Danieli 4
4
A kuhunguka ka Nebukadnezzare.
1Mina hosi Nebukadnezzare nza mu tsalela nwina nwentlhe matiko, tixaka ni tirimi, lava mu akileko misaveni yontlhe, nziku: A kurula a ku anze xikari ka nwina.
2Nzi wona lezaku zi sasekile akuva nzi mu tivisa hi zikombiso ni zihlamaliso lezi Nungungulu loyi a Hunzeleleko Kutlakuka a zi tirileko ka mina.
3A zikombiso zakwe zi kulisa kuyini! A zirewukiso zakwe zi na ni ntamu wa kuyini! A mufumo wakwe wa simasima, ni kufuma kakwe ka zizukulwana ni zizukulwana.
4Mina Nebukadnezzare nzi wa tshamekile lomu ndlwini ya mina, nzi tsaka lomu xiluvelweni xa mina.
5Nzi lo lora a noro lowu wu nga nzi chavisa; a maalakanyo ya mina laha nzi nga hi sangweni ga mina, ni miwoniso leyi nzi yi wonileko, zi lo nzi dzukisa.
6Hikwalaho nzi lo vitanisa tontlhe titlhari ta Babuloni, kasi ti ta nzi tlhamusela a noro lowo.
7Zonake ku lota a tinʼanga, ni vangoma, ni titlhari, ni zitumbe, nzi va hlawutela a noro lowo, kanilezi a va nzi byelangi a tlhamuselo wa wona.
8Hi kugumesa ku lota mahlweni ka mina Danieli, a vitwako Beltexazzare, gi nga vito ga nungungulu wa mina, loyi a moya wa vanungungulu va basileko wu nga ka yena. Nzi lo hlawutela a noro, nziku:
9Wena Beltexazzare, nduna ya titlhari, khwatsi hilezi nzi zi tivako lezaku a moya wa vanungungulu va basileko wu ka wena, ni lezaku a ku hluliwi hi wihi fihlakalo, nzi byele a miwoniso ya noro wa mina leyi nzi yi wonileko, ni tlhamuselo wa yona.
10A miwoniso nzi yi wonileko laha nzi nga hi sangweni ga mina hi leyi: Nzi lo wona a sinya yo leha nguvu na yi hi xikari ka misava.
11A sinya leyi yi lo kula yiva ya ntamu, na yi lehile yi chikela tilweni, yi woneka ka wontihe magemetamusi ya misava.
12A matluka ya yona ma wa sasekile, a mihanzu ya yona na yi tele, na yi hi ni zakuga zo eneta vanhu vontlhe. A zihari za khwati zi wa zumba nzhutini wa yona, a tinyanyani ta tilo ti aka maravini ya yona, zontlhe zivangwa zi hanyako zi wa giswa hi yona.
13A miwonisweni ya mina laha na nza hi sangweni ga mina, nzi lo wona a ngelosi yo basa na yi relela hi le tilweni.
14Yi lo kanyuluka aku: Singani a sinya, mu fungela a maravi ya yona, mu tlhatlha a matluka ya yona, mu hangalasa a mihanzu ya kona. A zihari a zi hume nzhutini wa yona, ni tinyanyani ti huma maravini ya yona. 1 Sam. 16:1, 12; 1 Tih. 22:19; Lu. 1:52
15Hambu zi hi tano, tsikani a xibho ni mitsu ya xona lomu misaveni, xi bohiwa hi mangenje ya xiketse ni ya suku lomu byanyini ga khwati; xi tsakamisiwa hi mbhera ya le tilweni, a aveliwa a byanyi ga khwati zinwe ni zihari.
16A mbilu yakwe a yi hunzuke yi nga havi ya munhu, ngha a nyikiwa a mbilu ya xihari; a hunziwe hi ntlhanu wa zikhati ni zimbiri.
17A tsanziselo leyi yita hi le hubyeni ya tingelosi, a mhaka yi leletelwe hi vabasileko, kasi lava va hanyako va ta zi tiva lezaku Loyi a Hunzeleleko Kutlakuka wa fumela a mifumo ya vanhu, ni lezaku i yi nyika ka wihi a mu ranzako, a yimisa hehla ka yona a munhu a nga wa nyalidede nguvu.
18Hi noro lowu nzi wu lorileko mina hosi Nebukadnezzare. Wena Beltexazzare, wu tlhatlhambutele, hakuva a titlhari tontlhe ta mufumo wa mina ti tsanzekile a ku wu tlhamusela. Wena wa zi kota, hakuva a moya wa vanungungulu va basileko wu ka wena.
19Zonake Danieli, a nga vitwa Beltexazarre, aku kaye xikhatana laho, a xeveka maalakanyweni yakwe. A hosi yiku: Beltexazzare, u nga xeveki hi kota ya noro ni tlhamuselo wa wona. Beltexazzare aku: Hosi yanga, a noro lowu a wuve hehla ka lava va ku vengako, ni tlhamuselo wa wona a wu henye a valala va wena.
