehova i ta ku yimisa a kuva hloko, na u nga hi nkila; wena u tava le hehla, na u nga hi lahasi, loku wena u ingisa a milayo ya Jehova Nungungulu wa wena, leyi rizi ku leletelako inyamutlha, a ku yi hlayisa ni ku yi maha;
14ni loku u nga hambuki xineneni hambu xibhabheni a ka timhaka tontlhe leti nzi ku leletelako tona inyamutlha, kasi u nga lanzeli vanwani vanungungulu ni ku va khozela.
15Kanilezi loku u nga ingisi a gezu ga Jehova Nungungulu wa wena, ni ku hlayisa yontlhe milayo yakwe ni zontlhe zileletelo zakwe, lezi nzi ku leletelako zona inyamutlha, wontihe makhombo lawa ma tata hehla ka wena ma ku khubhunyeta. Mik. 2:17; Mal. 2:2
16A khombo gi tava lomu mutini wa wena, ni khombo gi tava le masinwini ya wena.
17A khombo gi tava lomu xirunzwini xa wena, ni lomu ngelweni wa wena wa ku vuva zibaba.
18A khombo gi tava ka pswalo wa miri wa wena, ni mihanzu ya misava ya wena, ni pswalo wa tihomu ta wena ni tiyivu ta wena.
19Ni khombo gi tava kuengheneni ka wena, ni khombo gi tava kuhumeni ka wena.
20Jehova i ta rumela makhombo ni kuxaniseka ni kulahlekelwa ka yontlhe mitiro leyi u ta nga sangula hi canja ga wena, ni leyi u ta nga yi tira, kala u mbhetiswa, u loviswa hi kuhatlisa, hi kota ya mitiro ya wena ya kubiha leyi u nzi fulareleko ha yona.
21Jehova i ta ku maha u namarelwa hi tinghumbe, kala u lobyiswa lomu ka misava leyi u ta nga ya enghena ka yona u yi fumela.
22Jehova i ta kuba hi mababyi ya xifuva, ni kuhisa ka miri, ni kuvimba, ni mumu wa hombe, ni supado, ni xipupuri, ni kukuruka ka timbewu; lawa makhombo ma ta ku panzanya kala u lobyiswa. Am. 4:9; Hag. 2:18
23A tilo gi ta fanana na suku hehla ka hloko ya wena, ni misava lahasi ka wena yi tava xiketse.
24Jehova i ta nisela a tiko ga wena a ntsuri ni tsutsungwani, u kala u lova.
25Jehova i ta maha lezaku wena u hluliwa hi valala va wena; wena u ta huma ku yalwa ni valala va wena hi ndlela yinwe, kanilezi u ta ya panzanyeka mahlweni kabye hi 7 wa tindlela, zonake u tava xihlekiso ka wontihe matiko ya misava. Jer. 15:4; 24:9
26Ni zirumbi za nwina zi ta kuva kuga ka tontlhe tinyanyani ta tilo, ni zivanza zontlhe za misava, ni laho ku nga tava kona munhu wo zi hlongola.
27Jehova i ta kuba hi zidlayi za le Gipite; zinwe ni muna ni xigwere, ni tisalu, a zilo lezi u to kala u nga zi koti ku chumiwa ka zona.
28Jehova i ta kuba hi kuhunguka, ni wukhumu, ni kupepuka;
29u ta hulumetela laha hlikanhini khwatsi hi xikhumu xi hulumetelako lomu munyameni. U nga ta vuvuma tindleleni ta wena. U ta xaniswa ni ku phangiwa wontihe masiku, ni laho ku nga tava kona wa ku ku hlanguta.
30Wena u ta wuta wasati, kanilezi munwani i ta etlela naye; wena u ta aka yindlu, kanilezi u nga ta tshama ka yona; u ta byala xivina, kanilezi u nga taga mihanzu ya xona.
31A homu ya wena yi ta dawa kuwoneni ka wena, kanilezi u nga taga a nyama ya kona; a mbongola ya wena yi ta wutliwa kuwoneni ka wena, na yona yi nga ta tlheliswa kambe ka wena; ni tiyivu ta wena ti ta nyikelwa ka valala va wena, ni laho a nga ta kuva kona wa ku ku yimela!
32A vafana va wena ni vanhanyana va wena va ta nyikelwa ka vamatiko; ni mahlo ya wena ma ta zi wona, ma mbhela hi ku xuva ha vona wontihe masiku, kanilezi a canja ga wena gi ta vumala ntamu.
