1 Samueli 7
7
1A vanhu va le Kiriate-Jearime va lo ta teka arke ga Jehova va famba nago, va ya gi enghenisa lomu ndlwini ya Abinadaba le xitsungeni. A mufana wakwe Eleazare i lo basiselwa a ntiro wa ku hlayisa a arke ga Jehova.
2A arke gi lo tshama le Kiriate-Jearime xikhati xa hombe nguvu, kala ku mbhela 20 wa malembe, na yontlhe yindlu ya ka Israeli yi kari yi rilela Jehova. Samueli a maha mulamuli wa ka Israeli.
3Zonake Samueli i lo wulawula ka yontlhe yindlu ya ka Israeli, aku: Loku nwina mu xuva ku tlhelela ka Jehova hi timbilu ta nwina tontlhe, susani xikari ka nwina a vanungungulu va matiko ni maAxtarte, mu tiyisa timbilu ta nwina ka Jehova, mu khozela yena yece; hi kona a ta nga mu tlhatlhisa mandleni ya vaFilistia. Deut. 6:4; Mat. 4:10; Lu. 4:8
4Zonake a va ka Israeli va lo susa maBaali ni maAxtarte va khozela Jehova yece.
5Samueli i te ngalo: Tsombanyisani vontlhe va ka Israeli le Mizpa, zonake nzi ta mu kombelela ka Jehova.
6Va lo tsombana le Mizpa, vakha mati va ma cheletela mahlweni ka Jehova. Va lo yila va ngagi nchumu siku lego, vaku: Hi gohele Jehova! Samueli i lo lamula a vanana va ka Israeli le Mizpa.
7Makunu laha a vaFilistia va ngazwa lezaku a va ka Israeli va tsombene le Mizpa, a tihosi ta vaFilistia ti lo kanziha a ku yalwa ni va ka Israeli. Laha a va ka Israeli va ngazwa lezo, va lo rurumela va chava vaFilistia.
8A va ka Israeli vaku ka Samueli: U nga gumesi ku hi kombelela ka Jehova Nungungulu wa hina, kasi a fela ku hi ponisa mandleni ya vaFilistia.
9Samueli i lo teka a xiyivana xa ha anwako, a xi nyikela xontlhe xi maha munyikelo wa kuhiswa ka Jehova. Zonake Samueli i lo khongelela va ka Israeli ka Jehova, na Jehova i lo mu hlamula.
10Khwatsi hi lezi Samueli a nga ha maha munyikelo wa kuhiswa, a vaFilistia va lo tshinela ku talwa na Israeli. Kanilezi Jehova i lo maha tilo gi dzinza nguvu hi ntamu hehla ka vaFilistia, a va vilinganyisa, va hluliwa hi va ka Israeli.
11A va ka Israeli va lo huma hi le Mizpa va hlongola vaFilistia, va va hlasela kala va chikela le hasi ka Beti-Kare.
12Zonake Samueli i lo teka a ribye a gi yimisa xikari ka Mizpa ni Xena, a gi chula vito ga Ebenezer, aku: Kala ni lezi Jehova i hi vunetele.
13Zinghaho a vaFilistia va lo hluliwa. Cima a va engetangi kambe vata tikweni ga ka Israeli, hakuva a canja ga Jehova gi wa vukela vaFilistia ka wontihe masiku ya Samueli.
14A miti leyi yi nga wa tekilwe hi vaFilistia, yi tlhelela ka va ka Israeli, kusukela le Ekroni kala le Gati, Israeli i lo tlhatlhisa a matikwana lawo mandleni ya vaFilistia. Kanilezi ku wa hi kona kurula xikari ka va ka Israeli ni maAmori.
15Samueli i lo lamula Israeli wontihe masiku ya wutomi gakwe.
16Lembe ni lembe Samueli i wa Suka a renzelekela aya Beteli, ni le Gilgali, ni le Mizpa, a famba a lamula va ka Israeli mitini leyo yontlhe.
17Zonake a wuya kaya kakwe le Rama; hi kwaleyo a nga wa tshama kona a lamula Israeli. I wa akile a alati ga Jehova leyo.
Currently Selected:
1 Samueli 7: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
