2 Tihosi 5
5
Namani a munhu wa hlokonho.
1Makunu Namani a nduna ya yimpi ya hosi ya le Siria i wa hi munhu wa hombe mahlweni ka hosi yakwe, a hi wo dzunzeka, hakuva Jehova i wa nyikile kuhlula ka maSiria ha yena. Na a ngha yena a hi wanuna wa nhenha, kanilezi na hi ni hlokonho.
2A maSiria ma wa hlomile a yimpi, ma ya khoma a nhanyana le tikweni ga ka Israeli, a ta tirela a sati wa Namani.
3Yena i te ngalo ka nwinyi wakwe: Loku a hosi ya mina yiya ka muprofeti loyi a nga le Samaria, i wa ta mu hanyisa.
4Namani i lo yisa timhaka leto ka hosi yakwe, a yaku: A nhanyana loyi a tako hi le tikweni ga ka Israeli i wulile lezi ni lezi.
5A hosi ya le Siria yi te ngalo: Suka u famba, nzi ta rumela a papilo ka hosi ya ka Israeli. I lo suka a teka a 10 wa titalenta ta siliva, ni 6,000 wa maxekeli ya nzalama, ni 10 wa tinguwo to saseka.
6Yena i lo yisa a papilo ka hosi ya ka Israeli gi nge ngalo: Loku gi chikela a papilo legi ka wena, u ta zi tiva lezaku nzi rumela Namani a nanza ga mina, kasi wena wa fela ku mu chuma a hlokonho yakwe.
7Makunu laha a hosi ya ka Israeli yi nga wa gonzile a papilo, yi lo hanzula a tinguwo ta yona, yiku: Kasi mina nzi Nungungulu loyi a zi kotako ku daya ni ku hanyisa, lezi a munhu loyi a rumelako a munhu lezaku nzi mu hanyisa a hlokonho yakwe ke? Hlolisisani, mu pimisisa mu ta wona lezaku i lava ku holova na mina. Deut. 32:39; 1 Sam. 2:6
8Laha Elixa a munhu wa Nungungulu a nga wa zi zwile lezaku a hosi ya ka Israeli yi hanzule a tinguwo ta yona, i lo rumela a munhu ka hosi, a yaku: Hi kuyini u hanzula a tinguwo ta wena ke? A ate seno ka mina, kasi a fela ku zi tiva lezaku lomu tikweni ga ka Israeli ku na ni muprofeti.
9Zonake Namani i lo chikela ni mahaxi yakwe ni kareta yakwe, a ta yima laha nyangweni ya yindlu ya Elixa.
10Elixa i lo rumela a munhu a yaku kakwe: Famba u ya hlamba 7 wa zikhati le Congweni wa Jordani, a nyama ya wena yi ta hanya, u hlazeka. Joh. 9:7
11Namani i lo zangara, a suka a famba, na aku: Mina nzi waku i ta huma ata ka mina a ta khongela ka Jehova Nungungulu wakwe, a nzi phuphutela hi canja gakwe, a nzi chuma a hlokonho ya mina.
12Mina a nziku yi kona micongo le Damasku, vaAbana, na Farpara, a yi hunzi wontihe a mati ya tiko ga ka Israeli ke? Ngha nzi nga hlambangi ka yona rizi hlazeka ke? Zinghaho i lo tlhela a famba na a zangarile.
13Kanilezi a malanza yakwe ma lo tshinela kusuhani kakwe, maku: Dada, loku muprofeti a wa ku byelile a xilo xo binza, ngha u nga xi mahi ke? Makunu loku a ku byelile ku ngalo hlamba u ta hlazeka, a ku faneli a kuva u zi maha lezo ke?
