2 Va le Korinte 10
10
Paule a ti hlamulela hi tlhelo ga ntiro wakwe.
1Mina Paule wutsumbu nza mu khongotela hi wunene ni kurula ka Kristu, mina loyi nzi ti koramisako loku nzi hi xikari ka nwina, kanilezi loku nzi hi hava nzi maha wurena ka nwina. Rom. 12:1
2Ina, nza mu khongotela lezaku mu nga nzi kurumeti loku nzita ku maha hi wurena ka vanwani lava va wulako lezaku hi famba hi ka nyama. 1 Kor. 4:21
3Hakuva hambu hi famba na hi ka nyama a hilwi hi ka nyama.
4Hakuva a matlhari ya hina a hi ya nyama, kanilezi nja ntamu mahlweni ka Nungungulu a ku hahlula makhokhola. Jer. 1:10; Efe. 6:13; 1 Tes. 5:8
5Hi hangalasa a maalakanyo, ni tigingisi tontlhe leti ti tlakukileko to bhiyela a kutiva ka Nungungulu, hi khozisa a maalakanyo wontihe mava tikhumbi ta ku ingisa Kristu; 1 Kor. 1:19; 3:19
6loku ku mbhelele a kuingisa ka nwina, nzi tava nzi longile a ku tsayisa kontlhe a kungaingisi. Xip. 7:15; 13:2
7Cuwukani, za su dlunya mahlweni ka nwina. Loku munhu a ti tsumba lezaku ngwa Kristu, ngha a alakanya lezaku kota lezi yena a nga wa Kristu, hi zalezo na hinawu. 1 Kor. 14:37; Xip. 11:23; 1 Joh. 4:6
8Hakuva hambu loku nzi ti dzunza hi kota ya ntamu wa hina, lowu a Hosi yi nga hi nyika wona kasi mu akiwa ha wona, na ku nga hi lezaku mu hahlulwa, mina nzi nga ta wiswa tingana;
9kasi ku nga woneki ku khwatsi nzo lava ku mu dzukisa hi mapapilo ya mina.
10Hakuva ve ngalo: A mapapilo yakwe ma tika ma na ni ntamu, kanilezi loku a hi kona yena wutsumbu i na ni gome, ni kuwulawula kakwe ka nyenyeka, 1 Kor. 1:17; Gal. 4:13
11Loye a wulako lezo a pime lezaku lezi hi zi tsalako mapapilweni loku hi nga hi kona, hi ta maha zalezo loku hi chikela.
12Hakuva a hi tiyi ku ti hlaya kutani ku ti ecanyisa ni vokari lava va ti dzunzako wutsumbu gabye; kanilezi a va hi na kupima, hakuva va ti ringanyisa ni wutsumbu gabye, ni ku ti ecanyisa ni wutsumbu gabye ntsena. Xip. 5:12
13Kanilezi hina hi nga ta ti dzunza ku tlula mpimo, kanilezi hi ta ti dzunza hi mpimo lowu hi tsemelweko wona mbhingano hi Nungungulu, lowu wu chikeleko ni ka nwina.
14Hakuva a hi kilaveteli hi ntamu, a ku khwatsi hi loku hi nga chikelangi ka nwina; hakuva hi chikele ni kwaleyo ka nwina hi ivangeli ya Kristu. 1 Kor. 9:1
15A hi ti dzunzi ku tlula mpimo mitirweni ya vanwani vanhu; kanilezi ha tsumba lezaku, a kukholwa ka nwina loku ku anzile, hina hi ta kuliswa xikari ka nwina, kasi a mbhingano wa hina wa engetelwa. Rom. 15:29
16Lezaku kasi ha kanela ivangeli ni ka matlhelo lawa ma nga mahlweni ka nwina, hi nga ti dzunzi tlhelweni ga munwani hi zilo lezi zi sinako zi tirilwe kona.
17Kanilezi loyi a ti dzunzako, ngha a ti dzunza Hosini. Isa. 65:16; Jer. 9:24; 1 Kor. 1:31
18Hakuva yena loyi a ti dzunzako a hi yena a amukelekako, kanilezi sine loyi a dzunziwako hi Hosi. Mav. 27:2; Lu. 18:10; Rom. 2:29; 1 Kor. 4:5
Currently Selected:
2 Va le Korinte 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
