1 Tihosi 14
14
Ahija a profetela Jeroboamu.
1A xikhati lexo, Abija nʼwana Jeroboamu i lo babya.
2Jeroboamu i te ngalo ka sati wakwe: Suka u ti hunzula, kasi u nga tiveki lezaku u kata Jeroboamu, uya le Xilo. U ta ya kuma muprofeti Ahija, loyi a nga wa wulawulile ha mina lezaku nzi tava hosi ya vanhu lava.
3Teka a khume ga zibaba ni zikhekhetselo ni nghotso ya wulombe uya kakwe, i ta ya ku byela lezi zi ta nga maheka ka nwanana loyi.
4A sati wa Jeroboamu i lo maha lezo. I lo suka aya le Xilo a ya enghena lomu ndlwini ka Ahija. Ahija i wa nga ha woni, hakuva a mahlo yakwe ma wa lutsumile hi wukhosana. 1 Sam. 4:15
5Kanilezi Jehova i wa byelile Ahija, aku: Wata sati wa Jeroboamu a ta wutisa hi nwanana wakwe, hakuva wa babya. U ta ta mu byela lezi ni lezi. Loku a chikele i ta ti maha munwani wasati.
6Makunu laha Ahija a ngazwa zigingi za mikonzo yakwe na enghena laha nyangweni, i te ngalo kakwe: Enghena, wena kata Jeroboamu! Hi kuyini u ti hunzula u ti maha munwani munhu? Nzi rumilwe a ku ku byela mahungu yo binza.
7Tlhela u famba ka Jeroboamu u yaku kakwe: Jehova Nungungulu wa ka Israeli i ngalo: Mina nzi ku tlakusile xikari ka vanhu, nzi ku yimisa akuva murangeli wa vanhu va mina va ka Israeli;
8nzi wutla mufumo ndlwini ya Davida, nzi wu nyikela ka wena. Kasike wena a ku fanani ni nanza ga mina Davida, loyi a nga wa hlayisa zileletelo za mina, a nzi lanzela hi mbilu yakwe yontlhe, a maha zo lulama ntsena mahlweni ka mina.
9Wena u mahile kubiha ku hunza vontlhe lava va ku rangeleko; u ti mahele vanungungulu vanwani va zifananiso zi nyekisilweko u nzi zangarisa, u nzi fularela.
10Hikwalaho mina nzi ta rumela khombo ndlwini ya Jeroboamu, nzi ta lobyisa vafana vontlhe va Jeroboamu, lava va tsongwani ni laʼva hombe lomu ka Israeli; nzi ta swiyela a yindlu ya Jeroboamu khwatsi hi loku munhu a swiyela chaka kala gi mbhela.
11Kani hi wihi munhu wa ka Jeroboamu a ta nga fela laha mutini, i ta giwa hi timbyana; ni loyi a ta nga fela khwatini, i ta giwa hi tinyanyani ta tilo, hakuva Jehova i wulile lezo.
12Wena suka u famba kaya. U taku u enghena mutini, a nwanana afa.
13Vontlhe va ka Israeli va ta mu hlaluka, va mu lahla, hakuva hi yena yece wa yindlu ya ka Jeroboamu a ta nga enghena lomu nkeleni, hi lezi hi yena yece wa ka Jeroboamu a kumilweko na lulamile mahlweni ka Jehova Nungungulu wa ka Israeli.
14Jehova i ta yimisa hehla ka va ka Israeli a hosi leyi yi ta nga lovisa a yindlu ya ka Jeroboamu lego siku. Inaka; hambu nyamutlha lezi.
15Jehova i ta hlasela va ka Israeli khwatsi lihlanga li tsekatsekiswako lomu matini, a susa va ka Israeli tikweni legi go saseka a gi nyikileko vararu vabye; i ta va hangalasa le tlhatukweni wa congo, hakuva vona va ti mahele zifananiso za Axtarte, va zangarisa Jehova.
16Jehova i ta nyikela va ka Israeli hi kota ya zionho za Jeroboamu, lezi a zi mahileko ni lezi a onhisileko va ka Israeli ha zona.
17Zonake kata Jeroboamu i lo suka a famba aya le Tirza. I te aku kanziheli a xipimbitsi xa nyangwa, a nwanana a sita.
18Vontlhe va ka Israeli va lo mu lahla, va mu hlaluka khwatsi hi lezi Jehova a wulileko hi nanza gakwe, muprofeti Ahija,
19a yinwani mitiro ya Jeroboamu, ni lezi a nga lwisa zona, ni lezi a nga fumisa zona, zi tsalilwe lomu bhukwini ga Matimu ya tihosi ta ka Israeli.
20Jeroboamu i lo fuma 22 wa malembe. Zonake i lo etlela ni vararu vakwe; a nʼwana wakwe Nadabe i lo fuma xikhundleni xakwe.
Rehoboamu a fumela Juda.
21Rehoboamu nʼwana Solomoni i lo fumela tiko ga Juda. I wa hi ni 41 wa malembe xikhatini lexo a nga sangula ku fuma. I lo fuma 17 wa malembe le Jerusalema, mutini lowu Jehova a wu hlawulileko xikari ka tontlhe tinyangwa ta ka Israeli, a kuva a veka a vito gakwe ka wona. A vito ga mamani wakwe ku wa hi Naama, a muAmoni.
22A va ka Juda va lo maha lezi zi bihileko mahlweni ka Jehova, va mu zangarisa ku hunza vadadani vabye hi zionho lezi va zi mahileko.
23Hakuva vonawu va lo ti akela a maganzelo lomu zitsungeni, lomu ku nga ni zifananiso za Axtarte, va maha lezo ka zontlhe zitsunga zi tlakukileko, ni lahasi ka tontlhe tisinya leti ti hlukako.
24Lomu tikweni ga ka Juda ku wa hi kona a vavanuna lava va nga wa hlawulelwe wubhayi. Va lo anzisa wontihe manyala ya matiko lawa Jehova a nga wa ma hlongole mahlweni ka vanana va ka Israeli. Deut. 18:9; 23:17
25Makunu hi lembe ga wuntlhanu ga kufuma ka Rehoboamu, Xixaka a hosi ya le Gipite i lo kanziha ku ta hlasela Jerusalema.
26I lo ta teka a titshomba ta yindlu ya Jehova, ni titshomba ta yindlu ya hosi, a teka zontlhe. I lo teka ni zitlhangu za nzalama lezi Solomoni a nga wa zi mahile.
27A wutshanwini ka lezo zi tekilweko, Rehoboamu i lo maha zinwani zitlhangu za suku, a zi veka mandleni ya tinduna ta yimpi leti ti hlayisako a nyangwa ya yindlu ya hosi.
28A ka zikhati zontlhe lezi a hosi yi nga waya lomu ndlwini ya Jehova, a varinzeli va wo zi teka va welela, zonake va zi tlhelisa lomu ndlwini ya varinzeli.
29A yinwani mitiro ya Rehoboamu, ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Juda.
30Ka zontlhe zikhati lezo ku wa hi kona kulwa xikari ka Rehoboamu na Jeroboamu.
31Rehoboamu i lo etlela ni vararu vakwe le mutini wa Davida. A vito ga mamani wakwe i wa hi Naama a muAmoni. Zonake Abijamu a nʼwana wakwe i lo fuma xikhundleni xakwe.
Currently Selected:
1 Tihosi 14: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
