Mikeya 5
5
Pfhumu nya gurule
1Olu uwe nyamahegyane nya dzinyimbi, tombanisa mabutho nya dzinyimbi,
va hi randrede khu malanga yatshavbo,
va bayisa khu lipitso giwombo
gya mulamuli wa Israyeli.
2 # Wona gambe: Mat 2:6; Joh 7:42. Ni uwe Bhetlehema wa Efrata,
ambari u gu dugwana
vbakari nya mazanazana ya Judha,
khavbo gwago gu na duga uye a na khalago mufumeli wa Israyeli,
uye a nga bani ari gitugulwana
gukhugela gikhatini gya gale,
gukhugela matshiguni ma si vbeligo.
3Khu guralo, a na va ningela
kala gikhati oyu a lumwago a na velegago.
Khavbo vandriyaye va nga tshalago, va na wuyago vata dzi tshanganisa ni va na Israyeli.
4Uye a na simama a havisa vathu
tshivbani ga Pfhumu Nungungulu,
ni wugulu nya tshivba khu lina la Pfhumu Nungungulu waye
avo va na khala mugurulani,
kholu wugulu waye wu na vboha kala mahegiso nya litigo.
5Uye a na bani nari gurula gwathu.
Vaasiriya va gu tshuka va dhumela litigo lathu
va vbindra khu vbakari nya dzinyumba dza vafumeli vathu,
hi na va emisela livbandre na vavili vahavisi
ni livbandre na dzitharu dzindruna dzi na hathwago vbakari nya vathangeli nya lisima.
6 # Wona gambe: Gen 10:8-11. Avo va na mbembisa litigo la Asiriya khu matshari
ni litigo la Ninirodhi, kala dzinyangwani gwalo.
Khu kharati, a na hi vbulugisa mandzani ga Asiriya,
a guta dhumela litigo lathu khu gu ndraga mivbingano yathu.
7Mitshaledwa ya Jakobe,
yi na manega vbakari nya mafumbu nya mangi,
kha nga hunguva yitago khu ga Pfhumu Nungungulu,
kha nga mafesefese nya ndzadzi mwasini,
kha yi na vega gitumbo gyaye ga muthu, ambari gu lirela sanana nya vathu.
8Mitshaledwa ya Jakobe
yi na bani yiri vbakari nya mafumbu nya mangi,
ni vbakari nya vathu nya mangi,
kha nga nghala vbakari nya sirengo nya likhabi,
kha nga ginghalana vbakari nya mitshambi nya dzinvuta,
avbo gi vbindrago,
gi na dzi gandredzela ni gu dzi vbadzulela
nyamba manega muthu nya gu dzi vbulugise.
9Gyandza gyago gi na khusedzwe vbatshani ga avo va gu wugelago,
valala vago vatshavbo va na mbembiswa.
10Khu litshigu lolo, a ngu ganela Pfhumu Nungungulu, khuye:
Nyi na mbembisa dzikavalu dzago,
nyi pfhungumula dzikareta dzago nya nyimbi;
11nyi na khungumulela madhoropa ya tigoni gwago,
nyi thesa vbavbatshi makhokhola yago yatshavbo.
12Nyi na vbedza wuloyi wa mandzani gwago;
khu na nga mana gambe va nya gu lola dzisolo;
13Nyi na fuvisa vbakari gwago
sifananiso sago nya guvatwe
ni sihuru sago nya miphaso,
uwe gima khu na khidzima gambe mbeli nya thumo nya mandza yago.
14Nyi na dusa vbakari gwago sihuru sa vanungungulu vago,
nyi khungumula madhoropa yago.
15Khu likhulo ni giviti gyangu,
nyi na phodza ga mayigo ma ngamba nyi yingisa.”
Currently Selected:
Mikeya 5: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
