Danieli 1
1
A kugonza ka Danieli ni vanghana vakwe.
1Hi lembe ga wunharu ga kufuma ka Jehoiakimu a hosi ya ka Juda, Nebukadnezzare a hosi ya le Babuloni i lota le Jerusalema a ta gi vimbezela.
2A Hosi yi lo nyikela Jehoiakimu a hosi ya ka Juda mandleni yakwe, ni zibya zinwani za yindlu ya Nungungulu. Nebukadnezzare i lo famba nazo tikweni ga Xinari, a zi enghenisa ndlwini ya nungungulu wakwe, a zi veka lomu bakweni ga nungungulu wakwe.
3A hosi yi lo laya Axpenaze a nduna ya mithenwa ya yona, a mu ruma ku neha a manwani majaha ya yindlu ya wuhosi ya ka Israeli ni ya vahombe; 2 Tih. 20:18; Isa. 39:7
4ma nga hi majaha ya timbhuri ti nga hiko na vala, a titlhari, va yileko mahlweni hi gonziselelo ni wutivi, lava va fanelweko hi ku enghena ntirweni wa yindlu ya hosi, kasi wa va gonzisa a matsaiela ni lirimi la maKaldea.
5A hosi yi lo leletela lezaku siku ni siku va nyikiwa a zakuga za hosi ni vinya legi a nwako yena; va wundliswa lezo xipimo xa malembe manharu, kasi loku ma mbhelile malembe lawo va ta zi tiva ku tirela hosi.
6Xikari ka vona ku wa hi Danieli na Hanania na Mixaeli na Azaria, va lixaka la ka Juda.
7Kanilezi a nduna ya mithenwa yi lo va chula mavito manwani: Danieli ava Beltexazzari, Hanania ava Xadrake, Mixaeli ava Mexake, na Azaria ava Abed-nego.
8Danieli i lo funga mbilwini yakwe lezaku a nga ta ti nyenyezisa hi zakuga za hosi, hambu hi vinya legi yi nwako gona. Hikwalaho i lo kombela ka nduna ya mithenwa lezaku a nga kurumetwi ku ti nyenyezisa.
9Makunu Nungungulu i lo maha Danieli a kuma thomo ni wuxinji mahlweni ka nduna ya mithenwa.
10Kanilezi a nduna ya mithenwa yiku ka Danieli: Nza chava hosi a nwinyi wa mina, loyi a nga leletela a kuga ka nwina ni kunwa ka nwina; hakuva a nga dzuka a wona tinghohe ta nwina na ti wonzile ku hunza ta titanga-kuloni. Lezo mu wa ta rwexa nanzu ka hloko ya mina mahlweni ka hosi.
11Zonake Danieli i te ngalo ka nekwa leyi yi nga yimisilwe hi nduna ya mithenwa a kuva muhlayisi wa Danieli na Hanania na Mixaeli na Azaria:
12Nza ku kombela, wa nga ringa malanza ya wena a masiku ya khume, va hi nyika kuga matsawu ni kunwa mati.
13Zonake u ta ringanisa a tinghohe ta hina ni ta majaha lawa ma phamelwako a zakuga za hosi; hi kona u ta nga maha kuranza ka wena hi malanza ya wena.
14Zinghaho i lo vumela mhaka yabye, a va ringa khume ga masiku.
15A masiku lawo ya khume loku ma hunzile, a tinghohe tabye ti lo woneka na ti hlekahleka, na va kulukile ku hunza a majaha wontihe lawa ma nga waga a kuga ka hosi.
16Zonake a nekwa yi lo susa a zakuga ni vinya legi va ngaku va tanwa, yi va nyika matsawu.
17A majaha laya ya mune Nungungulu i lo ma nyika a wutivi ni kupimisisa mitsalweni yontlhe ni wutlhari. Danieli i wa pimisisa miwoniso yontlhe ni miloro.
18Loku ma chikele a masiku lawa a hosi yi nga ma yimisile lezaku va ta nehiwa ha wona, a nduna ya mithenwa yi lo va yisa mahlweni ka Nebukadnezzare.
19A hosi yi lo wulawula zinwe navo; xikari kabye vontlhe i wa nga hi kona a nga ringana na Danieli na Hanania na Mixaeli na Azaria. Hikwalaho va lo nyikwa mitiro laha hosini.
20Ni xihi xikhati a hosi yi nga va wutisa hi timhaka ta wutlhari ni wutivi, yi lo va kuma lezaku va hunza hi ka khume a tinʼanga tontlhe ni vangoma lava va nga wa hi mufunweni wakwe wontihe.
21Danieli i lo simamisa kota lezo kala a lembe legi hosi Kurusi a nga sangula ku fuma ha gona.
Currently Selected:
Danieli 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
