1 Samueli 26
26
Davida a ala kambe ku daya Saule.
1A vaZife va lota ka Saule le Gibea, va taku: Davida hi gaya, i fihlele le xitsungeni xa Hakila lexi xi cuwukeneko ni xiwula.
2Zonake Saule i lo suka a relela aya xiwuleni xa le Zife na a hi ni 3,000 wa vavanuna, a milangelwa ya va ka Israeli, a ya hlota Davida.
3Saule i lo ya gova le xitsungeni xa Hakila lexi xi cuwukeneko ni libala, kusuhani ni ndlela. Kanilezi Davida i wa tshamile lomu xiwuleni. I lo wona lezaku Saule i tile lomu xiwuleni ku ta mu hlota.
4Hikwalaho Davida i lo ruma tihloli, na a tiva lezaku Saule i chikele hakunene.
5Davida i lo suka aya laha Saule a nga wa govile kona; Davida i lo wona wutshamu lego Saule a nga wa etlele ka gona na Abneri nʼwana Neri, a nduna ya yimpi yakwe. Saule i wa etlele xikari ka tikareta, a vanhu na va govile va mu ranzela wontihe matlhelo.
6Zonake Davida i lo wulawula na Ahimeleki a muHiti, na Abixai nʼwana Zerua a nakulobye wa Joabe, aku kabye: Himani a ta nga famba na mina le wugovelweni ga Saule? Abixai i te ngalo: Mina nzi ta famba na wena.
7Zonake Davida na Abixai va lo ya chikela lomu xikari ka yimpi ni wusiku, zonake va lo wona Saule na etlele wurongo lomu xikari ka tikareta, a tlhari gakwe na gi zimile lahasi hi le hlokweni yakwe. Kanilezi Abneri ni vanhu va tiko va wa etlele va mu ranzela.
8Abixai i te ngalo ka Davida: Inyamutlha Nungungulu i ku nyikile a nala wa wena mandleni ya wena; makunu nzi vumele nzi mu gwaza hi tlhari, nzi ta tekela ku mu phondlisa khatiginwe, nzi nga ha engeti ga wumbiri.
9Davida i te ngalo ka Abixai: U nga mu dayi, hakuva himani a ta nga tlakusa a canja gakwe hehla ka a totilweko wa Jehova a nga kumi nanzu ke?
10Davida i te ngalo: Nzi hlambanya hi Jehova a hanyako, Jehova yece hi yena a ta nga mu lovisa, kutani ku chikelelwa hi masiku ya kufa kakwe, kutani kuya le yimpini aya dawa kona!
11Jehova a a nzi beletele a ku tlakusa a canja ga mina hehla ka a totilweko wa Jehova! Kanilezi teka a tlhari lego gi nga le hlokweni yakwe, ni nghotso ya mati hi famba!
12Zinghaho Davida i lo teka a tlhari ni nghotso le hlokweni ya Saule va ti fambela. Kanilezi ku wa nga hi kona a munhu a nga va wonile hambu ku va tiva. Ku wa nga hi kona ni munwe wa kuva a nga vuka, hakuva va wa etlele vontlhe; Jehova i wa va etlelisile wurongo go eta.
13Zonake Davida i lo tlhatuka aya ka ginwani tlhelo, a ya yima hi le hehla ka xitsunga hi le kule; laha xikari kabye ku wa hi ni pfhuka wo leha.
14Davida i lo kanyuluka ka yimpi ni ka Abneri nʼwana Neri, aku: Kaxana a ku hlamuli, Abneri ke? Abneri i lo hlamula aku: Hi wena mani loyi u vitanako hosi ke?
15Davida i te ngalo ka Abneri: A hi wena nhenha ke? Himani a fananako na wena lomu ka Israeli ke? Hi kuyini u nga kala ku hlayisa a hosi ni nwinyi wa wena ke? Hakuva ku tile munwani munhu a ku ta daya hosi, a nwinyi wa wena.
16A hi zi nene lezi u mahileko. Nzi hlambanya hi Jehova a hanyako, nwina mu fanele kufa, hakuva a mu hlayisangi a hosi ya nwina, loyi a totilweko wa Jehova. Makunu gi kwihi a tlhari ga hosi ni nghotso yakwe ya mati, lezi zi nga wa hi le hlokweni yakwe ke?
17Saule i lo tiva a gezu ga Davida, aku: Xana a hi gezu ga wena nwananga, Davida ke? Davida i lo hlamula, aku: I gezu ga mina, hosi yanga!
18I lo wutisa aku: Hi kuyini a hosi ya mina yi hlongola a nanza gakwe? Xini nzi mahileko? Xionho muni xi nga mandleni ya mina?
19Makunu a hosi ya mina ngha yi ingisa a gezu ga nanza ga yona! Loku ku hi Jehova a ku kucetelako ku nzi hlongolisa, a amukele muphahlelo! Kanilezi loku va hi vanhu, a va rukatelwe mahlweni ka Jehova, hakuva va nzi hlongole va nzi beletela kuva ni xiavelo tshombeni ya Jehova, vaku: Famba u ya khozela vanwani vanungungulu.
20Hikwalaho a nkhata wa mina wu nga dzuki wu wela lahasi kule ni nghohe ya Jehova, hakuva a hosi ya ka Israeli yi humile a ku ta hlota a cuwani, khwatsi hi loku munhu a hlongolisa tihwari lomu zitsungeni.
21Zonake Saule i te ngalo: Nzi onhile! Wuya nwananga, Davida! Hakuva nzi nga ta ku maha mhango, hakuva inyamutlha a wutomi ga mina gi wa hi malongo nguvu mahlweni ka wena. Languta, mina nzi mahile wupumbu, nzi hoxile nguvu.
22Davida i lo hlamula, aku: Hi legi tlhari ga hosi; a kute ginwani jaha ga wena gi ta gi teka.
23Jehova i ta tlhelisela ka munwe ni munwani hi wunene gakwe ni kutsumba kakwe, hakuva inyamutlha Jehova i wa ku vekile mandleni ya mina, kanilezi mina a nzi ranzangi a ku tlakusa a canja ga mina hehla ka a totilweko wa Jehova.
24Languta, khwatsi hilezi a wutomi ga wena gi nga wa hi malongo nguvu mahlweni ka mina, zinghaho ni wutomi ga mina gi tava malongo mahlweni ka Jehova; na yena i ta nzi ponisa kuxanisekeni kontlhe.
25Zonake Saule aku ka Davida: Ngha u katekiswa nwananga Davida! Hakunene u ta humelela ka zontlhe lezi u ta nga zi tira. Zinghaho Davida i lo suka a ti fambela, kanilezi Saule i lo tlhela aya kaya kakwe.
Currently Selected:
1 Samueli 26: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