33A vanhu lava u nga va tiviko va taga a mihanzu ya misava ya wena ni ya mitiro ya wena yontlhe; wena u ta tsimbeketwa ni ku khinyelelwa wontihe masiku; Vala. 6:3
34zonake u tava loyi a hungukileko hi kota ya lezo u ta nga zi wona hi mahlo ya wena.
35Jehova i ta ku lamata hi zilonza lomu madzolweni, ni lomu ka tinyonga hi zilonza zo karata lezi zi to kala zi nga holi ka wena, kusukela zirenzeni za wena kala le tshavatshaveni ga hloko ya wena.
36Jehova i ta ku yisa wena, zinwe ni hosi ya wena leyo u ta nga yi veka hehla ka wena, ka tiko lego u nga gi tiviko, hambu ni vararu va wena, leyo mu taya khozela vanungungulu vanwani va tisinya ni va maribye.
37Na wena u tava xihlamaliso ni xihlekiso, ni a xomololwako xikari ka vanhu vontlhe lavo Jehova a ta nga ku yisa ka vona. 1 Tih. 9:7; Jer. 25:9
38U ta byala a mbewu yo tala le masinwini ya wena, kanilezi u ta tshovela zitsongwani, hakuva a humbi yi ta yi mbheta.
39U ta byala ni ku hlakulela zivina, kanilezi u nga tanwa a vinya ga kona hambu ni ku khaya mauva ya kona, hakuva zi ta giwa hi ziwungwani.
40Wena u tava ni mioliva lomu tikweni ga wena gontlhe, kanilezi u nga ta tola mafura ya yona, hakuva a mihanzu ya kona yi ta tlhatlheka.
41Wena u ta beleka vafana ni vanhanyana, kanilezi va nga ta kuva va wena, hakuva va ta khomiwa va maha tikhumbi.
42Tontlhelele tisinya ta wena ni mihanzu ya misava ya wena zi ta giwa hi humbi.
43A muluveli loyi a nga xikari ka wena i ta ti kulisa hehla ka wena nguvunguvu, kanilezi wena u ta relela uya hasi nguvunguvu;
44yena i ta ku cenekisa, kanilezi wena u nga ta mu cenekisa nchumu; yena i ta kuva hloko, kanilezi wena u ta kuva nkila.
45Wontihe makhombo ma tata hehla ka wena, ma ku lanzela ma kala ma ku khubhunyeta u lobyiswa, hakuva wena a ku ingisangi a gezu ga Jehova Nungungulu wa wena, ni ku hlayisa milayo yakwe ni zileletelo zakwe lezi a ku leleteleko zona.
46Zona zi tava zikombiso ni masingita hehla ka wena ni hehla ka zizukulwana za wena kala kupinzuka.
47Hakuva wena a ku khozelangi Jehova Nungungulu wa wena hi kutsaka, ni mbilu yontlhe ya wena, hi kota ya wunyingi ga zilo zontlhe.
48Na wena u ta khozela valala va wena lava Jehova a ta nga va rumela ku ta ku vukela, na u hi ni ndlala ni tora, ni wuna, ni ku vumala zilo zontlhe; na yena i ta khoneka muyoko wa xiketse lomu nhanwini ya wena, U kala u lobyiswa hi yena.
49Na Jehova i ta ku nehela a mufumo wa le kule, wu nga le magumo ka misava, a mufumo wu fananako ni kupuruma ka gama; a mufumo lowu u nga tiviko ni lirimi la wona; Jer. 5:15; 6:22
50a mufumo lowu wu nga ni tinghohe ti chavekako, lowu wu to kala wu nga khatali hi vanhu va kale, hambu ni ku tsetsa hi vanana;
51na wona wu taga a marole ya zifuyo za wena, ni mihanzu ya misava ya wena kala wena u lobyiswa; cima va nga ta ku siyela nchumu hambu ni timbewu, ni vinya, ni mafura, ni marole ya tihomu ta wena, hambu ni ziyivana za tiyivu ta wena, va kala vona va ku mbhetisa.
52Na vona va ta ku vimbezela lomu mitini ya wena yontlhe, kala kuwa lahasi wontihe a makhokhola lawa ma gingisilweko hi ntamu, walawo u ma tsumbako lomu tikweni ga wena gontlhe. Va ta ku hlasela lomu mitini ya wena yontlhe, lomu ka tiko legi Jehova Nungungulu wa wena a nga ku nyika gona.
