Deuteronome 27
27
1Mosi ni masingalakati ya ka Israeli va lo laya vanhu, vaku: Hlayisani milayo leyi nzi mu nyikako yona nyamutlha.
2A siku lego mu ta nga tlhatuka Jordani mu ya enghena tikweni legi Jehova Nungungulu wa wena a ku nyikileko gona, u ta yimisa a maribye ya hombe u ma tota hi mhemba;
3zonake u ta tsala hehla ka wona a timhaka tontlhe ta lowu nayo, laha na u tlhatukile a ku ya enghena ka tiko legi Jehova Nungungulu wa wena a ku nyikileko, a tiko gi khulungako masi ni wulombe, khwatsi hi lezi Jehova Nungungulu wa vararu va wena a ku tsumbisileko.
4Laha na mu tlhatukile Jordani mu ta ya yimisa le xitsungeni xa Ebale a maribye lawa nzi mu leletelako ha wona inyamutlha, zonake mu ta ma tota hi mhemba.
5Laho u ta akela Jehova Nungungulu wa wena a alati ga maribye, u nga ma henyi hi xiketse kuakeni ka wena; Ekso. 20:25; Jox. 8:30
6Wena u ta aka a alati ga Jehova Nungungulu wa wena hi maribye ma nga vatliwangiko, zonake u ta nyikela ka Jehova Nungungulu wa wena a munyikelo wa kuhiswa laho alatini.
7U ta maha ni miphahlo ya kubonga, uga laho u ti tsakela mahlweni ka Jehova Nungungulu wa wena.
8U ta tsala hehla ka lawa maribye tontlhe timhaka ta lowu nayo; u dlunyatisa khwatsi.
9Mosi i lo wulawula zinwe ni vapristi va vaLevi ka vaIsraeli vontlhe, aku: Miyela, Israeli, u ingisa! Inyamutlha u tiko ga Jehova Nungungulu wa wena.
10Hikwalaho ingisa a gezu ga Jehova Nungungulu wa wena, u hlayisa milayo yakwe ni zileletelo zakwe lezi nzi ku leletelako inyamutlha.
Zikatekiso ni Makhombo.
11Gwalego siku Mosi i lo laya vanhu, aku:
12Loku mu tlhatukile Jordani, lava va ta nga yima xitsungeni xa Gerizima va katekisa vanhu, hi lava: mba ka Simeoni, ni va ka Levi, ni va ka Juda, ni va ka Isakari, ni va ka Josefa, ni va ka Benjamini.
13Ni lava va ta nga yima xitsungeni xa Ebale va wulawula nzhukano, hi lava: mba ka Rubeni, ni va ka Gadi, ni va ka Axeri, ni va ka Zebuloni, ni va ka Dani, ni va ka Naftali.
14A vaLevi va ta wulawula hi gezu ga hombe ka vanhu vontlhe va ka Israeli, vaku:
15Khombo a give ka munhu loyi a mahako xifananiso xi vatlilweko, hambu lexi xi nyekisilweko, xi nga manyala ka Jehova, a ntiro wa mandla ya vanhu, a xi yimisa wutshanwini gi fihleleko! A vanhu vontlhe va ta hlamula, vaku: Amen!
16Khombo a give ka loye a nyenyako a raru wakwe, kutani mamani wakwe! A vanhu vontlhe va ta hlamula, vaku: Amen! Mav. 20:20; Mat. 15:4
17Khombo a give ka loyi a susako a xikombiso xa mbhingano wa misava ya muakelane wakwe! A vanhu vontlhe va ta hlamula, vaku: Amen!
18Khombo a give ka loyi a hambukisako xikhumu laha ndleleni ya xona! A vanhu vontlhe va ta hlamula, vaku: Amen!
19Khombo a give ka loyi a hambukisako nongameto ka muluveli, ni ka xisiwana, ni ka noni! A vanhu vontlhe va ta hlamula, vaku: Amen!
20Khombo a give ka loyi a etlelako ni sati wa raru wakwe, hakuva i funungule wumbyiri ga raru wakwe! A vanhu vontlhe va ta hlamula, vaku: Amen!
21Khombo a give ka loyi a etlelako ni lihi lixaka la xifuyo! A vanhu vontlhe va ta hlamula, vaku: Amen!
22Khombo a give ka loyi a etlelako ni makabye, loyi a nga nʼwana wa raru wakwe, kutani nʼwana wa mamani wakwe! A vanhu vontlhe va ta hlamula, vaku: Amen!
23Khombo a give ka loyi a etlelako ni mukokati wakwe! A vanhu vontlhe va ta hlamula, vaku: Amen!
24Khombo a give ka loyi a dayako muakelane wakwe xihundleni! A vanhu vontlhe va ta hlamula, vaku: Amen!
25Khombo a give ka loyi a amukelako nzhiho wa ku daya munhu loyi a nga hiko na nanzu! A vanhu vontlhe va ta hlamula, vaku: Amen!
26Khombo a give ka loyi a nga khomisisiko a timhaka ta lowu nayo a ti maha! A vanhu vontlhe va ta hlamula, vaku: Amen! Dan. 9:11; Gal. 3:10
Currently Selected:
Deuteronome 27: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
