Jona 2
2
Nombelo wa Jona ndrani nya ndzandzi
1Jona a di lombelela ga Pfhumu Nungungulu waye, nari ndrani nya ndzandzi.
2A ganela, khuye:
“Wuvini gwangu, nyi lide ga Pfhumu Nungungulu;
uye a nyi ninga phindrulo;
khu phalani nya vafi,
nyi lide gasi gu mana giphaso,
uwe u pwide huwa yangu.
3Kholu uwe u nyi rinyide guetani,
monyoni nya linene,
milondrwa nya mati yi nyi randrede;
mavimbi yago yatshavbo,
ma vbindride khu vbatshani gwangu.
4Eni nyi di ganela, kheni:
Nyi dzudzugidwe mahoni gwago,
khu guralo, nyi na wuya gambe nyaluphye,
nyita wona nyumba yago nya gukatege.
5Mati ma nyi fenengedzide
kala gu vboha hefemuloni gwangu,
liphala nya vafi li nyi randrede,
ni mahata ya matini ma nyi dzongeledzede hungoni gwangu.
6Nyi relede kala guya vboha dzitshinani nya sigomo;
nyi relela kala mafuni,
migonyo nya litigo yi di
nyi khothela kala gupindruga.
Aholu khu thowoni nya vafi, u di vbulugisa womi wangu,
uwe Pfhumu Nungungulu wangu!
7Avbo hefemulo wangu wu nga bani wu tshimega,
nyi di alakanya Pfhumu Nungungulu;
nombelo wangu wu di gwela kala iyo gwago,
nyumbani gwago nya gukatege.
8Vale va khodwago khu sifananiso nyamba phasa gilo,
va gu kanyisa wuhindzi wago.
9Aholu, eni khu ndzimo yangu nya gubonge,
nyi na gu girela miphaso;
gisambanyo gyangu
nyi na gi landrisa;
guvbanyisa gwa guta khu ga Pfhumu Nungungulu.”
10 Pfhumu Nungungulu a di ruma ndzandzi, iyo yi ya gosa Jona mafuni funguni.
Currently Selected:
Jona 2: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
