1 Samueli 27
27
Davida a aka xikari ka vaFilistia.
1Zonake Davida i lo alakanya mbilwini yakwe, aku: Ginwani siku nzi ta kala nzi dawa hi Saule; ku hava yinwani ndlela, ahandle ko tsutsumela tikweni ga vaFilistia, kasi Saule a fela ku kala a nga ha nzi hloti lomu tikweni gontlhe ga ka Israeli; zonake nzi ta pona canjeni gakwe.
2Davida i lo suka ni vanhu vakwe va 600 wa vavanuna vaya ka Akixi nʼwana Maoke a hosi ya le Gati.
3Davida i lo tshama na Akixi le Gati, zinwe ni vanhu vakwe, loyi ni loyi i wa hi ni ngango wakwe. Yenawu Davida i wa hi ni vasati vakwe va vambiri, Ahinoame a muJezreeli, na Abigaili a sati wa Nabali wa le Karmeli.
4Zonake ku lo ya byelwa Saule lezaku Davida i chavele le Gati, na yena a nga ha engetangi kambe a mu hlota.
5Davida i te ngalo ka Akixi: Loku mina nzi kumile thomo mahlweni ka wena, a va nzi nyike wutshamu ka munwe wa miti ya le handle nzi aka ka wona. Xana a nanza ga wena gi ta akela yini lomu mutini wa wena wa zinza ke?
6Zonake Akixi i lo nyikela Ziklagi lego siku; hikwalaho Ziklagi i lo lumba tihosi ta ka Juda kala legi siku.
7A tsengo wa masiku lawa Davida a nga tshama lomo tikweni ga vaFilistia, ku wa hi lembe ginwe ni mune wa tihweti.
8Davida zinwe ni vanhu vakwe va lo kanziha va ya maha xijumani le Gexura, ni le Girze, ni le ka maAmaleki, hakuva a matiko lawo ma wa hi ni vanhu lava va nga wa akile kale hi tlhelo ga le Xura, kala le tikweni ga le Gipite.
9Davida i lo hlasela a tiko lego, a daya vavanuna ni vavasati, a teka a zifuyo, ni timbongola, ni makameli, ni tinguwo, zonake a tlhelela ka Akixi.
10Makunu loku a mu wutisa, aku: Mu wa loya hlasela kwihi nyamutlha? Davida i te ngalo: Hi loya hlasela le Dzongeni ga le Juda, ni le Dzongeni ga le Jerameeli, ni le Dzongeni ga le ka maKeni.
11Davida a nga siyangi ni munwe wo hanya, xikari ka vavanuna ni vavasati kasi ku ta bika ha yena le Gati, hakuva i wa chava lezaku va ta mu hleva, vaku: Davida i mahile lezi ni lezi. Hikwalaho i wa tolovela ku maha lezo xontlhe xikhati lexi a nga tshama tikweni ga vaFilistia.
12Kanilezi Akixi i wa mu tsumba Davida, aku: Yena i maha a nzhukano leyo ka va ka Israeli vabye hi lezi va mu swirako, kanilezi ka mina i ta simamisa a maha nanza ga mina xontlhe xikhati.
Currently Selected:
1 Samueli 27: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
