2 Va le Korinte 8
8
A hlengo wo vunetela a vobasa.
1Kambe vamakabye, ha mu tivisa hi tipswalo ta Nungungulu leti ti nyikilweko mabandleni ya le Makedonia.
2Hambu lezi va nga hi nzhingweni wa kuxaniseka ka hombe va wa tsaka nguvu, ni lomu wusiwaneni gi etileko va lo nyikela hi matsenya. Mar. 12:44
3Nzi va mahela wukustumunyu lezaku va lo nyikela hi kuranza kabye kotisa a ntamu wabye, ina ni ku hunza a ntamu wabye.
4Va lo hi khongotela nguvu lezaku va nyikwa a thomo ga ku hlengela na hina a ku vunetela lavo vo basa. Miti. 11:29; 24:17; Rom. 15:25; 1 Kor. 16:1, 3, 4
5A va nyikangi lezi hi nga tsumbile zona ntsena, kanilezi va lo ranga va ti nyikela ka Hosi, zonake va lo ti nyikela ka hina hi kuranza ka Nungungulu. Mat. 25:40; Fil. 4:18; Maheb. 13:16
6Hikwalaho hi lo kombela Titusi lezaku a hetisa a ntiro lowu xikari ka nwina, kota lezi a nga yena a nga wu sangulisa. Xip. 12:18
7Kota lezi mu anzileko zilweni zontlhe: hi kukholwa, hi kuwulawula, hi kutiva, hi kupinyama kontlhe, hi liranzo leli mu hi ranzako ha lona, ngha ma mu anza ntirweni lowu kambe. Tis. 112:9; Mav. 22:9; Mat. 19:21; Mar. 10:21; 1 Kor. 1:5; 12:13; Xip. 9:8
8A nzi wuli lezi hi ku mu laya, kanilezi nzi lava ku mu ringa hi wunene ga vanwani, nzi wona loku a liranzo la nwina li hi li nene. 1 Kor. 7:6
9Hakuva ma ti tiva a tipswalo ta Hosi ya hina Jesu Kristu, lezaku hambu lezi a nga fumile, i lo maha xisiwana hi kota ya nwina, lezaku nwina mu fela ku fuma hi kota ya wusiwana gakwe. Mat. 8:20; Lu. 9:58; Fil. 2:6, 7
10A mhakeni leyi nza mu byela a kualakanya ka mina: zi mu fanele nwina hakuva a nwecemu mu rangele vontlhe a ku tira ni ku ranza a ntiro lowu. Mav. 19:17; 1 Kor. 7:25; 1 Tim. 6:18
11Makunu mbhetisani a ntiro wa kona, lezaku kota lezi ku nga hi kona a kulonga, ngha ku hi kona kambe a kumbhetisa kota a ntamu wa nwina.
12Hakuva loku ku hi kona kuxuva ku nyika, a xinyikiwo xa amukeleka kotisa lezi munhu a nga nazo, na ku nga kotisi lezi a nga hiko nazo. Mar. 12:43, 44; Lu. 21:3
13Hakuva a nzi wuli lezi lezaku vanwani va ta hehukelwa, nwina mu binzwa;
14kanilezi ku fela ku ecanyiswa; lezaku a xikhati lexi a pfuno wa nwina wu ta vuna a kuvumala kabye, kasi a pfuno wabye wu fela ku vuna kuvumaleni ka nwina, lezo ku tava kona kuringana;
15kota lezi ku tsalilweko ku ngalo: Loyi a wungeletelako nguvu a nga salangi ni nchumu, ni loyi a wungeletelako kutsongwani a nga vumalangi nchumu, Ekso. 16:18
16A ku bongiwe Nungungulu loyi a nyikileko Titusi yaleyo mbilu ya ku mu pinyamela.
17Hakuva i lo vumela khwatsi a kukhongotela ka hina kota lezi a nga pangamile nguvu i lo suka ata ka nwina hi kuranza kakwe yena nwinyi.
18Hi mu rumile zinwe ni makabye munwani, loyi a dzunziwako mabandleni wontihe hi kota ya ntiro wakwe ivangelini; Xip. 12:18
19na ku nga hi lezo ntsena, kanilezi kambe i lo yimiswa hi mabandla wontihe a kuva a hi pangalata a ntirweni lowu wa wuxinji, lowu hi wu tirelako lezaku yi dumiswa a Hosi, ni ku wonisa a kuxuva ka hina. 1 Kor. 16:3; Xip. 4:15
20Hi ti tlharihela hi lezo, lezaku hi nga soliwi hi munhu hi kota ya hlengo wa hombe lowu wu tiriwako hi hina. Efe. 5:15
21Hakuva hi chela kota hi zilo zi nene, na ku nga hi mahlweni ka Hosi ntsena, kanilezi ni mahlweni ka vanhu. Rom. 12:17; Fil. 4:8; 1 Ped. 2:12
22Hi va rumile zinwe ni munwani makabye wa hina, loyi hi mu kumileko zikhati zinyingi na a pangamile zilweni zo tala, kanilezi makunu i pangamile nguvu hi kota ya kutsumba kakwe ka hombe ha nwina.
23Makunu loku ku hi Titusi, makabye ni xitiri-kulori ka nwina; hi tlhelo ga vamakabye vanwani va hina, mitsumi ya mabandla ni wudzunzo ga Kristu. Fil. 2:25
24Hikwalaho kombisani ka vona mahlweni ka mabandla a xiwoniso xa liranzo la nwina, ni xa kutidzunza ka hina hi kota ya nwina.
Currently Selected:
2 Va le Korinte 8: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
