Va le Kolosi 1
1
1Paule, a mupostoli wa Kristu Jesu hi kuranza ka Nungungulu, na Timote a makabye wa hina,
2ha rungula a vobasa ni vamakabye va tsumbekileko ka Kristu lava va nga le Kolosi, hiku: A tipswalo ni kurula a zive na nwina na zi huma ka Nungungulu a Dadani wa hina. Efe. 6:21
3Hina ha mu bonga Nungungulu a Dadani wa Hosi ya hina Jesu Kristu na hi mu khongelela xontlhe xikhati,
4hakuva hi zwile hi kukholwa ka nwina ka Kristu Jesu, ni liranzo leli mu ranzako ha lona a vobasa vontlhe, Efe. 1:15; Maheb. 6:10
5hi keta ya kutsumba loku ku vekelweko nwina le matilweni. Kale na mu zwile hi kutsumba loku a mhakeni ya zinene ya ivangeli, Mat. 5:12; 2 Tim. 4:8; 1 Ped. 1:4
6leyi yi tileko ka nwina, kota lezi yi tileko matikweni wontihe, yi ta pswala mihanzu ni ku anza ka wona, kota lezi yi mahako ka nwina kambe, kusukela a siku legi mu nga yizwa, ma tiva a tipswalo ta Nungungulu hi zinene, Mat. 24:14; Joh. 15:16; 2 Kor. 6:1; Efe. 3:2; Tit. 2:11
7kota lezi mu nga gonziswa hi Epafrasi, a xitiri-kulori xi ranzekako. Yena i nanza gi tsumbekileko ga Kristu xikari ka nwina, File. 23
8hi yena a nga hi hlawutela a liranzo la nwina le Moyeni.
9Hi kota ya lezo na hinawu, kusukela a siku legi hi nga zizwa, a hi tsikangi a ku mu khongelela ni ku mu kombelela, lezaku mu fela ku tatiswa hi ku tiva a kuranza kakwe nzeni ka wutlhari gontlhe ni kupima kontlhe ka moya, Rom. 12:2; Efe. 1:15
10lezaku mu famba hi laha ku faneleko Hosi, mu yi xalalisa ka zontlhe, ni ku pswala mihanzu mitirweni yontlhe yo saseka, mu kula kutiveni ka Nungungulu. Joh. 15:16; 1 Tes. 2:12; 4:1
11Ngha mu tiyiswa matlhelweni wontihe, khwatsi hi ntamu wakwe wa hombe, a kuva mu hi ni kutiyisela kontlhe ni kutimisela zinwe ni kutsaka, Miti. 5:41
12na mu bonga Dadani, loyi a hi mahileko hi hi ni fanelo a kuva vahlengeli va tshomba ya vobasa le kuwonekeleni. Efe. 1:11; 5:20
13Yena i lo hi hlanguta ntanwini wa munyama, a hi enghenisa mufunweni wa Nʼwana wakwe a ranzekileko, Maheb. 2:14; 2 Ped. 1:11
14loyi hi nga ni kutirulwa ha yena, ku nga kutsetselelwa ka zionho za hina.
Xifananiso xa Nungungulu a nga woniwiko.
15Hi yena a nga xifananiso xa Nungungulu loyi a nga woniwiko, a matewula ya zivangwa zontlhe. Joh. 14:19; 2 Kor. 4:4; Maheb. 1:3; Kuv. 3:14
16Hakuva a zilo zontlhe zi vangilwe ha yena, le tilweni ni laha misaveni, a zilo zi woniwako ni lezi zi nga woniwiko, kutani zitshamu za wuhosi, kutani mifumo, kutani vafumeli va mimoya, kutani mintamu; zontlhe zi vangilwe hi yena, zi vangelwa yena. Joh. 1:3; Rim. 11:36; 1 Ped. 3:22
17Hi yena a nga rangela zilo zontlhe, zontlhe zi te tsoma ha yena.
18Yena i hloko ya miri wu nga gona bandla; hi yena a nga masangulo, ni matewula ya kuvuka ka vafileko, lezaku ava loʼwo ranga matlhelweni wontihe. Joh. 17:5; 1 Kor. 8:6; Maheb. 13:8; Kuv. 1:5
19Hakuva zi lo mu xalalisa Nungungulu lezaku a kumbhelela kontlhe ku tshama ka yena; Mat. 28:18; Joh. 1:16; 3:34; Efe. 1:23
20lezaku a ta ti tlhanganisa ha yena ni zilo zontlhe za laha misaveni, kutani za le tilweni, na a vanga kurula hi nkhata wa xihambano xakwe.
21Na nwina lava mu nga hambukile kakwe xikhatini xa kale, mu hi valala kupimeni ka nwina hi mitiro ya nwina ya kubiha,
22kanilezi makunu i mu tlhanganyisile naye mirini wa nyama yakwe hi kufa kakwe, kasi ku mu yisa mahlweni kakwe na mu basile, mu nga hi na hala, hambu ni kusoleka,
23loku nwina mu simamisa kukholweni, na mu zimekilwe muku nde, mu nga tsiki ku tsumba a ivangeli leyi mu yi zwileko, leyi yi nga kanelwa ka zivangwa zontlhe lahasi ka tilo, leyi mina Paule nzi nga mahiwa nanza ga yona.
A ntiro wa ivangeli xikari ka vamatiko.
24Makunu nza tsaka kuxanisekeni ka mina, loku nzi xanisekako hi kota va nwina; nzi tatisa nyameni ya mina lezi zi nga sele a kuxanisekeni ka Kristu hi kota ya miri wakwe, wu nga bandla gakwe. Efe. 1:23; Fil. 3:10
25Hakuva nzi mahile nanza ga gona, hi ku yimiswa hi Nungungulu hi kota ya nwina, kasi ku tlhamusela a mhaka yontlhe ya Nungungulu,
26leyi yi nga fihlakalo wu nga fihlilwe ka tintanga tontlhe ni zizukulwana, kanilezi makunu wu wonekelisilwe ka vobasa vakwe. Rom. 16:25
27Hakuva Nungungulu i lo ranza ku va tivisa lezaku ku talisile kuyini a kungangamela ka fihlakalo lowu xikari ka vamatiko, lowu wu nga lezaku Kristu i xikari ka nwina, loyi a nga kutsumba ka kungangamela.
28Hi yena hi mu kanelako, na hi kari hi luleka ni ku gonzisa vanhu vontlhe hi wutlhari gontlhe, lezaku hi fela ku yimisa vanhu vontlhe na va mbhelele ka Kristu.
29Hizalezo nzi tirelako zona mina, na nzilwa khwatsi hi kutira ka ntamu wakwe lowu wu tirako nguvu ka mina.
Currently Selected:
Va le Kolosi 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
