2 Tihosi 6
6
1A vapizani va vaprofeti va te ngalo ka Elixa: A yindlu leyi hi tshamako ka yona mahlweni ka wena, a yi eneli.
2A hi fambeni le Jordani, a munwe ni munwani i ta ya rwala a mhanze, kasi hi fela ku aka yinwani kwalaha. Yena i te ngalo: Fambani!
3A munwe wabye i te ngalo kakwe: Ngha u fambawu zinwe ni malanza ya wena. Yena i te ngalo: Nzi ta famba.
4I lo famba navo. Va lo chikela le Jordani va tsema timhanze.
5Kanilezi laha munwani a nga wa tsema a mhanze, a xihloka xi lo kunuka xi wela lomu matini. I loba huwa, aku: Nzi ta kuyini, hosi yanga! hakuva xi wa hi xo lomba.
6A munhu wa Nungungulu i te ngalo: Xi wele kwihi? I lo komba Elixa. Elixa a tsema a linhi a li hoxa kwalaho, a xihloka xi si deluka.
7Zonake aku: Xi teke. Yena i lo nawuluta a canja gakwe a xi teka.
A maSiria malwa ni va ka Israeli.
8Makunu a hosi ya le Siria yi lo hlomelana ni va ka Israeli; i lo tsema xikungo ni malanza yakwe, aku: A wugovelo ga mina gi tava laha ko kari.
9Kanilezi a munhu wa Nungungulu i lo ya tivisa a hosi ya ka Israeli, aku: Ti wonele, u nga hunzi hi wutshamu go kari, hakuva a maSiria ma ta relela hi kwalaho.
10A hosi ya ka Israeli yi lo rumela a vanhu va yona ka wutshamu lego a munhu wa Nungungulu a mu byelileko a kuva a ti wonela. I lo ponisa wutsumbu gakwe, na ku nga hi khati ginwe kutani mambiri.
11A hosi ya le Siria yi lo tshingelwa hi kuchava hi zilo lezo, a vitana malanza yakwe, aku ka wona: Hi nga nzi byelani lezaku himani xikari ka hina a yimelako a hosi ya ka Israeli!
12A munwe wa malanza yakwe i te ngalo kakwe: Hosi yanga, hi Elixa a muprofeti loyi a nga tikweni ga ka Israeli; hi yena a byelako a hosi ya ka Israeli a timhaka leti u ti wulawulako lomu ndlwini leyi u etlelako ka yona.
13A hosi yi te ngalo: Fambani mu ya wona laha a nga kona; nzi ta rumela a vanhu va ya mu khoma. Va lo mu byela, vaku: I le Dotani.
14Hikwalaho i lo rumela a mahaxi ni tikareta, ni yimpi ya hombe, va famba ni wusiku va ya ranzela muti.
15Laha a nanza ga munhu wa Nungungulu gi nga wa vukile ni mixo gi huma lahandle, gi lo wona a yimpi na yi ranzele a muti na yi hi ni mahaxi ni tikareta. A nanza gakwe giku: Hosi yanga, hi ta maha yini?
16Yena i te ngalo: U nga chavi, hakuva lava va nga na hina va tele ku hunza lava va nga na vona.
17Elixa i lo khongela, aku: Jehova, vulula a mahlo yakwe, kasi a fela ku zi wona. Jehova i lo vulula a mahlo ya nanza gi wona a xitsunga na xi tele hi mahaxi ni tikareta ta nzilo na zi ranzele Elixa. Gen. 32:1
18A maSiria ma lo relela maya ka Elixa, yena a khongela ka Jehova, aku: Lamata a mahlo ya vanhu lava hi wukhumu. Jehova i lo lamata a mahlo yabye, khwatsi hi lezi Elixa a wulileko.
19Elixa i te ngalo kabye: Leyi a hi yona ndlela, hambu ni muti a hi wona lowu. Nzi lanzeleni nzi ta mu chiketa ka munhu loyi mu mu lavako. I lo va heleketa le Samaria.
20Laha va nga wa enghenile lomu Samaria, Elixa i te ngalo: Jehova, va vulule mahlo yabye, kasi va fela ku wona. Jehova i lo vulula a mahlo yabye, va wona lezaku va wa hi laha xikari ka muti wa Samaria.
21Laha a hosi ya ka Israeli yi nga va wona, yi te ngalo ka Elixa: Dada, nzi va daya ke? Nzi va daya ke?
22Elixa aku kakwe: U nga va dayi. U wa ta daya lava u va khomileko hi matlhari ya wena ni wura ga wena ke? Va nyike zakuga ni mati kasi va fela kuga vanwa, va ta tlhelela ka hosi yabye.
23A hosi ya ka Israeli yi lo va mahela a kuga ko tala, yaga vanwa, a salisana navo, va tlhela va ti fambela ka hosi yabye. A mabutho ya maSiria a ma ha engetangi kambe mata lomu tikweni ga ka Israeli.
24Anzhako ka lezo Ben-Hadade a hosi ya Siria i lo tsombanyisa yontlhe yimpi yakwe a kanziha ku ya hlasela Samaria; i lo ya vimbezela a muti.
25A ndlala yi lo kula nguvu lomu mutini wa Samaria, kuva ni hlomulo wa hombe nguvu, laha ka kuva a hloko ya mbongola yi xabyiwa hi 80 wa maxekeli, a xipanze xa wumune xa wubheketse ga swanyi wa tuva xi xabyiwa hi ntlhanu wa maxekeli ya siliva.
26Makunu laha a hosi ya ka Israeli yi nga wa hunza hi le hehla ka ligingisi, a wasati i lo yi vitana, aku: Nzi hlangute, hosi yanga!
27A hosi yi te ngalo kakwe: Loku Jehova a nga ku hlanguti, mina nzi ta ku hlanguta hi yini? Hi lezi zi humako hi lomu nzhimbyeni kutani hi lezi zi humako hi lomu xigowolweni ke?
28A hosi yi lo engeta yiku kakwe; Na ya kuva mhaka muni u nga nayo? A wasati aku: Loyi wasati i ngalo ka mina: A hige a nʼwana wa wena nyamutlha, manziko hi taga wa mina. Levi 26:29; Deut. 28:53, 57
29Zinghaho hi bhikile a nʼwana wa mina higa. Makunu a siku gi gamelako nzi te ngalo kakwe: Nehawu wa wena higa: kanilezi yena i fihlile wakwe.
30Laha a hosi yi ngazwa timhaka leto ta wasati, yi lo hanzula a tinguwo ta yona. Na a hunza hi le hehla ka ligingisi, a vanhu va lo mu wona lezaku i wa ambele a tinguwo ta tisakwa a ti maha zirangiso.
31Zonake i te ngalo: Nungungulu a engete hi ntamu, loku a hloko ya Elixa nʼwana Xafate yi tshama hehla kakwe nyamutlha!
32Elixa i wa tshamile lomu ndlwini yakwe zinwe ni masingalakati. A hosi yi lo mu rumela a munwe wa malanza ya yona. Na wu nga se chikela a ntsumi, Elixa i te ngalo ka masingalakati: Langutani a nʼwana wa mudayi, loyi a rumelako a munhu a ku ta nzi tsema a hloko! Langutani! Loku a ntsumi wu chikela, valani livati, mu mu susumeta ha lona. Ma zizwa a zigingi za hosi yakwe yi mu lanzako ke?
33Laha a nga wa ha wulawula navo, a ntsumi wu lo relela, wu taku kakwe: Languta a mhango yi tako hi ka Jehova! Xana nza ha rinzela yini ka Jehova ke?
Currently Selected:
2 Tihosi 6: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