14Zonake Namani i lo relela a ya ti peta 7 wa zikhati le Jordani, khwatsi hi kuwula ka munhu wa Nungungulu; zonake a nyama yakwe yi lo hola yi fanana ni nyama ya xihlangana, a hlazeka. Lu. 4:27
15Namani i lo tlhela ni vanhu vakwe aya ka munhu wa Nungungulu; laha na chikele i lo yima mahlweni kakwe, aku: Nza zi tiva lezaku a nga kona Nungungulu lomu misaveni yontlhe, saseka lomu tikweni ga ka Israeli. Makunu amukela a xinyikiwo lomu canjeni ga nanza ga wena.
16Kanilezi Elixa i te ngalo: Nzi hlambanya ha Jehova a hanyako, loyi nzi mu khozelako, lezaku cima nzi nga ta amukela nchumu. Namani i lo mu kurumeta a kuva a amukela, kanilezi i lo ala.
17Namani i te ngalo: Kota lezi u alako, nzi vumele u nyika a nanza ga wena a misava leyi yi ringanako minzhwalo ya timbongola timbiri, hakuva a nanza ga wena cima a nga ta ha phahlela ka vanwani vanungungulu hi munyikelo wa kuhiswa, ntsena Jehova.
18Kambe Jehova a rivalele a nanza ga wena, loku a hosi ya mina yi enghena lomu ndlwini ka Rimoni a ku ya khizama kona, ni kuva a khegela wokweni ga mina, nzi kala mina nzi khizama lomu ndlwini ya Rimoni; ngha Jehova a rivalele a nanza ga wena loku nzi ya khizama lomu ndlwini ya Rimoni.
19Elixa i te ngalo kakwe: Famba hi kurula. Makunu laha Namani a nga wa fambile a pfhukana,
20Gehazi a nanza ga Elixa a munhu wa Nungungulu, i te ngalo: A hosi ya mina yi tsikile Namani a muSiria loyi, a nga amukelangi lezi a zi nehileko mandleni yakwe. Nzi hlambanya ha Jehova a hanyako, nzi ta tsutsuma nzi mu lanza nzi ya teka nchumu ka yena.
21Zinghaho Gehazi i lo tsutsuma a lanza Namani. Laha Namani a nga wona a munhu na a tsutsuma lenzhako kakwe, i lo chika kareteni a mu khinga, aku: I thenga lezo!
22Yena i lo hlamula, aku: I thenga! A hosi ya mina yi nzi rumile lezi: Ku chikele a vapfhumba va tako hi le xitsungeni xa ka Efraime, a majaha mambiri ya vapizani va vaprofeti. Va nyike a talenta ya siliva ni tinguwo timbiri.
23Namani i te ngalo kakwe: Teka hi titalenta timbiri. I lo mu kurumeta a chela titalenta timbiri ta siliva lomu ka mikwama mimbiri zinwe ni tinguwo timbiri, a zi rwexa malanza mambiri kuwoneni ka Gehazi.
24Laha a nga wa chikele le xitsungeni, Gehazi i lo zi teka mandleni yabye a zi veka lomu ndlwini, a tlhelisa a vanhu lavo va famba.
25Kanilezi yena i lo yima mahlweni ka nwinyi wakwe; Elixa i te ngalo kakwe: Uta hi kwihi Gehazi? Yena aku: A nanza ga wena gi wa nga yangi ka kuya.
26Kanilezi Elixa i te ngalo kakwe: Kasi a moya wa mina wu wa nga hi kona laha a munhu a nga chika kareteni yakwe a ku khinga ke? Kasi lexi hi xona xikhati xa ku teka a mali ni tinguwo ni maoliva, ni mavina, ni tiyivu, ni tihomu, ni malanza ya xinuna ni ya xisati ke?
27A hlokonho ya Namani yi ta namarela ka wena ni vana va wena kala kupinzuka. Zonake Gehazi i lo suka mahlweni kakwe na a tele hi hlokonho leyi yi fananako ni gapongo. Ekso. 4:6; Mitse. 12:10
Currently Selected:
2 Tihosi 5: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
