Danieli 3
3
A vanghana va Danieli va hoxiwa nzhimbyeni wa nzilo.
1Hosi Nebukadnezzare i lo maha a xifananiso xa nzalama, a kutlakuka ka xona ku wa hi 60 wa mikono, ni 6 wa mikono a kuanama. I lo xi yimisa lomu nkoveni wa Dura, a tikweni ga Babuloni.
2Zonake hosi Nebukadnezzare i lo tsombanyisa a tihosana, ni tinduna, ni vafumeli, ni Valamuli, ni vakhomi va mabako, ni masungukati, ni vatongi, ni wontihe manganakana ya matiko, vata a nyikelelisweni wa xifananiso lexi hosi Nebukadnezzare a nga xi yimisele.
3Ku lo tsombana a tihosana, ni tinduna, ni vafumeli, ni Valamuli, ni vakhomi va mabako, ni masungukati, ni vatongi, ni wontihe manghanakana ya matiko, kasi ku nyikelisisa a xifananiso lexi hosi Nebukadnezzare a nga xi yimisile, va ta yima mahlweni ka xona.
4Zonake a mubi wa nyiwo a kanyuluka, aku: Mu layiwa nwina matiko, ni tixaka ni tirimi, lezaku:
5A xikhati lexi mu zwako a kuvuma ka paratana, ni ka mpunzu, ni ka xitende, ni ka khombela, ni ka ngoma, ni ka mihambi, ni ka tontlhe tixaka ta wucenje, mu tawa hasi mu khizamela a xifananiso xa nzalama lexi hosi Nebukadnezzare a xi yimisileko.
6Ni wihi a to kala a ngawi hasi a xi khizamela, hi xwalexo xikhati i ta hoxiwa nzhimbyeni wa pingo ga nzilo. Jer. 29:22; Kuv. 13:15
7Hikwalaho laha vanhu vontlhe va ngazwa a kuvuma ka paratana, ni ka mpunzu, ni ka xitende, ni ka khombela, ni ka ngoma, ni ka mihambi, ni ka tontlhe tixaka ta wucenje, a matiko wontihe, a tixaka ni tirimi, va lowa hasi va khizamela a xifananiso xa nzalama lexi hosi Nebukadnezzare a nga xi yimisile.
8A ka lexo xikhati a titlhari to kari ti lo tshinela ti ta kecara a vaJuda,
9vaku ka hosi Nebukadnezzare: Hosi! hanya kala kupinzuka!
10Wena hosi u layele lezaku munhu ni munhu loyi a ta ngazwa a kuvuma ka paratana, ni ka mpunzu, ni ka xitende, ni ka khombela, ni ka ngoma, ni ka mihambi, ni ka tontlhe tixaka ta wucenje, i tawa hasi a khizamela a xifananiso xa nzalama,
11ni lezaku ni wihi loyi a nga wiko hasi a khizamela, i ta hoxwa xikari ka nzhimbo wa pingo ga nzilo.
12Va kona vajuda vo kari lava u nga va yimisa a kuva varangeli va tiko ga Babuloni, a nga Xadrake, na Mexake, na Abed-nego; a vanhu lava a va ku khataleli wena hosi. A va khozeli a vanungungulu va wena, ge hambu ku khizamela a xifananiso xa nzalama lexi wena u nga xi yimisa.
13Nebukadnezzare i lo vunjukelana hi zanga, a vitanisa Xadrake, na Mexake, na Abed-nego. Laha a vavanuna lava va nga tiswa mahlweni ka hosi,
14Nebukadnezzare aku kabye: Hi nga nzi byelani, Xadrake, na Mexake, na Abed-nego, mo maha ha womu a ku kala mu nga khozeli a vanungungulu va mina, ni ku kala mu nga khizameli a xifananiso xa nzalama lexi nzi nga xi yimisa ke?
15Makunu loku mu longile aku ni xihi xikhati mu zwako a kuvuma ka paratana, ni ka mpunzu, ni ka xitende, ni ka khombela, ni ka ngoma, ni ka mihambi, ni ka tontlhe tixaka ta wucenje, muwa hasi mu khizamela a xifananiso lexi nzi nga xi maha, zi sasekile. Kanilezi loku mu nga xi khizamela mu ta hoxiwa zalezo xikari ka nzhimbo wa pingo ga nzilo. Hi wihi nungungulu a to zi kota ku mu tlhatlhisa mandleni ya mina ke?
