Sofoniya 1
1
Gulamudwa nya litigo latshavbo
1 # Wona gambe: 2 Dzipf 22:1—23:30; 2 Dzik 24:1—35:27. Aya khu Mahungu ya Pfhumu Nungungulu ma nga rumedwago ga Sofoniya, mwamana wa Khusi, wa Gedhaliya, wa Amariya, wa Ezekhiya, matshiguni ya Josiya, mwamana wa Amoni, mufumeli wa Judha.
2“Nyi na fuvisa silo satshavbo si guromo mafuni, a ngu ganela Pfhumu Nungungulu.”
3Nyi na mbembisa vathu ni sirengo;
nyi vbedza sinyoni sa damboni
ni dzindzandzi dza phwani;
avo va khunguvanyisago vakwawe
ni va nya guvivbedwa khu monyo,
nyi na fuvisa vathu mafuni,
a ngu ganela Pfhumu Nungungulu.
Tsayiso wa Judha
4Nyi na thawuludza libogo langu nyi bayisa Judha
ni vathu vatshavbo va vbanyago Jerusalema.
Nyi na fuvisa ga wulanga wowu,
esi si nga tshadego sa Bhahali,
nungungulu nya malipha,
ni malina ya vaphasi vaye nya mhamba
ni vaphasedzeli vakone,#1:4 Vaphasedzeli vaye khu vaphasi nya mhamba vale va phaselago Nungungulu, va na diga thumo wawe va landrela Bhahali.
5Nyi na fuvisa ni avo va litago vbatshani nya dzilangwe,
vaya khidzima gasi gu khozela sivangwa sa damboni;
ni vale va nogago va sambanya khu lina la Pfhumu Nungungulu,
aholu na va gu sambanya gambe khu lina la Malikani 6ni vale va ndreyago va diga gu landra Pfhumu Nungungulu,
vale va si theligo kotani khu Uye,
ambari gu mu wudzisa wusingalagadzi.
7Degulani mu khala khu githawo mbeli ga Pfhumu Nungungulu,
kholu litshigu la Pfhumu Nungungulu lomo vbafuvbi ni gu vboha,
Pfhumu Nungungulu dongisede miphaso,
agiside avo a va ranidego.
8Litshigu nya miphaso ya Pfhumu Nungungulu,
nyi na tsayisa manganagana ni sanana sa mufumeli,
ni vatshavbo avo va yedzedzelago maambalelo ya mambe mayigo.
9Litshigu lolo, nyi na tsayisa gambe,
vatshavbo vale va gandrago nvunvuri,
wa vanungungulu nya malipha,
va tadzago nyumba ya mune wawe,
khu silo nya wuvafa va phangago khu dzihanyi ni wudambane.
10Litshigu lolo,
a ngu ganela Pfhumu Nungungulu,
gu na pwala huwa gukhugela Nyangwatunu nya Dzindzandzi,
ni gu keta gukhugela Talalani nya Guphya,
ni ligwaha nya likhongolo gukhugela sigomoni.
11Wombani dzihuwa enu vavbanyi va Makitesi,
kholu vathu vatshavbo Vakhanani va mbembisidwe ni vamahungane vawe vatshavbo,
va vbede vatshavbo va nya wugwewo nya dzitsapawu.
12Khu gikhati gyogyo, nyi na setsha gwadi Jerusalema
nyi mu wenga khu myenge
gasi gu tsayisa vale va gu ghaghaa vbamagimbatunu gwawe,
va khalago na va levide khu vbinyu,
va ganela khu myonyoni gwawe, khavo:
Pfhumu Nungungulu kha kodzi gu gira gilo nya gyadi
ambari nya guvivbe.
13Khu guralo, dzithomba dzawe dzi na phangwa,
dzinyumba dzawe dzi khungumuledwa.
Va na vbaha dzinyumba, aholu kha va na lala umo,
va na yala misimbo nya mihandro nya miuvha,
aholu kha va na sela wadwa wakone.
14Li ngu vboha litshigu nya likhongolo la Pfhumu Nungungulu,
lomo vbafuvbi li nata khu guvbiredza.
Upwani! Litshigu la Pfhumu Nungungulu li na bani liri la wuvi;
ambari ni dzingwazi dzi na keta.
15Litshigu lolo, li na bani liri litshigu nya likhulo,
litshigu nya wuvi ni sigaradzo;
litshigu nya gupfhungumule ni gutshaniseka,
litshigu nya gidema ni guphuma,
litshigu nya mapfhi ni mazuvi.
16Litshigu nya guwombwe pundru,
gu wombwa huwa nya nyimbi
nya gudhumedwe madhoropa ma bhiyidwego
khu siwindri nya tshivba ni dzilangwe nya gulaphe.
17Nyi na pwisa wuvi vathu,
avo va na gimbila khu gu phiphithela nga sikhumu,
kholu va ghohede Pfhumu Nungungulu,
novba wawe wu na vbalaga nga kudzudzwane
ni sirumbi sawe si na khala nga ndzilo.
18Ambari parata ni ndralama yawe,
kha si na kodza gu va vbulugisa,
litshiguni nya likhulo la Pfhumu Nungungulu.
Litigo latshavbo li na dagarela khu nilo
nya likhulo laye.
Ina, kholu a na mbembisa muphelo
vatshavbo va vbanyago mafuni,
mwalo a na vbulugago.
Currently Selected:
Sofoniya 1: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