20A sinya leyi u nga yi wona, yi kula yiva ya ntamu, yi leha yi chikela tilweni, yi woneka ka wontihe magemetamusi ya misava,
21leyi a matluka ya yona ma nga saseka, na yi tele hi mihanzu, yi hi yona yi gisako vanhu vontlhe: leyi a nzhutini wa yona ku nga zumba a zihari za khwati, a maravini ya yona ku aka a tinyanyani ta tilo,
22ku wuliwa wena hosi, u kulileko uva ni ntamu; hakuva a wukulu ga wena gi tlakukile gi chikela tilweni, a kufuma ka wena ku navalata kala magemetamusi ya misava.
23Lezi hosi yi wonileko a ngelosi yo basa, na yi relela hi le tilweni, yi taku: Singani a sinya, mu yi lovisa, mu siya ntsena a xibho ni mitsu ya xona lomu misaveni, xi bohiwa hi mangenje ya xiketse ni ya suku lomu byanyini ga khwati, xi tsakamisiwa hi mbhera ya le tilweni, ava ni xiavelo zinwe ni zihari za khwati kala a hunziwa hi ntlhanu wa zikhati ni zimbiri.
24A tlhamuselo wa kona hi lowu, wena hosi: I nyiwo ya Loyi a Hunzeleleko Kutlakuka, leyi yi ta nga tatiseka ka nwinyi wa mina, a hosi yanga:
25U ta hlongolwa xikari ka vanhu u ya tshama ni zihari za khwati, uga byanyi ku fanana ni tihomu, u tsakamiswa hi mbhera ya le tilweni, kala ku hunza a ntlhanu wa zikhati ni zimbiri, kala u zi tiva lezaku Loyi a Hunzeleleko Kutlakuka i fumela a mifumo ya vanhu, a yi nyika ni wihi a mu ranzako.
26A xibho lexi va nga leletela lezaku xi tsikiwa ni mitsu ya xona, zi wula lezaku a wuhosi gi ta tlheliselwa ka wena, loku u zi tivile lezaku ku fuma a tilo.
27Hikwalaho wena hosi, amukela wusungukati ga mina, susa a zionho za wena hi ku maha kululama, ni zigoho za wena hi ku hawukela lava va vumalako; kutani ku ta kuva a kukateka ka wena ku simama.
28Zontlhe lezi zi mahekile ka hosi Nebukadnezzare.
29Na ku mbhelile a 12 wa tihweti, i wa ti fambafambela hehla ka xiluvelo xa wuhosi xa Babuloni.
30A hosi yi lo wulawula yiku: Hi gona a Babuloni ga hombe, nzi gi akileko hi ntamu wa mina wa hombe, kasi giva wuakelo ga hosi, gi kulisa a wukulu ga mina.
31Na hosi ya ha wulawula, a gezu gi lo zwala hi le tilweni, giku: Hosi Nebukadnezzare, wa tivisiwa lezaku a wuhosi gi susilwe ka wena.
32U ta hlongolwa xikari ka vanhu, u ya tshama ni zihari za khwati; u taga byanyi ku fanana ni tihomu kala ku hunza a ntlhanu wa zikhati ni zimbiri; kala u zi tiva lezaku Loyi a Hunzeleleko Kutlakuka i fumela a mifumo ya vanhu, a yi nyika ni wihi a mu ranzako.
33Ka xwalexo xikhati zi lo maheka ka Nebukadnezzare; i lo hlongolwa xikari ka vanhu, a ya ga byanyi ku fanana ni tihomu, a miri wakwe wu tsakamiswa hi mbhera ya tilo, kala a misisi yakwe yi kula ku fana ni woya ga magama, a tinyala takwe ti fanana ni ta tinyanyani.
34A kumbheleni ka masiku lawo, mina Nebukadnezzare nzi lo tlakusa mahlo ya mina tilweni, a kupima ka mina ku wuyelelana. Nzi lo khesa Loyi a Hunzeleleko Kutlakuka, nzi dumisa ni ku kulisa loyi a hanyako kala kupinzuka; hakuva a kufuma kakwe ka simasima, ni mufumo wakwe wu tsonzoma ka zizukulwana zontlhe.
35Vontlhe vaaki va misava a hi nchumu ka yena. I maha kuranza kakwe hi tiyimpi ta tilo ni xikari ka vaaki va laha misaveni. A nga kona a nga tsanzekisako a canja gakwe, ge hambu ku wula kakwe aku; Xini u mahako?
36A xikhati lexo a kupima ka mina ku nga wuya, nzi lo tlheliselwa a wukosi ga mufumo wa mina, ni wukulu ni wudumo ga mina. A manghanakana ya mina ni tinduna ta mina va lo ta nzi lava; nzi tlhela nzi vekiwa wukosini ga mina, nzi engeteliwa ntamu wa hombe.
37Makunu mina Nebukadnezzare nza dumisa ni ku dzunza a Hosi ya tilo, hakuva a mitiro yakwe yontlhe nja zinene, ni tindlela takwe ta nongameto. I na ni ntamu a ku tsongahata lava va fambako hi matshanza. 1 Ped. 5:5
Currently Selected:
Danieli 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