16Xadrake na Mexake na Abed-nego va lo hlamula vaku ka hosi: Wena Nebukadnezzare, a hi na fanelo ku ku hlamula nchumu mhakeni leyi.
17Loku zi koteka a kuva a Nungungulu wa hina loyi hi mu khozelako a hi ponisa nzhimbyeni wa pingo ga nzilo, i ta hi tlhatlhisa canjeni ga wena hosi.
18Hambu loku zi nge nghaho, zi tive hosi, lezaku hi nga ta khozela a vanungungulu va wena, ge hambu ku khizamela a xifananiso xa nzalama lexi wena u xi yimisileko. Ekso. 20:4; 23:24
19Zonake Nebukadnezzare i lo zangara nguvu, a nghohe yakwe yi visukela Xadrake na Mexake na Abed-nego. I lo rumisa lezaku a nzhimbo va wu hisisa ku hunza tolovelo ya wona hi ntlhanu wa zikhati ni zimbiri.
20A ruma a vavanuna vo kari va tinhenha ta yimpi yakwe a ku boha Xadrake na Mexake na Abed-nego, va va hoxa lomu nzhimbyeni wa pingo ga nzilo.
21A vavanuna lava va lo bohiwa na va hi ni tinguwo tabye to rangisa, ni mabhaji yabye, ni zihuku zabye, ni tinguwo tinwani, va hoxiwa xikari ka nzhimbo wa pingo ga nzilo.
22Khwatsi hilezi a xileletelo xa hosi xi nga wa tikisile, ni lezi a nzhimbo wu nga hunzelele ku hisa, a vavanuna lava va nga hoxa Xadrake na Mexake na Abed-nego lomu nzilweni va lo dawa hi malangavi ya wona,
23laha a vavanuna lava vanharu, va Xadrake na Mexake na Abed-nego, va nga wela nzhimbyeni wa pingo ga nzilo na va bohilwe.
24Zonake Nebukadnezzare i lo dzuka, a suka hi kuhatlisa, a wutisa a masungukati yakwe, aku; A hi hoxangi a vavanuna vanharu xikari ka nzilo na va bohilwe ke? Vona va hlamula, vaku ka hosi: Zi tano, hosi!
25I lo engeta aku: Langutani! nzi wona mune wa vanhu va tlhatlhilweko, na va fambafamba xikari ka nzilo, kanilezi a va bayiswi. A dzumba ga loyi wa wumune gi woneka kota ga nʼwana wa nungungulu.
26Zonake Nebukadnezzare i lo tshinela laha nyangweni ya nzhimbo wa pingo ga nzilo, a taku: Xadrake, Mexake, na Abed-nego, nwina malanza ya Nungungulu a Hunzeleleko Kutlakuka, humani, tanani leno! Zonake Xadrake na Mexake na Abed-nego va lo huma hi lomu xikari ka nzilo.
27A tihosana, ni tinduna, ni vafumeli, ni masungukati ya hosi, va lo tsombana va wona lezaku a nzilo wu wa nga hi na ntamu hehla ka mimiri ya vavanuna lava, kaku ni sisi munwe wa tihloko tabye a wu na nga tlahuka, ge hambu ni tinguwo tabye a ti na ngaswa, ni masema ya nzilo ma wa nga zwali ka vona.
28Nebukadnezzare i lo wulawula, aku: A khesiwe a Nungungulu wa Xadrake na Mexake na Abed-nego, loyi a rumeleko a ngelosi yakwe a ku ta tlhatlhisa malanza yakwe lawa ma mu tsumbako, lawa ma nga tsanzisa a mhaka ya hosi, va ti nyikela mimiri yabye lezaku va nga ta tirela ni ku khizamela a nungungulu ahandle ka Nungungulu wabye.
29Hikwalaho, nzaba nyiwo, lezaku ni wihi wa matiko wontihe, ni tixaka ni tirimi, loyi a wulawulako kubiha hi Nungungulu wa Xadrake na Mexake na Abed-nego, i ta phaphulelwa, a tiyindlu takwe ti ta mahiwa matala. Hakuva a nga kona munwani nungungulu loyi a nga ponisako hi ndlela leyi. Miti. 5:29
30Zonake a hosi yi lo tlakusa Xadrake na Mexake na Abed-nego lomu tikweni ga Babuloni.
Currently Selected:
Danieli 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
