Jona 3
3
Gu dzi laya gwa vathu va Ninivha
1Lito la Pfhumu Nungungulu li dita nya wuvili ga Jona, li ta mu embela, khilo: 2“Khuga u hongole Ninivha, lidhoropa nya likhongolo, u ya huwelela magana nyi na gu embelago.” 3Khavbo avbo, Jona a di khuga a hongola Ninivha, kha nga idzo a ganedego khidzo Pfhumu Nungungulu. Ninivha a diri lidhoropa nya likhongolo ngudzu mbeli ga Nungungulu, li di gu dzega matshigu mararu gu li dzuwuluga. 4#Wona gambe: Mat 12:41; Luk 11:32. Jona a di bela dhoropani a gimbila litshigu rumba a huwelela, khuye: “Gu nga tshade gipimo nya magumana matshigu, Ninivha gu na pfhungumudwa.”
Gu vbindrugedza ga Vaninivha
5Vathu va Ninivha va di khodwa ga Nungungulu, va emisa litshigu nya guhale, va ambala dzisaku, gukhugela avo nya vakhongolo kala avo nya vadugwane. 6Mahungu yaya ma di vboha dzindzeveni ga mufumeli wa Ninivha; uye a di khuga khu vbagikhalotunu gwaye nya wufumu, a tshula dzingandzu nya wufumu, a ambala dzisaku, a puluwundra ngumani. 7A di rumela gukhuye gu wombwa pundru tigoni gwa Ninivha, gupwani: “Khu gurumela ga mufumeli ni vathangeli vaye, vathu ni sirengo, mitshambi nya dzinvuta ni dzimombe va nga hodzi gilo; ambari gu sela mati! 8Aholu, vathu ni sirengo va na ambale dzisaku, va lila khu tshivba yawe yatshavbo ga Nungungulu. Muthu ni muthu a leya ndzilani gwaye nya guvivbe a hambane ni wughevenga wa mandzani gwaye. 9A gu dzina saye Nungungulu a na dzi laya a bosa giviti nya likhulo laye, gasi hi si mbembi.”
10Nungungulu a di wona esi va nga girago, nidzo va nga vbindrugedzago khidzo ndzilani gwawe nya guvivbe. A di dzi laya khu guvivba a nga vbweta gu va girela, a si va mbembisi kha nga a nga bani na ganede.
Currently Selected:
Jona 3: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
