Zakariya 3
3
Giwoniso nya wu na: Muphasi nya khongolo nya mhamba Josuwa
1 # Wona gambe: Ezr 5:2; Gutu 12:10. Khu hwane nya ugo, Uye a di nyi yeyedza Josuwa, muphasi nya khongolo nya mhamba, na emide mbeli ga ngilozi ya Pfhumu Nungungulu, Sathane na emide khu nyamudye, gasi gu mu thuledza. 2#Wona gambe: Judh 9. Ngilozi ya Pfhumu Nungungulu yi di embela Sathane, khiyo: “Pfhumu Nungungulu a na gu thele dzitshoni, uwe Sathane! Pfhumu Nungungulu a hathidego Jerusalema, a na gu tsayise uwe Sathane. Ina mwama yoyu khandri a gu fanana ni lihale li dusidwego niloni, gani?” 3Josuwa a di ambade dzingandzu nya dzindzilo gikhati a nga bani a emide mbeli ga ngilozi ya Pfhumu Nungungulu. 4Ngilozi yi di embela avo va nga bani va emide mbeli gwaye, khiyo: “Mu tshuleni dzingandzu dzaye nya gunyenyeze.” Khu hwane a embela Josuwa, khuye: “Wona, nyi gu duside sighoho sago, nyi gu ambagisa dzingandzu nya wuzundzo.” 5A di ganela gambe, khuye: “Mu ambagiseni gihugu nya guage hungoni.” Va di mu ambagisa gihugu nya guage gumogo ni dzingandzu; ngilozi ya Pfhumu Nungungulu na yi gu si wona.
6Khavbo avbo, ngilozi ya Pfhumu Nungungulu yi di embela Josuwa, khiyo: 7“Pfhumu Nungungulu nya Tshivba Yatshavbo, a ngu ganela kharati, khuye:
Wa gu landrisa dzindzila dzangu, u yingisa sileletelo sangu,
u na fumela nyumba yangu, gambe u na sayisa makupakupani gwangu.
Nyi na gu ninga wulanga vbakari ga avo va guromo mbeli gwangu.
8 # Wona gambe: Jer 23:5; 33:15; Zak 6:12. Olu, upwa gwadi, uwe Josuwa, muphasi nya khongolo nya mhamba,
uwe gumogo ni vangana vago va khalago mbeli gwago,
kholu enu mu giwoniso nya guvbanyiswe gu natago;
Eni nyi na resa githumi gyangu nya gupwani Lithungedwa.
9Kholu wonani gukhenu giwindri nyi gi vegidego mbeli ga Josuwa;
vbatshani nya giwindri gegi gya gimwegyo basi, momo livbandre na mavili maho;
wona nya gukhuwe nyi na betha avbo milowo,
gambe nyi na dusa gighoho nya litigo leli khu litshigu limwedo;
a ngu ganela Pfhumu Nungungulu nya Tshivba Yatshavbo.
10 # Wona gambe: Mik 4:4. Ga litshigu lolo, a ngu ganela Pfhumu Nungungulu nya Tshivba Yatshavbo,
moyo ni moyo nya enu a na rana muakelane waye
gasi guta khala mutsani nya uvha waye ni mutsani nya nguhu waye.”
Currently Selected:
Zakariya 3: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
