Hoseya 13
13
Israyeli a ngu divaledwa khu Pfhumu Nungungulu
1Avbo Efrayimi a nga bani na gu ganela,
vathu va di ndrendremela,
a di khusedzidwe tigoni ga Israyeli.
Aholu a dzi rwegide nandru khu gu khozela Bhahali,
uye fude.
2Olu, va gu engedzela gu andrisa sighoho;
khu parata yawe, va gu gira sifananiso nya gupfhudwe,
sifananiso nya guwumbwe khu mapimo nya wugengeli,
a gu thumo nya mandza ya vameseri,
va bwelo khavbo va ganela, khavo:
Va gireleni miphaso. Vathu va ninga dzibesu
sifananiso nya simombyana.
3Khu guralo, va na khala nga mapfhi nya wuronga
ni hunguva nya mambagugya
yi vbiredzelago guvbindra,
ni mungu wu vbuvbiswago khu gingulu,
ni wutshi wu tuvigago khu nyumbani.
4Ambari ulo, eni kheni Pfhumu Nungungulu wago,
gukhugela tigoni ga Egipito.
Khu guralo, khu na ngati mumbe nungungulu,
vbavbandze gwangu,
kholu mwalo mumbe mutshudzisi,
vbavbandze gwangu.
5 # Wona gambe: Dhet 8:12-16. Eni nyi mi sayisideni mu giwulani,
tigoni mule nya lihani nya guvbise ni gihala.
6 # Wona gambe: Dhet 8:11-17. Avbo nyi nga bani nyi gu va hodzisa va khura,
avo va di tsaka,
avbo va nga bani va tsaka,
myonyoni gwawe, gu di tala khu matshandza;
khu guralo, va di divaledwa khu eni.
7Khu guralo nyi na va tela kha nga nghala;
nyi va ranga khu ndzilani, gu fanana ni likhamba.
8Gufanana ni gikankanka
gi nga bedwago sanana saye,
nyi na va mana nyi va vbadzulela.
Nyi na fanana ni nghala nyi va vbadzulela avbo vbale kamwe,
va na pferuledwa khu sirengo nya likhabi.
9Uwe Israyeli, u mbembisidwe,
kholu u nga nyi wugelago,
u bwelo khavbo u wugela muphasedzeli wago.
10 # Wona gambe: 1 Sam 8:5-6. Olu womo hayi mufumeli wago,
gasi a gu vhikela
madhoropani gwago gwatshavbo?
Ni valamuli vago u nga va lombago, khuwe:
Nyi ninge mufumeli ni vathangeli?
11 # Wona gambe: 1 Sam 10:17-24; 15:26. Nyi gu ningide mufumeli khu likhulo,
nyi bwelo khavbo nyi gu wandrela khu giviti.
12Wuvivbi wa Efrayimi wu hungidwe,
ni gighoho gyaye gi vegedzidwe.
13A na vbohedwa khu wuvi nya nga wa nyamayi a lumwago,
kholu uye gyanana nyamba yingisa,
gya gu vboha gikhati,
kha dugi khu rumbuni a nga sihalago umo.
14 # Wona gambe: 1 Kor 15:55. Eni nyi na va dzegisa
tshivbani nya liphala nya guete,
nyi va tshudzisa lufuni.
Gasi olu uwe lufu, yomo hayi mitungu yago?
Uwe liphala nya vafi,
gomo hayi gumbembisa gwago?
Maho yangu gimwalo ni gimwegyo
ma gi wonago nya gu dzi laye khigyo.
15Ambari a gu ninga mihandro
vbakari ga vandriyaye,
gu nata phuvbo ya Khugadambo,
khu ga Pfhumu Nungungulu,
yi furugedza gukhugela giwulani,
yi bangisa sifefe sawe,
gu banga ni nambo wawe.
Thomba yawe yatshavbo yi na phangwa
khu malangani yi khalago umo.
16Vathu va Samariya
va na rwala nandru wawe,
kholu va wugedego Nungungulu wawe.
Avo va na songwa khu matshari,
sanana sawe si na pfareledwa,
ni vagadzi vawe va gu ni dzimimba
va na pferuledwa sirumbu khu vbakari.
Currently Selected:
Hoseya 13: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
