Zakariya 2
2
Giwoniso nya wuraru: Jerusalema a ngu pimwa
1Nyi di engedza gu khusa maho yangu, nyi wona mwama moyo na pharide ngodzi nya gupime khiyo. 2Eni nyi di mu wudzisa, kheni: “Wa gu hongola hayi?” Uye a di nyi hakha, khuye: “Nya guya pima Jerusalema, gasi guti gulapha ni guanama gwaye.” 3Khavbo avbo, ngilozi yi nga bani yi gu ganela ni eni yi di khuga, yi khingwa khu yimbe ngilozi; 4yi ya yi embela, khiyo: “Tutuma u ya embela lidzaha lile, khuwe: Jerusalema gu na khala kha nga mitalala nyambana mabhiyo khu kotani nya talo nya vathu vaye ni sifuyo saye nya singi. 5Aholu Eni, a ngu ganela Pfhumu Nungungulu, nyi na khala kha nga libhiyo nya nilo li va dzundrulugedego, eni mune kamwe nyi na khala wudhumo waye, vbakari gwaye.”
Sileletelo sivili ga vale va vbagedwego
6 Pfhumu Nungungulu wari, khuye:
Dzi woneleni! Dzi woneleni! Olu thavani khu tigoni ga Wuronga,
kholu eni nyi mi phalalegiside ga dzikhona dza dzina nya litigo,
a ngu ganela Pfhumu Nungungulu.
7Yingisa, uwe Siyoni! Thavani enu mu vbanyago Bhabhiloni.
8Kholu Pfhumu Nungungulu nya Tshivba Yatshavbo,
a ngu ganela kharati, khuye: Hwane nya gu na nyi rumede
ga mayigo ma mu phangidego;
kholu wule a mu kuhago a gu kuha ndzololwane nya liso laye.
9Wonani, eni nyi na khusa gyandza gyangu
nyi va bayisa va fela gu khoziswa khu dzikhumbi dzawe.
Khavbo enu mu na dzitigo gukhenu khu Pfhumu Nungungulu nya Tshivba Yatshavbo a nyi rumedego.
10Embelela khu gunengela uwe nyamahegyane wa Siyoni,
kholu eni nyi nguta nyita vbaha vbakari gwago;
a ngu ganela Pfhumu Nungungulu.
11Khu litshigu lolo,
mayigo nya gutale ma na ta dzi tshanganisa
ga Pfhumu Nungungulu,
va na khala vathu vangu;
nyi na vbanya vbakari gwago, khavbo u na dzitigo gukhuwe
Pfhumu Nungungulu nya Tshivba Yatshavbo, a nyi rumede gwago.
12 Pfhumu Nungungulu a na fumela Judha kha nga thomba yaye
tigoni nya gukatege, gambe a na dzi hathela nyaluphye
lidhoropa la Jerusalema.
13Vathu vatshavbo va na degule mbeli ga Pfhumu Nungungulu,
kholu uye khugide a dzi wonegisa khu Wulangani gwaye nya Guage.
Currently Selected:
Zakariya 2: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