53A kuhlaselweni ni kuxanisekeni loku a valala va wena va ta nga ku xanisa ha kona, u taga a mihanzu ya miri wa wena nwinyi, a nyama ya varisanyana va wena ni vanhanyana va wena lava Jehova Nungungulu wa wena a nyikileko wena.
54A munhu a fumileko xikari ka nwina a tihlo gakwe gi ta cuwuka hi ku bonzolota ka nakulobye, ni ku bonzolota a sati wa xifuva xa yena, ni ku bonzolota a misalela ya vanana vakwe lava va seleko va hanya.
55Zinghaho yena a nga ta nyika ni munwe wabye a nyama ya vanana vakwe leyi a ta nga ngha a kari aga, hakuva a nga ta siyelwa nchumu lomu kuvimbezelweni, ni lomu kuxanisekeni loku a valala va wena va ta nga ku xanisa ha kona lomu mitini ya wena yontlhe.
56A wasati loyi a fumileko xikari ka nwina, laha kakuva a nga zi koti ni ku kanzihela lahasi hi kota ya kutizwela, a tihlo gakwe gi ta cuwuka hi ku bonzolota a nuna wa xifuva xa yena, ni ku bonzolota a nisanyana wa yena, ni ku bonzolota a nhanyana wakwe.
57Zonake yena i ta ala ku nyikela a gulu gakwe, hambu a vanana lava a belekileko; hakuva i taga vona lomu kufihlaleni hi kota ya ku vumala zontlhe, lomu kuvimbezelweni ni kuxanisekeni loku a valala va wena va ta nga ku xanisa ha kona lomu mitini ya wena.
58Loku u nga cheli kota ku lanzela timhaka tontlhe ta nayo lowu, leti ti tsalilweko ka bhuku legi, ni ku chava a vito legi ga hombe gi chavekako ga Jehova Nungungulu wa wena,
59Jehova i ta kuba hi mitungu leyi yi hlamalisako, wena ni zizukulwana za wena, a mitungu leyi ya hombe yi simamisako yi nga hunzi ni mababyi lawa yo karata lawa ma tsanzako va-chumi.
60Na yena i ta neha ka wena wontihe mababyi ya le Gipite, lawa wena u nga wa rurumela ha wona le Gipite, zonake u ta babya ha wona.
61Kambe Jehova i ta neha hehla ka wena wontihe mababyi, ni wontihe makhombo lawa ma nga tsaliwangiko ka legi bhuku ga milayo, kala wena u lobyiswa.
62Mu ta sala mu hi tsengo wutsongwani, kasi lezo nwinawu mu wa ku khwatsi mu tinyeleti ta tilo hi wunyingi ga nwina, hakuva wena a ku zwisi-sangi a gezu ga Jehova Nungungulu wa wena.
63Khwatsi hi lezi Jehova a tsakako hi ku mu katekisa a mu enzelekisa, zinghaho kambe Jehova i ta tsaka hi ku mu lovisa ni ku mu mbhetisa; na nwina mu ta hlomulwa lomu tikweni lego mu yako ku ya gi fumela.
64Na Jehova i ta ku hangalasa xikari ka matiko wontihe, kusukela magumeso ya misava kala magumesweni manwani ya misava, hi leyo u ta ngaya khozela vanwani vanungungulu lava wena ni vararu va wena mu nga va tiviko, va nga vanungungulu va tisinya ni maribye.
65A xikari ka lawo matiko wena u nga ta kuma kurula, ni kambe cima ku nga tava kona kuhumula ka nkonzo wa wena; kanilezi leyo Jehova i ta ku nyika a mbilu yo rurumela, ni mahlo ma pfhupelako, ni mbilu yi gavata-nako.
66Ni wutomi ga wena gi tava kona mhangweni ya hombe; wena u ta rurumela wusiku ni hlikanhi, u nga ta tsumba wutomi ga wena.
67Laha mixweni u taku: O, loku ku wo khwa kupeta ka gambo! Ni laha gambyeni u taku: O, loku ku wo khwa i mixo! U ta wula lezo hi kutshisa ka mbilu ya wena loku ku ta nga tshisa ha kona, hi zilo lezi u ta nga zi wona hi mahlo ya wena.
68Na Jehova i ta mu tlhelisa muya Gipite hi mataru, a mu fambisa hi ndlela leyi mina nzi nga wa ku byelile lezaku: U nga ta ha yi wona kambe;, zonake leyo mu ta ya ti xavisa ka valala va nwina, a kuva mu hi tikhumbi ta vavanuna ni tikhumbi ta vavasati, kanilezi a nga kona munhu a ta nga xava nwina.
Currently Selected:
Deuteronome 28: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
